ວັນທີ 15 ຕຸລາ 2015 ທີ່ຫໍວັດທະນະທຳແຫ່ງຊາດ ກະຊວງສາທາລະນະສຸກ ໄດ້ຈັດພິທີເປີດການນຳເອົາວັກຊິນກັນໂປລິໂອຊະນິດສັກ (VIP) ເຂົ້າມານຳໃຊ້ໃນ ສປປ ລາວ ໃຫ້ກຽດເຂົ້າຮ່ວມຂອງ ທ່ານ ທອງສິງ ທຳມະວົງ ນາຍົກລັດຖະມົນຕີ ທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ທ່ານ ສຈ.ດຣ. ເອກສະຫວ່າງ ວົງວິຈິດ ລັດຖະມົນຕີວ່າການກະຊວງສາທາລະນະສຸກ ການນຳພັກ-ລັດ ບັນດາທູຕານຸທູດ ແລະ ອົງການຈັດຕັ້ງສາກົນປະຈຳລາວ ພະນັກງານ-ລັດຖະກອນ ແລະ ນ້ອງນັກຮຽນເຂົ້າຮ່ວມ.
ໃນພິທີທ່ານ ດຣ. ສິນລະວົງ ຄຸດໄພທູນ ໄດ້ລາຍງານກ່ຽວກັບສະພາບການຈັດຕັ້ງປະຕິບັດ ວຽກງານການສັກຢາກັນພະຍາດຢູ່ນະຄອນຫຼວງວຽງຈັນ (ນວ) ໃນສົກປີຜ່ານມາ ແລະ ແຜນວຽກສຳຄັນໃນຕໍ່ໜ້າ ເຊິ່ງເຫັນໄດ້ວ່າ ໃນສົກປີ 2014-2015 ການສັກຢາກັນພະຍາດທຸກຊະນິດໃນຮອບປົກກະຕິ ຢູ່ ນວ ໃນນັ້ນ ອັດຕາການຢອດຢາໂປລີໂອ ຄົບ 3 ຄັ້ງ ບັນລຸໄດ້ 95% ຜົນສຳເລັດດັ່ງກ່າວ ແມ່ນຍ້ອນຫຼາຍປັດໄຈ ໃນນັ້ນ ອັນສຳຄັນແມ່ນກະຊວງສາທາລະນະສຸກ ໄດ້ເອົາໃຈໃສ່ກະຕຸກຊຸກຍູ້ ຕອບສະໜອງວັດຖຸອຸປະກອນວັກຊິນໃຫ້ຢ່າງພຽງພໍ ແພດໝໍໄດ້ມີຄວາມຕັ້ງໜ້າລົງເຄື່ອນໄຫວຮອດກຸ່ມເປົ້າໝາຍ ໃຫ້ໄດ້ເຂົ້າເຖິງການບໍລິການ ອຳນາດການປົກຄອງເມືອງ ບ້ານ ໄດ້ປຸກລະດົມຂົນຂວາຍພໍ່ແມ່ປະຊາຊົນ ເພື່ອເຂົ້າໄປຮັບການບໍລິການສັກຢາວັກຊິນຢູ່ຕາມໂຮງໝໍເມືອງ ສຸກສາລາ ແລະ ໜ່ວຍບໍລິການເຄື່ອນທີ່ຢ່າງຕັ້ງໜ້າ ພ້ອມກັນນັ້ນ ໄດ້ມີການຈັດຕັ້ງຂະບວນການວັນສັກຢາແຫ່ງຊາດ (ວສຊ) ເຊັ່ນ: ການສັກຢາກັນພະຍາດໝາກແດງໃຫຍ່ ແລະ ໝາກແດງນ້ອຍ ຂະບວນການສັກຢາປ້ອງກັນໄຂ້ສະໝອງອັກເສບຍີ່ປຸ່ນ ບັນລຸ 99% ຂະບວນການສັກຢາກັນມະເຮັງປາກມົດລູກ ໃຫ້ກັບນັກຮຽນຍິງ ຫ້ອງ ປ5 ຈຳນວນ 3 ຮອບ 7.252 ຄົນ ບັນລຸໄດ້ 100% ໄດ້ຊຸກຍູ້ຂະບວນສົ່ງເສີມສຸຂະພາບເດັກ ແທກລວງສູງ ຊັ່ງນ້ຳໜັກ ກວດສຸຂະພາບປາກ ແຂ້ວ ແຈກຢາຍວິຕາມິນອາ ແລະ ຢາຂ້າແມ່ທ້ອງໃຫ້ເດັກອາຍຸລຸ່ມ 5 ປີ ບັນລຸໄດ້ 98%.
ສຳລັບແຜນວຽກການສັກຢາກັນໂປລີໂອຊະນິດສັກ (VIP) ຢູ່ ນວ ເລີ່ມມື້ນີ້ເປັນຕົ້ນໄປຈະໄດ້ພ້ອມກັບບັນດາແຂວງໃນທົ່ວປະເທດ ຈັດກິດຈະກຳສັກຢາກັນພະຍາດໂປລີໂອຢູ່ຕາມໂຮງໝໍເມືອງ 9 ແຫ່ງ ສຸກສາລາ 41 ແຫ່ງ ແລະ ຈັດຕັ້ງໜ່ວຍແພດເຄື່ອນໄຫວໄປຍັງເຂດຫ່າງໄກສອກຫຼີກ ເພື່ອໃຫ້ປະຊາຊົນເຂົ້າເຖິງການບໍລິການໄດ້ຢ່າງທົ່ວເຖິງ.
ແຫລ່ງຂ່າວ:
