ທະນາຄານນະໂຍບາຍ ເຮັດໜ້າທີ່ເປັນໃຈກາງສະໜອງທຶນ ໃຫ້ລັດຖະບານທົດລອງບ້ານ 3 ສ້າງໃນທົ່ວປະເທດ ດ້ວຍອັດຕາດອກເບ້ຍເກັບຄືນເປັນ 3 ໄລຍະ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນຕະຫຼອດ 9 ເດືອນຜ່ານມາ ປ່ອຍໄປແລ້ວທັງໝົດ 73,93 ຕື້ກີບໃຫ້ແກ່ຂະແໜງປູກຝັງລ້ຽງສັດ ແລະ ຜະລິດເຂົ້ານາແຊງ.
ທ່ານ ເສດຖາ ກັນຍາວັນ ຮອງເລຂາຄະນະພັກຮາກຖານ ຮອງອຳນວຍການທະນາຄານນະໂຍບາຍກ່າວເມື່ອວັນທີ 30 ພະຈິກຜ່ານມານີ້ວ່າ: ທະນາຄານສືບຕໍ່ປ່ອຍສິນເຊື່ອໃຫ້ກັບບ້ານທົດລອງ 3 ສ້າງຂອງລັດຖະບານ ເພື່ອໃຫ້ປະຊາຊົນສາມາດເຂົ້າຫາແຫຼ່ງທຶນ ໃນອັດຕາດອກເບ້ຍຕ່ຳນຳໄປປະກອບກິດຈະກຳ ໃນການປູກຝັງ-ລ້ຽງສັດ ແລະ ອື່ນໆຕາມຄວາມເໝາະສົມ ໃຫ້ເປັນເສດຖະກິດສາມາດລ້ຽງຄອບຄົວໄດ້.
ການປ່ອຍສິນເຊື່ອໃສ່ບ້ານເປົ້າໝາຍປະກອບມີ 3 ໄລຍະ ແລະ ມີອັດຕາດອກເບ້ຍທົດແທນທີ່ແຕກຕ່າງກັນຄື: ໄລຍະທີ 1 ບໍ່ເກີນ 1 ປີ ມີດອກເບ້ຍ 5% ຕໍ່ປີ ໄລຍະກາງ 1-3 ປີ ອັດຕາດອກເບ້ຍ 6% ຕໍ່ປີ ແລະ ອັດຕາສິນ ເຊື່ອໄລຍະຍາວ 3-5 ປີ ອັດຕາດອກເບ້ຍ 7% ຕໍ່ປີ ຕາມຄວາມເໝາະສົມຂອງປະເພດກິດຈະການ ຫຼື ທຸລະກິດ.
ສຳລັບການປ່ອຍສິນເຊື່ອໃນ 9 ເດືອນຂອງປີ 2013 ນີ້ຢືນຢັນວ່າ: ປ່ອຍຢູ່ໃນ 65 ເມືອງທຸກຍາກ 64 ຈຸດສຸມພັດທະນາຂອງລັດຖະບານ ໃນເປົ້າໝາຍທົດລອງ 3 ສ້າງທີ່ມີທັງໝົດ 590,34 ຕື້ກີບ ເພີ່ມຂຶ້ນຈາກປີ 2012 ປະມານ 49,5% ກວມເອົາ 3.977 ບ້ານໃນທົ່ວປະເທດ.
ມາຮອດເດືອນກັນຍາ 2013 ທະນາຄານນະໂຍບາຍ ມີຍອດສິນເຊື່ອທັງໝົດ 1.723,44 ຕື້ກີບ ເພີ່ມຂຶ້ນຈາກປີຜ່ານມາ 27,7% ສາມາດປະຕິບັດຍອດສິນເຊື່ອໃນປີ ໄດ້ເກືອບ 100% ເຊິ່ງຍອດສິນເຊື່ອກະສິກຳປູກຝັງກວມ 39% ແລະ ລ້ຽງສັດ 43% ຂອງຍອດສິນເຊື່ອທັງໝົດ.