ຂປລ.ເມື່ອບໍ່ດົນມານີ້, ເມືອງຈໍາພອນ ໄດ້ຈັດງານບຸນປະເພນີແຂ່ງຂັນຊ່ວງເຮືອຂຶ້ນ ເນື່ອງໃນໂອກາດວັນບຸນຫໍ່ເຂົ້າປະດັບດິນ ໃຫ້ກຽດເຂົ້າຮ່ວມເປັນປະທານໂດຍ ທ່ານ ສົມສະຫວາດ ເລັ່ງສະຫວັດ ຮອງນາຍຍົກລັດຖະມົນຕີ, ມີ ທ່ານ ດຣ ສຸພັນ ແກ້ວມີໄຊ ເຈົ້າແຂວງສະຫວັນນະເຂດ ພ້ອມດ້ວຍການນຳຂອງແຂວງ, ເມືອງ ຕະຫລອດເຖິງບັນດານັກທຸລະກິດ, ນັກທ່ອງທ່ຽວພາຍເມືອງຈຳພອນ ແລະ ເມືອງອ້ອມຂ້າງ ກໍ່ຄືປະຊາຊົນຊາວແຂວງ ສະຫວັນນະ ເຂດເຂົ້າ ຮ່ວມຢ່າງຫລວງຫລາຍ.ໃນພິທີທ່ານ ສີສະຫວັດ ອິນສີຊຽງໃໝ່ ປະທານແນວລາວສ້າງຊາດເມືອງ ທັງເປັນປະທານຈັດຕັ້ງແຂ່ງຂັນ ໄດ້ຂຶ້ນກ່າວລາຍງານສະພາບການກະກຽມການແຂ່ງຂັນ ເຊິ່ງໃຫ້ຮູ້ວ່າ: ສຳລັບການແຂ່ງຂັນເຮືອ ຊ່ວງ ຄັ້ງນີ້, ລວມມີ 2 ປະເພດຄື ປະເພດເຮືອ 28-30 ສີພາຍ ແລະ ເຮືອ10-12 ສີພາຍ, ລວມມີເຮືອເຂົ້າຮ່ວມແຂ່ງຂັນທັງໝົດ 28 ລຳ ເຊິ່ງມາຈາກເມືອງຈຳພອນເຈົ້າພາບ ແລະ ບັນດາເມືອງອ້ອມຂ້າງ. ການແຂ່ງຂັນໄດ້ດຳເນີນໄປດ້ວຍບັນ ຍາກາດຟົດຟື້ນມ່ວນຊື່ນ ແລະ ຜ່ານການແຂ່ງຂັນກັນຢ່າງດຸເດືອດສູສີປາກົດວ່າ: ປະເພດ 28-30 ສີພາຍ ແມ່ນເຮືອສາວງາມດົງມົດ ຈາກບ້ານຫົວເມືອງ ເມືອງຈຳພອນ ເຈົ້າພາບລອຍລຳມາເປັນອັນດັບໜຶ່ງ ໄດ້ຮັບລາງວັນເງິນສົດ 5 ລ້ານກີບ ພ້ອມຂັນເງິນ 1 ໜ່ວຍ, ຮອງແຊ໋ມແມ່ນ ເຮືອງນາງເກດແກ້ວສີເມືອງຊົນ ມາຈາກບ້ານຊຽງຮົມ ເມືອງຊົນນະບູລີ.ຂະນະທີ່ເຮືອປະເພດ 10-12 ສີພາຍ ອັນດັບ 1 ໄດ້ແກ່: ເຮືອບໍລິສັດໄກ່ຄຳ ມາຈາກບ້ານນາຄູ ເມືອງຈຳພອນ ໄດ້ຮັບລາງວັນເງິນສົດ 2.500.000 ກີບ ພ້ອມຂັນເງິນ 1 ໜ່ວຍ, ອັນດັບ2 ເຮືອສາວຄຳໂພສີ ມາຈາກບ້ານທ່າຂາມລຽນ ເມືອງສອງຄອນ. ຈາກນີ້ ກໍ່ຍັງມີລາງວັນອື່ນໆນຳອີກ ເປັນກຽດມອບລາງວັນຄັ້ງນີ້ ໂດຍ ທ່ານ ສີທົນ ນັນທະລາດ ເຈົ້າເມືອງຈຳພອນ.
ແຫລ່ງຂ່າວ:
