ສື່ອາເມລິກາຢືນຢັນ ເຈົ້າພໍ່ວິດີໂອອອນໄລນ໌ “ຍູທູບ (YouTube) ” ຈະຖະແຫລງເປີດຕົວບໍລິການສະໝັກສະມາຊິກແບບເສຍຄ່າບໍລິການຊົມວິດີໂອໃນວັນທີ່ 21 ຕຸລານີ້ ໂດຍຈະເປັນມິຕິໃໝ່ທີ່ເຮັດໃຫ້ການຊົມວິດີໂອລະດັບພີມ່ຽມເທິງ YouTube ເລີ່ມມີຄ່າບໍລິການຢ່າງເປັນທາງການ
ລາຍງານລະບຸວ່າ ຜູ້ສະໝັກບໍລິການນີ້ຈະບໍ່ຕ້ອງລຳຄານກັບໂຄສະນາເມື່ອຄລິກຊົມວິດີໂອເທິງ YouTube ຈຸດນີ້ສື່ອາເມລກາລະບຸວ່າ ເປັນບໍລິການທີ່ຈະເຮັດໃຫ້ຜູ້ສະໝັກສາມາດເປີດຊົມລາຍການລະດັບເອັກຊ໌ຄູຊີບ ສຳລັບຜູ້ທີ່ເສຍຄ່າບໍລິການເທົ່ານັ້ນ
ລາຍງານຂ່າວນີ້ເກີດຂຶ້ນຫລັງຈາກທີ່ຂ່າວລືເລື່ອງການເກັບຄ່າບໍລິການເທິງ YouTube ນັ້ນແພ່ລາມເທິງໂລກອອນໄລນ໌ມາດົນ ໂດຍກ່ອນໜ້ານີ້ YouTube ເຄີຍປະກາດເມື່ອປີທີ່ແລ້ວວ່າ ກຳລັງປະສານງານກັບກຸ່ມຜູ້ຜະລິດຄອນເທັນທີ່ໄດ້ຮັບຄວາມນິຍົມສູງເທິງ YouTube ແຕ່ກໍຍັງບໍ່ມີການເປີດຕົວບໍລິການໃໝ່ຈາກ YouTube ຢ່າງຈິງຈັງ ຈົນຫລ້າສຸດ ທີ່ສື່ອາເມລິກາໄດ້ຮັບຂໍ້ມູນຈາກແຫລ່ງຂ່າວເລື່ອງກຳນົດການຖະແຫລງຂ່າວເປີດຕົວບໍລິການ 21 ຕຸລານີ້
ຢ່າງໃດກໍຕາມ ຍັງບໍ່ມີຂໍ້ມູນລາຄາສະໝັກສະມາຊິກວິດີໂອພີມ່ຽມຂອງ YouTube ປາກົດໃນສື່ໃດໃນຂະນະນີ້ ເຊັ່ນດຽວກັບກຳນົດມື້ເປີດໃຫ້ບໍລິການທັງໃນຕະຫລາດສະຫະລັດ ແລະ ຕະຫລາດໂລກ ເບື້ອງຕົ້ນ ບໍລິການນີ້ເຄີຍຖືກວິເຄາະວ່າຈະເລີ່ມໃນປາຍເດືອນຕຸລາ ແຕ່ນັກສັງເກດການຕ່າງກັບລຳ ແລະ ເຊື່ອວ່າ YouTube ອາດເລີ່ມໃຫ້ບໍລິການໃນປີໜ້າແທນ
ເຫດທີ່ເຮັດໃຫ້ນັກວິເຄາະເຊື່ອເຊັ່ນກໍ່ຄື ໂອກາດທາງການຄ້າ ແລະການແຂ່ງຂັນ ກ່ອນໜ້ານີ້ YouTube ສະແດງທ່າທີວ່າກຳລັງພະຍາຍາມເປີດຕົວບໍລິການສະໝັກສະມາຊິກເພື່ອຊົມວິດີໂອພີມ່ຽມແບບເກັບຄ່າບໍລິການໃນລັກສະນະນີ້ມາຕັ້ງແຕ່ປີ 2011 ເທື່ອນັ້ນ YouTube ປະກາດເທເງີນທຶນຫລາຍກວ່າ 100 ລ້ານຫລຽນເພື່ອເປັນກອງທຶນໃນການຜະລິດວິດີໂອ ຊຶ່ງດາວເດັ່ນໃນວົງການບັນເທີງອະເມລິກາຢ່າງ Jay Z ແລະ Ashton Kutcher ມີສ່ວນຮ່ວມໃນກອງທຶນນີ້ດ້ວຍ ແຕ່ກອງທອນນີ້ຖືກປະເມີນວ່າລົ້ມເຫລວໂດຍບໍ່ເປີດເຜີຍສາເຫດ
ສຳລັບບໍລິການໃໝ່ ນັກວິເຄາະເບີ່ງວ່າ YouTube ກຳລັງຫັນມາລົງທຶນກັບເນັດໄອດໍຄົນທຳມະດາເທິງ YouTube ແທນ ຊຶ່ງຄາດວ່າຈະໃຫ້ຜົນລັບທີ່ດີກວ່າການລົງທຶນກັບດາລາດັ່ງຄ່າຕົວແພງຄືກັບເທື່ອທີ່ຜ່ານມາ
