ເພື່ອກະກຽມໃຫ້ແກ່ກອງປະຊຸມລັດຖະມົນຕີ ການຮ່ວມມືອະນຸພາກພື້ນແມ່ນ້ຳຂອງ (GMS) ຄັ້ງທີ 19 ທີ່ ສປປ ລາວ ເຮົາເປັນເຈົ້າພາບ ຈັດຂຶ້ນທີ່ນະຄອນຫຼວງວຽງຈັນ ໃນວັນທີ 11 ທັນວາ 2013 ນີ້ ໃຫ້ມີຜົນສຳເລັດອັນຈົບງາມນັ້ນ ວັນທີ 10 ທັນວາ 2013 ຜ່ານມານີ້ ກໍໄດ້ມີກອງປະຊຸມເຈົ້າໜ້າທີ່ອາວຸໂສ ແລະ ກອງປະຊຸມຄູ່ຮ່ວມພັດທະນາ ຈັດຂຶ້ນຢູ່ໂຮງແຮມດອນຈັນພາເລດ ນະຄອນຫຼວງວຽງຈັນ ເປັນປະທານຮ່ວມຂອງທ່ານນາງ ມອນມະນີ ຍອຍບົວກອງ ຫົວໜ້າກອງເລຂາຄະນະກຳມະການແມ່ນ້ຳຂອງແຫ່ງຊາດ ຜູ້ປະສານງານວຽກງານຮ່ວມມືອະນຸພາກພື້ນແມ່ນ້ຳຂອງ ແລະ ທ່ານ ເຈມ ສຸລິນ ຫົວໜ້າພະແນກຮ່ວມມື ແລະ ປະສານງານອະນຸພາກພື້ນແມ່ນ້ຳຂອງ ຂອງທະນາຄານພັດທະນາອາຊີ (ADB) ຊຶ່ງມີຫົວໜ້າ ແລະ ຄະນະກອງເລຂາແມ່ນ້ຳຂອງຈາກ 6 ປະເທດ ໃນອະນຸພາກພື້ນແມ່ນ້ຳຂອງຄື: ສປ.ຈີນ ມຽນມາ ໄທ ລາວ ຫວຽດນາມ ແລະ ກຳປູເຈຍ ແລະ ອົງການຮ່ວມມືທະນາຄານພັດທະນາອາຊີເຂົ້າຮ່ວມ.
ໃນກອງປະຊຸມເຈົ້າໜ້າທີ່ອາວຸໂສຄັ້ງນີ້ ແມ່ນໄດ້ພ້ອມກັນປະກອບຄຳຄິດຄຳເຫັນ ແລະ ປຶກສາຫາລືໃສ່ບັນດາເນື້ອໃນເອກະສານຕ່າງໆ ທີ່ຈະຮັບຮອງເອົາຢູ່ໃນເວລາກອງປະຊຸມລັດຖະມົນຕີ GMS ຄັ້ງທີ 19 ນີ້ ຊຶ່ງກອງປະຊຸມຄັ້ງນີ້ ຈະໄດ້ປຶກສາຫາລືກ່ຽວກັບ 4 ບັນຫາໃຫຍ່ຄື: ໂຄງການລະດັບພາກພື້ນລຸ້ນຕໍ່ໄປ ຂອງອະນຸພາກພື້ນແມ່ນ້ຳຂອງ ຜົນໄດ້ຮັບຈາກການວິເຄາະ ພາຍໃຕ້ກອບການຮ່ວມມືອະນຸພາກພື້ນແມ່ນ້ຳຂອງ ການທົບທວນຄືນ ແລະ ຮອງຮັບເອົາຂໍ້ຕົກລົງຕ່າງໆ ແລະ ບັນດາຄຳຄິດຄຳເຫັນຈາກຂະແໜງການອ້ອມຂ້າງ ໃນການຮ່ວມມື ແລະ ບັນຫາຕ່າງໆ ເພື່ອເຮັດໃຫ້ການຈັດຕັ້ງປະຕິບັດໂຄງການ ໃນກອບການລົງທຶນໃຫ້ມີປະສິດທິພາບ.
ອະນຸພາກພື້ນແມ່ນ້ຳຂອງ ໂດຍມີຈຸດປະສົງເພື່ອສົ່ງເສີມການພັດທະນາເສດຖະກິດ ແລະ ສັງຄົມ ຂອງບັນດາປະເທດໃນອະນຸພາກພື້ນແມ່ນ້ຳຂອງ ຊຶ່ງມີແຜນງານຮ່ວມມືກວມເອົາ 9 ຂົງເຂດວຽກງານເຊັ່ນ: ແຜນງານການຂົນສົ່ງ ໂທລະຄົມມະນາຄົມ ພະລັງງານການທ່ອງທ່ຽວ ການພັດທະນາຊັບພະຍາກອນມະນຸດ ສິ່ງແວດລ້ອມ ການກະສິກຳ ການຄ້າ ແລະ ແຜນງານການລົງທຶນ ບັນດາແຜນງານດັ່ງກ່າວທັງໝົດ ໄດ້ສະເໜີໃຫ້ທະນາຄານພັດທະນາອາຊີເປັນກອງເລຂາ ເພື່ອສະໜັບສະໜູນທຶນໃຫ້ແກ່ແຜນງານຕ່າງໆເຫຼົ່ານັ້ນ ບັນດາປະເທດອະນຸພາກພື້ນແມ່ນ້ຳຂອງ ມີປະຊາກອນທັງໝົດ 324 ລ້ານຄົນ ຍຸດທະສາດ 10 ປີຜ່ານມາ (2002-2012) ໄດ້ບົ່ງບອກຂີດຄວາມສາມາດ ໃນການເພີ່ມທະວີຄວາມສາມາດ ໃນການແຂ່ງຂັນ ເພີ່ມທະວີຜົນຕອບແທນຈາກການພັດທະນາ ການເຊື່ອມຕໍ່ໂຄງລ່າງພື້ນຖານໃນອະນຸພາກພື້ນ ແລະ ຈະກໍ່ໃຫ້ເກີດຄວາມສຳນຶກ ແຫ່ງການກາຍເປັນຊຸມຊົນໜຶ່ງດຽວ.