ກອງປະຊຸມໂຕະມົນລະດັບສູງ ຄັ້ງທີ 12 ພາຍໃຕ້ຫົວຂໍ້ “ເພີ່ມທະວີການເປັນຄູ່ຮ່ວມທີ່ມີປະສິດທິຜົນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VIII ເພື່ອນຳພາປະເທດຊາດຫຼຸດພົ້ນອອກຈາກ ສະຖານະພາບດ້ອຍພັດທະນາ ໃນປີ 2020” ຈັດຂຶ້ນວັນທີ 27 ພະຈິກ 2015 ທີ່ສູນເຝິກອົບຮົມ ແລະ ການຮ່ວມມືລາວ-ຍີ່ປຸ່ນ ເປັນກຽດເຂົ້າຮ່ວມຂອງທ່ານ ທອງສິງ ທຳມະວົງ ນາຍົກລັດຖະມົນຕີແຫ່ງ ສປປ ລາວ ທ່ານນາງ ເຮເລັນ ຄຼາກ ຜູ້ອຳນວຍການໃຫຍ່ ອົງການສະຫະປະຊາຊາດ ເພື່ອການພັດທະນາ ມີບັນດາລັດຖະມົນຕີວ່າການ ຊ່ວຍວ່າການ ທູຕານຸທູດ ຄະນະຜູ້ແທນຂອງບັນດາຄູ່ຮ່ວມພັດທະນາ ແລະ ຂະແໜງການກ່ຽວຂ້ອງ.
ຈຸດປະສົງຂອງການຈັດກອງປະຊຸມຄັ້ງນີ້ ເພື່ອແຈ້ງສະພາບການພັດທະນາຂອງ ສປປ ລາວ ໃຫ້ບັນດາຄູ່ຮ່ວມພັດທະນາຮັບຊາບ ແລະ ນຳສະເໜີຫົວຂໍ້ຕ່າງໆເຊັ່ນ: ບົດລາຍງານຜົນສຳເລັດ ແລະ ບົດຮຽນທີ່ຖອດຖອນໄດ້ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VII ລາຍງານກ່ຽວກັບຄວາມຄືບໜ້າ ໃນການຈັດຕັ້ງປະຕິບັດເປົ້າໝາຍສະຫັດສະວັດພັດທະນາ (MDGs) ແລະ ສະເໜີກ່ຽວກັບການຈັດຕັ້ງຜັນຂະຫຍາຍເປົ້າໝາຍການພັດທະນາແບບຍືນຍົງ (SDGs) ເຂົ້າໃນການພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII 2016-2020 ນຳສະເໜີບັນດາມາດຕະການ ແລະ ລະດົມຂົນຂວາຍທຶນຮອນຂອງແຕ່ລະຂະແໜງການ ເຂົ້າໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ໃຫ້ມີປະສິດທິຜົນເພື່ອນຳພາປະເທດຊາດຫຼຸດພົ້ນອອກຈາກ ສະຖານະພາບດ້ອຍພັດທະນາ ໃນປີ 2020 ທົບທວນໝາກຜົນ ແລະ ບົດຮຽນທີ່ຖອດຖອນໄດ້ ໃນການຈັດຕັ້ງປະຕິບັດວຽກງານຂະບວນການໂຕະມົນຢູ່ ສປປ ລາວ ໃນໄລຍະ 15 ປີຜ່ານມາ ແລະ ຜ່ານທິດທາງແຜນການໃນຕໍ່ໜ້າ.
ໂອກາດດັ່ງກ່າວ ທ່ານ ທອງສິງ ທຳມະວົງ ກໍ່ໄດ້ຍົກໃຫ້ເຫັນບາງບັນທີ່ສຳຄັນວ່າ: ສປປ ລາວ ໄດ້ພະຍາຍາມ ແລະ ເອົາໃຈໃສ່ໃນການແກ້ໄຂໃຫ້ປະຊາຊົນ ຫຼຸດພົ້ນອອກຈາກຄວາມທຸກຍາກ ສ້າງພື້ນຖານປະຖົມປັດໄຈເພື່ອນຳພາປະເທດຊາດ ຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ກ້າວຕາມທິດພັດທະນາແບບຍືນຍົງ ໃນນີ້ ສິ່ງທີ່ພົ້ນເດັ່ນແມ່ນລັດຖະບານ ໄດ້ຈັດຕັ້ງປະຕິບັດນະໂຍບາຍສາມສ້າງຄື: ສ້າງແຂວງເປັນຫົວໜ່ວຍຍຸດທະສາດ ສ້າງເມືອງໃຫ້ເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ທັງນີ້ ກໍ່ເພື່ອເພີ່ມທະວີຍົກສູງຄວາມຮັບຜິດຊອບ ແລະ ສິດອຳນາດໃຫ້ແກ່ທ້ອງຖິ່ນຫຼາຍຂຶ້ນ ນອກຈາກນີ້ ຍັງໄດ້ສືບຕໍ່ປະຕິບັດບັນດານະໂຍບາຍຂອງລັດຖະບານ ເປັນຕົ້ນແມ່ນ ການຮັກສາສະຖຽນລະພາບ ການເຕີບໂຕທາງດ້ານເສດຖະກິດ ການພັດທະນາຊັບພະຍາກອນມະນຸດ ການຫັນເປັນອຸດສະຫະກຳທັນສະໄໝ ການປົກປັກຮັກສາສິ່ງແວດລ້ອມແບບຍືນຍົງ ແລະ ອື່ນໆ ພ້ອມນີ້ ທ່ານນາງ ເຮເລັນ ຄຼາກ ກໍ່ໄດ້ມີຄຳເຫັນວ່າ ການເປັນຄູ່ຮ່ວມເພື່ອການພັດທະນາທີ່ມີປະສິດທິຜົນ ແມ່ນວິທີການທີ່ຕ້ອງໄດ້ຫັນປ່ຽນໃຫ້ທັນສະພາບການ ເພື່ອສະໜັບສະໜູນໃຫ້ ສປປ ລາວ ພັດທະນາໄວຂຶ້ນ ໃນຮູບແບບສົມບູນ ແລະ ຍືນຍົງ ການຊ່ວຍເຫຼືອທາງການເພື່ອການພັດທະນາ ໄດ້ຊ່ວຍສະໜັບສະໜູນການພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ ພ້ອມກັບສະໜັບສະໜູນການພັດທະນາການເກັບລາຍຮັບ ໃຫ້ໄດ້ຮັບຜົນດີຍິ່ງໆຂຶ້ນ.
ໃນກອງປະຊຸມຄັ້ງນີ້ ຍັງໄດ້ມີພິທີເຊັນຖະແຫຼງວຽງຈັນ ວ່າດ້ວຍການເປັນຄູ່ຮ່ວມເພື່ອການພັດທະນາທີ່ມີປະສິດທິຜົນ ຕາງໜ້າໃຫ້ລັດຖະບານລາວ ໂດຍທ່ານ ສະເຫຼີມໄຊ ກົມມະສິດ ລັດຖະມົນຕີຊ່ວຍວ່າການກະຊວງການຕ່າງປະເທດ ແລະ ຕາງໜ້າຄູ່ຮ່ວມພັດທະນາ ໂດຍທ່ານນາງ ຄາອາຣິນາ ອິມໂມເນັນ ຜູ້ປະສານງານອົງການສະຫະປະຊາຊາດ ທັງເປັນຜູ້ຕາງໜ້າອົງການສະຫະປະຊາຊາດເພື່ອການພັດທະນາ ປະຈຳ ສປປ ລາວ ເຊິ່ງຖະແຫຼງການດັ່ງກ່າວ ໄດ້ຜັນຂະຫຍາຍຈາກປະສິດທິຜົນຂອງການຊ່ວຍເຫຼືອມາ ເປັນປະສິດທິຜົນຂອງການພັດທະນາ ເນື້ອໃນຂອງຖະແຫຼງການແມ່ນຍັງຮັກສາ 5 ຫຼັກ ການເດີມຂອງຖະແຫຼງການວ່າດ້ວຍປະສິດທິຜົນຂອງການຊ່ວຍເຫຼືອ ແລະ 3 ຫຼັກການໃໝ່ຄື: ການລະດົມທຶນພາຍໃນ ການຮ່ວມມືແບບໃຕ້-ໃຕ້ການຮ່ວມມືສາມຫຼ່ຽມ ແລະ ການແລກປ່ຽນຄວາມຮູ້ ແລະ ບົດບາດຂອງພາກທຸລະກິດເອກະຊົນ ເພື່ອເປັນຄູ່ຮ່ວມໃນການພັດທະນາ.
ແຫ່ລງຂ່າວ
