ສຳນັກຂ່າວຕ່າງປະເທດ ລາຍງານໃນວັນທີ 26 ຕຸລານີ້ວ່າ ທ່ານ ຈິມມີ ຄາເຕີ້ ອະດີດປະທານາທິບໍດີ ສະຫະລັດອາເມຣິກາ ຄົນທີ 39 ໃນອາຍຸ 91 ປີ ຊຶ່ງດຳລົງຕຳແໜ່ງ ຜູ້ນຳສະຫະລັດອາເມຣິກາ ລະຫວ່າງປີ ຄສ 1977-1981 ໄດ້ອອກມາເປີດເຜີຍ ຜ່ານສື່ມວນຊົນ ໃນວັນທີ 24 ຕຸລາຜ່ານມານິ້ວ່າ ການຢຸຕິສົງຄາມກາງເມືອງໃນຊີຣີ ທີ່ລະເບີດຂຶ້ນມາແຕ່ເດືອນມີນາ 2011 ແລະ ໄດ້ເຮັດໃຫ້ມີຜູ້ເສຍຊີວິດໄປແລ້ວ ຫລາຍກ່ວາ 250,000 ຄົນນັ້ນ ຈະຕ້ອງດຳເນີນໂດຍຜ່ານການເຈລະຈາ ໂດຍທ່ານ ຈິມມີ ຄາເຕີ້ ໄດ້ລະບຸວ່າ ສັນຕິພາບໃນຊີຣີ ຈະເກີດຂຶ້ນໄດ້ ກໍຕໍ່ເມື່ອລັດຖະບານອາເມຣິກາ ຕ້ອງຍົກເລີກຄວາມຕັ້ງໃຈ ທີ່ຈະໃຊ້ກຳລັງໂຄ່ນລົ້ມ ລະບອບການປົກຄອງ ຂອງປະທານາທິບໍດີ ບາຊາ ອັນ-ອັດຊາດ ແຫ່ງ ຊີຣີ ພ້ອມທັງລະບຸວ່າ ການສະຫລະອຳນາດຂອງອັດຊາດ ຫາກຈະເກີດຂຶ້ນໄດ້ ກໍຕ້ອງເປັນໄປຢ່າງສັນຕິ ຜ່ານຊ່ອງທາງການເຈລະຈາ ແລະ ຂະບວນການປ່ຽນແປງທາງການເມືອງເທົ່ານັ້ນ.
” ສະຫະລັດອາເມຣິກາ ຈຳເປັນຕ້ອງປະຖິ້ມຈຸດຢືນເດີມຂອງຕົນ ໃນການໂຄ່ນລົ້ມລະບອບການປົກຄອງຂອງອັດຊາດ ໃນຊີຣີ ເພາະທ່າທີດັ່ງກ່າວຂອງສະຫະລັດຯ ຄືອຸປະສັກສຳຄັນ ທີ່ຂັດຂວາງຂະບວນການສ້າງສັນຕິພາບໃນຊີຣີ ໃນອານາຄົດ “ ອະດີດປະທານາທິບໍດີ ຈິມມີ້ ຄາເຕີ້ ກ່າວ.
