ກອງປະຊຸມຄະນະກຳມະການ ປະຈຳພາກພື້ນອາຊີ-ປາຊີຟິກ ຂອງສະມັດຊາລັດຖະສະພາ ບັນດາປະເທດທີ່ໃຊ້ພາສາຝຣັ່ງ ຄັ້ງທີ 6 ຈັດຂຶ້ນລະຫວ່າງວັນທີ 5-6 ທັນວາ 2013 ທີ່ໂຮງແຮມລ້ານຊ້າງ ນະຄອນຫຼວງວຽງຈັນ ໂດຍມີທ່ານ ດຣ. ໄຊສົມພອນ ພົມວິຫານ ຮອງປະທານສະພາແຫ່ງຊາດ ມີບັນດາປະເທດສະມາຊິກທີ່ມາຈາກ ສສ.ຫວຽດນາມ ກຳປູເຈຍ ຝຣັ່ງ ຜູ້ຕາງໜ້າຈາກທະວີບອາຟຣິກກາ ເອີຣົບ ແລະ ແຂກຖືກເຊີນ ເຂົ້າຮ່ວມ.
ທ່ານຮອງປະທານສະພາແຫ່ງຊາດ ກ່າວວ່າ: ກອງປະຊຸມຄັ້ງນີ້ ຈັດຂຶ້ນທ່າມກາງສະພາບການທາງດ້ານເສດຖະກິດການເມືອງຂອງໂລກ ແລະ ພາກພື້ນ ພວມສືບຕໍ່ຜັນແປໄປຢ່າງສັບສົນ ຊຶ່ງໄດ້ສົ່ງກະທົບຢ່າງຫຼີກລ່ຽງບໍ່ໄດ້ຕໍ່ປະເທດຕ່າງໆ ນັບທັງປະເທດທີ່ພັດທະນາ ແລະ ກຳລັງພັດທະນາ ໃນນັ້ນ ລວມທັງບັນດາປະເທດທີ່ໃຊ້ພາສາຝຣັ່ງ ໂດຍສະເພາະແມ່ນຜົນກະທົບຈາກວິກິດການ ເສດຖະກິດຂອງສະຫະລັດ ໜີ້ສາທາລະນະຂອງເອີຣົບ ແລະ ຄວາມຂັດແຍ່ງທາງການເມືອງຢ່າງຮຸນແຮງໃນຕາເວັນອອກກາງ ແລະ ອາຟຣິກກາເໜືອ ທີ່ໄດ້ກາຍເປັນສົງຄາມກາງເມືອງ ທີ່ບໍ່ມີທ່າທີວ່າຈະຈົບລົງໄດ້ງ່າຍໆໃນອະນາຄົດອັນໃກ້ນີ້.
ແນວໃດກໍຕາມ ຢູ່ພາກພື້ນອາຊີ-ປາຊີຟິກ ໂດຍລວມຍັງສືບຕໍ່ມີສະຖຽນລະພາບ ແລະ ມີການຮ່ວມມືເພື່ອພັດທະນາທີ່ຟົດຟື້ນທີ່ສຸດໃນໂລກ ກາຍເປັນສູນກາງແຫ່ງການພົວພັນສາກົນ ສູນກາງດ້ານການຄ້າ ການລົງທຶນ ແລະ ການທ່ອງທ່ຽວຢ່າງກວ້າງຂວາງ ປະເທດມະຫາອຳນາດທີ່ສຳຄັນຂອງໂລກ ລ້ວນແຕ່ຫັນຄວາມສົນໃຈມາສູ່ພາກພື້ນນີ້ຫຼາຍຂຶ້ນ ຈາກສະພາບດັ່ງກ່າວ ຈຶ່ງເຮັດໃຫ້ພາກພື້ນນີ້ມີທັງກາລະໂອກາດ ແລະ ສິ່ງທ້າທາຍຫຼາຍຢ່າງ ຊຶ່ງສະມາຊິກລັດຖະສະພາທີ່ໃຊ້ພາສາຝຣັ່ງ ຈາກພາກພື້ນອາຊີ-ປາຊີຟິກ ພວກເຮົາຈະຕ້ອງໄດ້ປຶກສາຫາລືກັນ ເພື່ອຊອກຫາຊ່ອງທາງເຮັດແນວໃດໃຫ້ລັດຖະບານຂອງຕົນ ເພີ່ມທະວີຍົກລະດັບຂີດຄວາມສາມາດໃນການແຂ່ງຂັນທຸກໆດ້ານ ເພື່ອເຮັດໃຫ້ປະເທດຊາດມີການພັດທະນາທີ່ຍືນຍົງ ແລະ ນຳເອົາຜົນປະໂຫຍດທີ່ແທ້ຈິງມາສູ່ປະຊາຊົນຂອງພວກເຮົາ.