ເອເຈນຊີ ສື່ຣັດເຊຍ ອິນເຕີແຟກ ລາຍງານ ແຫລ່ງຂ່າວເປີດເຜີຍພົບກ່ອງດຳເຮືອບິນເມໂທຣເຈັດຣັດເຊຍ A-321 ບັນທຶກສຽງແປກປະຫລາດທີ່ບໍ່ສາມາດລະບຸໄດ້ຈາກພາຍໃນຫ້ອງນັກບິນບໍ່ຈັກວິນາທີທີ່ ເຮືອບິນຈະຫາຍໄປຈາກຈໍເຣດ້າ ໃນຂະນະທີ່ຜູ້ຊ່ຽວຊານເລີ່ມຕົ້ນການກວດສອບກ່ອງດຳທັງສອງຂອງຖ້ຽວບິນມໍລະນະນີ້ ຊຶ່ງມາເຖິງເວລານີ້ ອີຍິບປະຕິເສດຄວາມກ່ຽວພັນກັບການຕົກ ແຕ່ສະຫະລັດ ຍັງບໍ່ຕັດຂໍ້ສົງໄສນີ້
ເດິກາດ່ຽນ ສື່ອັງກິດ ລາຍງານມື້ວານນີ້ວ່າ ເຖິງແມ່ນອີຍິບຈະປະດິເສດຄວາມກ່ຽວພັນຂອງກຸ່ມກໍ່ການຮ້າຍ IS ແລະການຕົກຂອງເຮືອບິນໂດຍສານຣັດເຊຍເມໂທຣເຈັດ A-321 ໃນຂະນະທີ່ເຈົ້າຫນ້າທີ່ສະຫະລັດຍັງຄົງບໍ່ຕັດປະເດັນນີ້ອອກໄປ
ຊຶ່ງເປັນທີ່ຄາດວ່າທີມເຈົ້າຫນ້າທີ່ສອບສວນນານາຊາດຈາກ ອີຍິບ ຣັດເຊຍ ແລະ ຝຣັ່ງຈະສະຫລຸບຫລັກຖານທີ່ໄດ້ຈາກສະຖານທີ່ຕົກ ແລະ ຈະເລີ່ມຕົ້ນກວດສອບກ່ອງດຳທັງສອງກ່ອງຂອງເມໂທຣເຈັດ A-321 ທີ່ຫາກໍ່ພົບກ່ອນໜ້ານີ້
ຈາກລາຍງານພົບວ່າ ຖ້ຽວບິນ 7K-9268 ໄດ້ຫາຍໄປຈາກຈໍເຣດ້າຫລັງຈາກທີ່ອອກຈາກເດີ່ນບິນອີຍິບ Sharm el-Sheikh ໄປແລ້ວ 23 ນາທີ ຊຶ່ງມາຈົນເຖິງເວລານີ້ລາຍງານບັນທຶກໄຟລ໌ການບິນຢ່າງເປັນທາງການຍັງບໍ່ຖືກເປີດເຜີຍ ແຕ່ວ່າຫລ້າສຸດສື່ຣັດເຊຍອິນເຕີແຟກ ລາຍງານຈາກແຫລ່ງຂ່າວທີ່ບໍ່ເປີດເຜີຍຊື່ ຊຶ່ງເປັນຂໍ້ມູນທີ່ຍັງບໍ່ໄດ້ຮັບການຢືນຢັນລະບຸວ່າ ມີການຄົ້ນພົບສຽງທີ່ບໍ່ສາມາດລະບຸໄດ້ເກີດຂຶ້ນພາຍໃນຫ້ອງນັກບິນຄົນຂັບກ່ອນທີ່ ເຮືອບິນລຳນີ້ຈະຫາຍໄປຈາກຈໍເຣດ້າໃນມື້ວັນເສົາທີ່ 31 ຕຸລາ ແຕ່ແຫລ່ງຂ່າວຍັງຄົງຢືນຢັນນັກບິນບໍ່ໄດ້ສົ່ງສັນຍານຂໍຄວາມຊ່ວຍເຫລືອ
ອິນເຕີແຟກລາຍງານຕໍ່ວ່າ ນັກບິນຖ້ຽວບິນ 7K-9268ໄດ້ລົມກັບຫໍບັງຄັບການບິນເປັນເວລາ 4 ນາທີຕາມປົກກະຕິກ່ອນທີ່ເຮືອບິນຈະຫາຍໄປຈາກຈໍເຣດ້າ ແລະ ບໍ່ມີສິ່ງສະແດງຄວາມຜິດປົກກະຕິອອກມາໃນການສົນທະນານັ້ນ ແຕ່ວ່າຈາກຄຳກ່າວຂອງແຫລ່ງຂ່າວຂອງສື່ຣັດເຊຍໄດ້ໃຫ້ລາຍລະອຽດວ່າ “ພົບສຽງທີ່ບໍ່ສາມາດລະບຸທີ່ມາຫລືປະເພດໄດ້ໃນຫ້ອງນັກບິນຂອງຖ້ຽວບິນໂດຍສານ ນີ້ ຊຶ່ງຖືກບັນທຶກໄວ້ກ່ອນທີ່ຖ້ຽວບິນນີ້ຈະຫາຍໄປຈາກຈໍເຣດ້າ” ແລະ ຂໍ້ມູນຈາກກ່ອງດຳສາມາດຊີ້ແຈງວ່າ “ເປັນສະຖານນະການທີ່ເກີດຂື້ນຢ່າງກະທັນຫັນ ແລະ ຄາດບໍ່ເຖິງ” ແຫລ່ງຂ່າວກ່າວ
ນອກຈາກນີ້ RIA Novosti ສື່ລັດຖະບານຣັດເຊຍໄດ້ລາຍງານຄຳເວົ້າຂອງເຈົ້າຫນ້າທີ່ສອບສວນຄົນໜຶ່ງຊີ້ວ່າ ຮູບແບບການໄດ້ຮັບບາດເຈັບຂອງຜູ້ໂດຍສານເຮັດໃຫ້ເຂົ້າໃຈໄດ້ວ່າ ອາດມີການລະເບີດຂຶ້ນກ່ອນທີ່ເຮືອບິນຈະຕົກຮອດພື້ນ
ແລະນອກຈາກນີ້ຍັງມີລາຍງານໃນຣັດເຊຍເປີດເຜີຍວ່າ ມີລູກເຮືອບາງສ່ວນກັງວົນໃນສະພາບຂອງເຮືອບິນລຳເກີດເຫດ ຊຶ່ງເຮັດໃຫ້ມີຜູ້ຕັ້ງຂໍ້ສັງເກດເພີ່ມຫລາຍຂຶ້ນເຖິງຄວາມເປັນໄປໄດ້ວ່າ ອາດຄ້າຍເຫດການໃນປີ 2001 ຊຶ່ງເກີດໃນໄຄໂລ ອີຍິບ ທີ່ບໍລິເວນຫາງຂອງເຮືອບິນແອລ໌ບັດ 321 ກະທົບເຂົ້າກັບພື້ນທາງລັນເວໃນຂະນະກຳລັງລົງຈອດ ແລະ ເຮັດໃຫ້ໂຄງເຮືອບິນໄດ້ຮັບຄວາມເສຍຫາຍ
ນອກຈາກນີ້ ສື່ອັງກິດຍັງລາຍງານເພີ່ມຕື່ມວ່າ ໄດ້ມີການເປີດເຜີຍເຖິງຂໍ້ມູນການບິນຜ່ານທາງເວັບໄຊຕ໌ FlightRadar24 ເວັບໄຊຕ໌ຊ່ຽວຊານຕິດຕາມການເຄື່ອນໄຫວຖ້ຽວບິນ
ຊຶ່ງຈາກຂໍ້ມູນພົບວ່າ ເມໂທຣເຈັດ A-321 ນັ້ນລະດັບບິນສູງ ແລະ ໄວກ່ອນທີ່ຈະຕົກລົງມາ ຊຶ່ງເປັນຮູບແບບທີ່ຜູ້ຊ່ຽວຊານບາງຄົນໃຫ້ຄວາມເຫັນວ່າ ເປັນຮູບແບບທີ່ສະແດງໃຫ້ເຫັນວ່າເຮືອບິນໄດ້ເສຍສ່ວນຫາງໄປ ຊຶ່ງໄດ້ຮັບການຢືນຢັນຈາກຫລັກຖານພາບຖ່າຍຂອງເຮືອບິນເມໂທຣເຈັດ A-321 ລຳດຽວກັນນີ້ທີ່ໄດ້ຖ່າຍໄວ້ໃນບໍ່ຈັກເດືອນໃນປີ 2015 ຊຶ່ງພາບຖ່າຍສະແດງໃຫ້ເຫັນເຖິງສີທີ່ປ່ຽນແລະຄວາມເສຍຫາຍໃນສ່ວນຫາງ
ເດິກາດ່ຽນລາຍງານເພີ່ມຕື່ມວ່າ ສະຫະລັດ ໄດ້ອອກຄຳສັ່ງຫ້າມບໍ່ໃຫ້ເຈົ້າຫນ້າທີ່ການທູດຂອງຕົນເດີນທາງໃນທະເລໄຊນາຍ ໃນຂະນະທີ່ເຈມສ໌ ແຄບເຕີ ຜູ້ອຳນວຍການສຳນັກງານສອບສວນກາງຂອງສະຫະລັດ CIA ຢືນຢັນວ່າ ຍັງບໍ່ສາມາດຕັດປະເດັນຂໍ້ສົງໄສກໍ່ການຮ້າຍອອກໄປໄດ້ ເຖິງແມ່ນຈະຍອມຮັບວ່າ ໃນຂະນະນີ້ຍັງບໍ່ມີຫລັກຖານສະແດງຄວາມເຊື່ອມໂຍງໃຫ້ເຫັນວ່າ ເຮືອບິນໂດຍສານຣັດເຊຍຖືກກຸ່ມກໍ່ການຮ້າຍ IS ເຮັດໃຫ້ຕົກແທ້
ແຕ່ວ່າ ປະທານາທິບໍດີອີຍິບ ອັນເດລ ຟາຕາ ຊິຊີ ຢືນຢັນເຖິງຄວາມປອດໄພໃນການເດີນທາງເທິງທະເລໄຊນາຍເຖິງແມ່ນຈະມີກຸ່ມຕິດອາວຸດ ທ້ອງຖິ່ນທີ່ມີຄວາມເຊື່ອມໂຍງກັບກຸ່ມກໍ່ການຮ້າຍ IS ອອກປະຕິບັດການໃນບໍລິເວນນັ້ນ