ໃນໄລຍະຢ້ຽມຢາມແຂວງສະຫວັນນະເຂດ ເມື່ອວັນທີ 12 ກັນຍານີ້, ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ໄດ້ລົງຕິດຕາມຄວາມຄືບໜ້າຂອງການກໍ່ສ້າງໂຄງການຊົນລະປະທານຫ້ວຍພະແລງ ເມືອງຈຳພອນ ແຂວງສະຫວັນນະເຂດ ເຊິ່ງເປັນໂຄງການຊົນລະປະທານຂະໜາດໃຫຍ່ທີ່ມີມູນ ຄ່າການລົງທຶນຫລາຍກວ່າ 200 ຕື້ກີບ, ມາຮອດປັດຈຸບັນສຳເລັດແລ້ວຫລາຍກວ່າ 30% ພາຍຫລັງດຳ ເນີນມາແຕ່ປີ 2012.
ໂຄງການຊົນລະປະທານແຫ່ງນີ້ມີເນື້ອທີ່ອ່າງໂຕ່ງປະມານ 45 ກິໂລຕາແມັດ, ປະກອບມີຄອງ ເໝືອງແມ່ຍາວ 16 ກິໂລແມັດ ແລະ ຄອງເໝືອງຊອຍລະດັບຂັ້ນສອງ ແລະຂັ້ນສາມ ພ້ອມຄອງລະ ບາຍນ້ຳຍາວປະມານ 62 ກິໂລ ແມັດ, ຄາດວ່າຈະສະໜອງນ້ຳໃຫ້ແກ່ການຜະລິດເຂົ້ານາປີໄດ້ຫລາຍກວ່າ 2.000 ເຮັກຕາ, ນາແຊງ ແລະ ເນື້ອທີ່ປູກພືດລະດູແລ້ງຢ່າງລະ 1.000 ເຮັກຕາ ທີ່ກວມເອົາ 7 ບ້ານຂອງເມືອງດັ່ງກ່າວ.
ໃນໂອກາດນີ້, ທ່ານຮອງນາຍົກ ກໍໄດ້ແນະນຳໃຫ້ຄະນະຮັບຜິດຊອບໂຄງການແລະ ອຳນາດ ການປົກຄອງທ້ອງຖິ່ນເບິ່ງຄືນການນຳໃຊ້ນ້ຳຈາກໂຄງການຊົນລະປະທານດັ່ງກ່າວໃຫ້ເກີດປະໂຫຍດສູງສຸດ, ຖ້າຍັງມີຄວາມອາດສາມາດກໍໃຫ້ທ້ອງຖິ່ນລົງທຶນບຸກເບີກເນື້ອທີ່ການຜະລິດຕື່ມອີກ. ພ້ອມນັ້ນ, ທ່ານຮອງນາຍົກ ຍັງໄດ້ຢ້ຽມຢາມໂຄງ ການສຳຫລວດ ແລະ ສຶກສາຄວາມເປັນໄປໄດ້ໃນການກໍ່ສ້າງຊົນ ລະປະທານຫ້ວຍສົ້ມປ່ອຍທີ່ບ້ານສົມສະອາດ ເມືອງໄກສອນ ພົມວິຫານ, ຖ້າສາມາດກໍ່ສ້າງໄດ້ກໍຈະ ເປັນໂຄງການໜຶ່ງທີ່ສຳຄັນເພື່ອສະໜອງນ້ຳໃຫ້ແກ່ເນື້ອທີ່ການຜະລິດໄດ້ແຕ່ 2.000-3.000 ເຮັກຕາ. ແຕ່ເຖິງຢ່າງໃດ, ທ່ານຮອງນາຍົກກໍໄດ້ແນະນຳໃຫ້ຜູ້ສຳຫລວດເອົາໃຈໃສ່ສຶກສາລະອຽດ ເພື່ອຫລີກ ເວັ້ນຜົນກະທົບຕໍ່ສິ່ງແວດລ້ອມແລະ ສັງຄົມ. ພ້ອມນັ້ນ ກໍໃຫ້ເອົາໃຈໃສ່ຕໍ່ເງື່ອນໄຂ ແລະ ຄວາມອາດ ສາມາດບຸກເບີກເນື້ອທີ່ການຜະລິດຂອງປະຊາຊົນເພື່ອສາມາດຮອງຮັບການສະໜອງນ້ຳຂອງຊົນລະປະ ທານດັ່ງກ່າວມີປະສິດທິພາບສູງສຸດ.
ແຫລ່ງຂ່າວ:
