ສຳນັກຂ່າວຕ່າງປະເທດ ລາຍງານໃນວັນທີ 30 ກັນຍາຜ່ານມານີ້ວ່າ ທ່ານ ເຈຍ ເຊເຣຍ ຜູ້ອຳນວຍການທະນາຄານແຫ່ງຊາດກຳປູເຈຍ ໄດ້ອອກມາລະບຸ ອຸດສາຫະກຳກາສິໂນພາຍໃນປະເທດ ສາມາດສ້າງລາຍຮັບໄດ້ປະມານ 2 ຕື້ໂດລາຕໍ່ປີ ໂດຍຕາມຕົວເລກຂອງກະຊວງເສດຖະກິດ ແລະ ການເງິນຂອງກຳປູເຈຍ ປັດຈຸບັນທົ່ວປະເທດມີກາສິໂນເປີດໃຫ້ບໍລິການ ຈຳນວນ 59 ແຫ່ງ ໂດຍທັງໝົດແມ່ນຕັ້ງຢູ່ບໍລິເວນຊາຍແດນ ຍົກເວັ້ນພຽງກາສິໂນ NagaWorld ແຫ່ງດຽວເທົ່ານັ້ນ ທີ່ຕັ້ງຢູ່ນະຄອນຫລວງພະນົມເປັນ ຊຶ່ງທາງການອະນຸຍາດໃຫ້ເປີດບໍລິການແກ່ຊາວຕ່າງປະເທດເທົ່ານັ້ນ.
ຈາກສະຖິຕິຂອງ ກະຊວງເສດຖະກິດ ແລະ ການເງິນກຳປູເຈຍ ໄດ້ລາຍງານວ່າ ກຳປູເຈຍສາມາດເກັບອາກອນຈາກອຸດສາຫະກຳກາສິໂນ ໄດ້ຫລາຍກ່ວາ 25 ລ້ານໂດລາ ໃນປີ 2014 ຜ່ານມາ ແລະ ປະມານ 22 ລ້ານໂດລາ ໃນໄລຍະເຄິ່ງປີທຳອິດຂອງປີ 2015 ນີ້.