ມັນບໍ່ແມ່ນເລື່ອງໜ້າແປກໃຈເລີຍທີ່ເມື່ອເຮົາບໍ່ໄດ້ນອນຈັກຄືນ ພໍຕື່ນເຊົ້າມາແລ້ວເຮົາຈະຕາມົວ ມຶນຫົວ ແລະຫາວເລື້ອຍໆ ແຕ່ຜົນກະທົບຂອງການອົດຫລັບອົດນອນບໍ່ໄດ້ມີຊ່ຳນັ້ນ ມັນຍັງມີຜົນກະທົບທີ່ຊວນໃຫ້ຂົນໜາວລຸກຖ້າເຈົ້າຍັງອົດຫລັບອົດນອນຕິດຕໍ່ກັນເລື້ອຍໆ ເຊັ່ນບັນຫາທາງອາລົມ
“ການບັງຄັບໃຫ້ອົດນອນເປັນໜຶ່ງໃນວິທີທີ່ດີສຳລັບການທໍລະມານຄົນ” ດຣ.Steven Feinsilver ແຫ່ງສູນພະຍາດການນອນຫລັບແຫ່ງ ໂຮງຮຽນແພດໄອຄານ ໃນນິວຢອກ ໄດ້ກ່າວເອົາໄວ້ “ແມ່ນຍັງບໍ່ມີຄຳນິຍາມທີ່ຊັດເຈນວ່າດົນເທົ່າໃດທີ່ມະນຸດສາມາດ ຢູ່ໄດ້ໂດຍບໍ່ຕ້ອງຫລັບ ເພາະມະນຸດແຕ່ລະຄົນມີຂີດຈຳກັດຂອງການອົດນອນທີ່ແຕກຕ່າງກັນໄປ ດັ່ງນັ້ນຈຶ່ງບໍ່ມີນິຍາມທີ່ເປັນສາກົນຂອງຂີດຈຳກັດການອົດນອນ ແຕ່ເຖິງຢ່າງນັ້ນເຮົາກໍສາມາດພົບໄດ້ວ່າຄົົນທີ່ນອນຫລັບຢ່າງບໍ່ພຽງພໍຈະເກີດອາການ ທີ່ຜິດປົກກະຕິໄປຈາກແຕ່່ເກົ່າ”
“ການວິໄຈໃນປີທີ່ຜ່ານມາ ສະແດງໃຫ້ເຫັນວ່າມະນຸດອາດໄດ້ຮັບຄວາມເສຍຫາຍທັງທາງຮ່າງກາຍແລະທາງຈິດໃຈ ຖ້າຫາກບໍ່ໄດ້ຮັບການນອນທີ່ພຽງພໍ” ສາດສະດາຈານ David Dinges ຜູ້ສອນວິຊາຈິດວິທະຍາໃນມະຫາວິທະຍາໄລແພນຊິເວເນຍກ່າວພວກເຂົາໄດ້ທົດລອງສຶກສາການອົດນອນ ເພື່ອຮຽນຮູ້ຄວາມເສຍຫາຍທີ່ເກີດຈາກການທີ່ບໍ່ໄດ້ນອນຫລັບ ແລະຄວາມສຳຄັນຂອງການນອນຫລັບທີ່ມີຕໍ່ສຸກຂະພາບຮ່າງກາຍແລະອາລົມ
“ເຫັນໄດ້ແຈ້ງວ່າສະໝອງຂອງເຈົ້າບໍ່ສາມາດເຮັດວຽກໄດ້ຢ່າງມີປະສິດທິພາບ ຖ້າເຈົ້າບໍ່ໄດ້ນອນ” ດຣ.Steven Feinsilver ອະທິບາຍ “ແມ່ນຈະເລັກໜ້ອຍ ແຕ່ສະໝອງຂອງເຈົ້າຈະເລີ່ມມີການເຊື່ອມຖອຍທາງປັນຍາແລະອາລົມ”
ສາດສະດາຈານ David Dinges ອະທິບາຍວ່າ “ເຮົາຈະບໍ່ສາມາດເຫັນໃບຫນ້າທີ່ມີອາລົມໃນແງ່ບວກຈາກມະນຸດ ເມື່ອພວກເຂົາຂາດການນອນຫລັບ ເຖິງແມ່ນພວກເຂົາຈະບອກວ່າມີຄວາມສຸກ ແຕ່ໃບໜ້າຂອງພວກເຂົາຈະເບິ່ງຄືກັບຄົນຂາດອາລົມນັ້ນ ພວກເຂົາຈະທົນຕໍ່ແຮງກົດດັນແລະຄວາມຜິດຫວັງໄດ້ໜ້ອຍລົງຢ່າງໃດກໍຕາມ ອາການນີ້ຈະຫາຍໄປໄດ້ເມື່ອໄດ້ຮັບການນອນຫລັບ”
ນອກຈາກນີ້ຍັງພົບວ່າອາສາສະໝັກທີ່ອົດນອນຈຳນວນໜຶ່ງຈະມີອາການວູບ ຊຶ່ງເປັນອາການທີ່ສະໝອງຈະພັກຜ່ອນຊົ່ວຄາວຄ້າຍນອນຫລັບເປັນເວລາເຖິງ 30 ວິນາທີ ຕາຂອງອາສາສະໝັກຈະປິດລົງໂດຍອັດຕະໂນມັດ ແລະໃນອາສາສະໝັກທີ່ຕາບອດ ພວກເຂົາບອກວ່າມີໄລຍະເວລາໜຶ່ງທີ່ພວກເຂົາບໍ່ຮັບຮູ້ເຖິງຫຍັງເລີຍ ສາດສະດາຈານ Dinges ແລະ ດຣ. Feinsilver ກ່າວວ່າສິ່ງນີ້ຈະເປັນອັນຕະລາຍຫລາຍໆ ໃນການຂັບຂີ່ຍານພາຫະນະ
ນອກຈາກນີ້ການອົດຫລັບອົດນອນຍັງເຮັດໃຫ້ເກີດອາການລະເມີ ແລະໃນກໍລະນີທີ່ຮຸນແຮງ ອາດກາຍເປັນການເສຍສະຕິ ຊຶ່ງປົກກະຕິແລ້ວສາມາດພົບອາການນີ້ໄດ້ໃນຜູ້ປ່ວຍທີ່ເປັນພະຍາດນອນບໍ່ຫລັບຢ່າງ ຮຸນແຮງ ແລະອາດນຳໄປສູ່ອາການເຫັນພາບຫລອນຈາກການອົດນອນແບບຊຳເຮື້ອ
ດຣ. Feinsilver ເລົ່າເຖິງປະສົບການການເຫັນພາບຫລອນຈາກການອົດນອນຂອງຕົນເອງ ເມື່ອເທື່ອປີທຳອິດທີ່ຢູ່ໃນໂຮງຮຽນແພດວ່າ “ຂ້ອຍຮູ້ຈັກມັນດີ ເພາະຕອນນັ້ນຂ້ອຍອົດຫລັບອົດນອນເຮັດວຽກໃນຫ້ອງສຸກເສີນຢ່າງຕໍ່ເນື່ອງ ຂ້ອຍເລີ່ມເຫັນຟັກທອງທີ່ຢູ່ໃນໂຮງໝໍມາເວົ້າລົມກັບຂ້ອຍ”
ສາດສະດາຈານ Dinges ໄດ້ຕັ້ງຂໍ້ສົງໄສກ່ຽວກັບການເຫັນພາບຫລອນໃນກໍລະນີນີ້ວ່າ “ມີຄຳຖາມທີ່ບໍ່ເຂົ້າໃຈຢູ່ຫລວງຫລາຍກັບອາການນີ້ທີ່ເກີດຂື້ນ ເມື່ອຢາກນອນຍັງຝືນເຮັດວຽກ ພວກເຂົາຈະເລີ່ມເຫັນພາບທີ່ສັ່ນໄຫວກວ່າເກົ່າ ແລະເຫັນແສງໄຟທັງທີ່ບໍ່ແມ່ນຄວາມຈິງ ນັ້ນແປວ່າສະໝອງຂອງພວກເຂົາບໍ່ສາມາດແປຂໍ້ມູນທີ່ໄດ້ຮັບຈາກປະສາດສຳຜັດຕ່າງໆໄດ້ ຢ່າງຊັດເຈນຄືກັບຕອນທີ່ໄດ້ພັກຜ່ອນເຕັມທີ່”
ນອກຈາກນີ້ຍັງມີການຄົ້ນພົບຈາກນັກວິໄຈວ່າການຫ້າມບໍ່ໃຫ້ນອນ ສາມາດເຮັດໃຫ້ໜູທົດລອງຕາຍໄດ້ ແລະໃນປີ 2012 ມີລາຍງານວ່າຊາຍຊາວຈີນຄົນໜຶ່ງເສຍຊີວິດຫລັງຈາກບໍ່ໄດ້ນອນຕິດຕໍ່ກັນ 11 ຄືນ ແຕ່ເຖິງແບບນັ້ນກໍເຊື່ອກັນວ່າບໍ່ແມ່ນພຽງແຕ່ການອົດນອນທີ່ເຮັດໃຫ້ພວກເຂົາຕາຍ ແຕ່ເພາະພວກເຂົາທັງກິນເຫລົ້າແລະສຸບຢາອີກດ້ວຍ
ແນ່ນອນວ່າການສຶກສາປາກົດການນີ້ໃນມະນຸດເປັນເລື່ອງຍາກ ເພາະມີເລື່ອງຂອງສິນລະທຳເຂົ້າມາກ່ຽວພັນອີກດ້ວຍ ຈຶ່ງບໍ່ສາມາດທົດລອງໄດ້ຢ່າງຈິງຈັງວ່າການອົດນອນຂ້າມະນຸດໄດ້ຫລືບໍ່
“ຂ້ອຍບໍ່ເຊື່ອວ່າຄົນເຮົາຈະຕາຍໄດ້ເພາະການອົດນອນ ເພາະເຖິງຈຸດໜຶ່ງ ເຮົາກໍຈະຝືນບໍ່ໄຫວແລະຫລັບໄປເອງ” ສາດສະດາຈານ Dinges ກ່າວ “ແຕ່ຢ່າງໃດກໍຕາມ ການອົດຫລັບອົດນອນນັ້ນເປັນອັນຕະລາຍຕໍ່ມະນຸດຫລາຍ”