ພະນະທ່ານປະທານປະເທດ ຈູມມາລີ ໄຊຍະສອນ ໄດ້ຕ້ອນຮັບການເຂົ້າຢ້ຽມຂ່ຳນັບ ແລະ ຍື່ນສານຕາຕັ້ງຈາກບັນດາທູດປະເທດເພື່ອນມິດ ໃນໂອກາດທີ່ເດີນທາງເຂົ້າມາເປັນທູດຄົນໃໝ່ ປະຈຳ ສປປ ລາວ ຊຶ່ງພິທີດັ່ງກ່າວ ຈັດຂຶ້ນໃນຕອນເຊົ້າຂອງວັນທີ 7 ພະຈິກ 2013 ທີ່ທຳນຽບປະທານປະເທດ.
ບັນດາທູດທີ່ໄດ້ເຂົ້າຍື່ນສານຕາຕັ້ງ ປະກອບມີທ່ານເອກອັກຄະລາຊະທູດແຫ່ງ ປະເທດຍີ່ປຸ່ນ ຮິໂຣຢູກິ ກິຊິໂນະ ທ່ານເອກອັກຄະລັດຖະທູດແຫ່ງສະຫະລັດອາເມລິກາ ປະຈຳ ສປປ ລາວ ເດນ້ຽວ ຄຼັນ (Daniei A clune) ທ່ານເອກອັກຄະລັດຖະທູດແຫ່ງ ປະເທດແຟງລັງ ນາງ ເຄິສຕີ ເວສຟາແລນ (Kirsti Westphalen) ແລະ ທ່ານເອກອັກຄະລັດຖະທູດແຫ່ງອີຕາລີ ຟຣານເຊສໂກ ຊາເວຣິໂອ ນີຊີໂອ (Francesco Saverio NISIO).
ໂອກາດດັ່ງກ່າວ ພະນະທ່ານປະທານປະເທດ ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງສະແດງຄວາມຊົມເຊີຍທີ່ບັນດາທູດ ໄດ້ເຂົ້າມາເຮັດໜ້າທີ່ປະຈຳ ສປປ ລາວ ຊຶ່ງຈະເປັນການປະກອບສ່ວນ ເຂົ້າໃນການເສີມສ້າງສາຍພົວພັນລະຫວ່າງ ສປປ ລາວ ແລະ 4 ປະເທດດັ່ງກ່າວທີ່ມີຢູ່ແລ້ວນັ້ນ ໃຫ້ໄດ້ຮັບການຂະຫຍາຍຕົວຢ່າງຕໍ່ເນື່ອງ ໂດຍສະເພາະແມ່ນການລະດົມທຶນຊ່ວຍເຫຼືອ ການດຶງດູດນັກລົງທຶນ ແລະ ອື່ນໆ ປະກອບສ່ວນເຂົ້າໃນການພັດທະນາເສດຖະກິດກິດ-ສັງຄົມຂອງ ສປປ ລາວ ໃຫ້ນັບມື້ມີການເຕີບໃຫຍ່ຂະຫຍາຍຕົວເປັນກ້າວໆ.
ສຳລັບສຳນັກງານສະຖານທູດແຟັງລັງ ແລະ ທູດອີຕາລີ ປະຈຳ ສປປ ລາວ ແມ່ນຕັ້ງຢູ່ບາງກອກ ປະເທດໄທ ສ່ວນສຳນັກງານສະຖານທູດຍີ່ປຸ່ນ ແລະ ສະຫະລັດອາເມລິກາ ແມ່ນຕັ້ງຢູ່ ສປປ ລາວ.
ສ່ວນໃນຕອນບ່າຍ ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ຟຣານເຊສໂກ ຊາເວຣິໂອ ນີຊີໂອ ເອກອັກຄະລັດຖະທູດແຫ່ງອີຕາລີ ແລະ ໃນເວລາຕໍ່ມາ ທີ່ກະຊວງການຕ່າງປະເທດ ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ກໍໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ຟຣານເຊສໂກ ຊາເວຣິໂອ ນີຊີໂອ.