ເມືອງຊ່ອນ ແຂວງຫົວພັນ ໄດ້ຈັດການແຂ່ງຂັນກິລາ 3 ປະເທດ ຄື: ບານສົ່ງຊາຍ, ກະຕໍ້ຊາຍ ແລະ ເປຕັງທີມຍິງ-ຊາຍ ເພື່ອສ້າງຂະບວນການສະເຫຼີມສະຫຼອງວັນປະກາດຈົບຊັ້ນມັດທະຍົມຕອນຕົ້ນບຳລຸງທົ່ວເມືອງຢ່າງເປັນທາງການ ພ້ອມທັງເປັນການສົ່ງເສີມໃຫ້ພະນັກງານ, ທະຫານ, ຕຳຫຼວດ ແລະ ລັດຖະກອນ ພາຍໃນເມືອງ ໄດ້ອອກກຳລັງກາຍເພື່ອສຸຂະພາບໃຫ້ມີຮ່າງກາຍທີ່ແຂງແຮງ, ປອດໂປ່ງທາງດ້ານມັນສະໝອງ ແລະ ຈິດໃຈ ເພື່ອປະກອບສ່ວນເຂົ້າໃນການຈັດຕັ້ງປະຕິບັດ ວຽກງານທີ່ຂັ້ນເທິງມອບໝາຍໃຫ້ຢ່າງມີຜົນສຳເລັດເປັນກ້າວໆ.
ພິທີປິດການແຂ່ງຂັນກິລາທັງ 3 ປະເທດ ໄດ້ຈັດຂຶ້ນໃນຕອນແລງວັນທີ 22 ກັນຍາ ຜ່ານມາ ພາຍຫຼັງດຳເນີນການແຂ່ງຂັນມາຕັ້ງແຕ່ວັນທີ 16 ສິງຫາ 2015 ທີ່ສະໜາມກິລາເມືອງ, ໂດຍໃຫ້ກຽດ ເຂົ້າຮ່ວມ ແລະ ມອບລາງວັນຂອງ ທ່ານ ສິງພອນ ເລືອງຄຳມາ ເຈົ້າເມືອງຊ່ອນ ແລະ ທ່ານຮອງຫົວ ໜ້າຫ້ອງການສຶກສາທິການ ແລະ ກິລາເມືອງຊ່ອນ ພ້ອມດ້ວຍພະນັກງານ, ລັດຖະກອນ, ຄູເຝິກ ແລະ ຄະນະນັກກິລາແຕ່ລະພາກສ່ວນເຂົ້າຮ່ວມ.
ສຳລັບການແຂ່ງຂັນກິລາຄັ້ງນີ້ ປະກອມມີທັງໝົດ 3 ປະເພດ, ໃນນັ້ນກິລາບານສົ່ງຊາຍ ມີທີມເຂົ້າຮ່ວມ 6 ພາກສ່ວນ, ກະຕໍ້ຊາຍ 6 ພາກສ່ວນ, ເປຕັງຊາຍ 16 ທີມ ແລະ ເປຕັງຍິງ 8 ທີມ. ຜ່ານການແຂ່ງຂັນເປັນເວລາ 1 ເດືອນປາຍ (16 ສິງຫາ – 22 ກັນຍາ 2015) ຜົນປາກົດວ່າ ກິລາບານສົ່ງຊາຍ ອັນດັບ 1 ໄດ້ແກ່ ທີມກອງຮ້ອຍ 15 (ທະຫານແຂວງຫົວພັນ ທີ່ມາປະຈຳການຢູ່ ເມືອງຊ່ອນ) ແລະ ອັນດັບ 2 ທີມຫ້ອງການສຶກສາທິການ ແລະ ກິລາເມືອງຊ່ອນ; ກິລາກະຕໍ້ ອັນດັບ 1 ຕົກເປັນຂອງ ທີມຊາວໜຸ່ມຂົງເຂດການເມືອງຂອງເມືອງຊ່ອນ ແລະ ອັນດັບທີ 2 ທີມກອງຮ້ອຍ 15; ກິລາເປຕັງຊາຍ ອັນດັບ 1 ໄດ້ແກ່ ທີມຫ້ອງການສຶກສາທິການ ແລະ ກິລາເມືອງຊ່ອນ ແລະ ອັນດັບ 2 ແມ່ນ ທີມກອງຮ້ອຍ 15; ກິລາເປຕັງຍິງ ອັບດັບ 1 ຕົກເປັນຂອງທີມຫ້ອງການກະສິກຳ ແລະ ປ່າໄມ້ເມືອງຊ່ອນ ແລະ ອັນດັບ 2 ແມ່ນທີມກອງບັນຊາການປ້ອງກັນຄວາມສະຫງົບເມືອງ.
