ສຳລັບ  iPhone 6S ແລະ  iPhone 6S Plus ທີ່​ເປີດ​ຕົວ​ຢ່າງ​ຍິ່ງ​ໃຫຍ່​ໄປ​ເມື່ອ​ວັນທີ່ 9 ກັນຍາ 2015 ທີ່​ຜ່ານມາ ສ້າງ​ຄວາມ​ຕື່ນ​ຕາ​ຕື່ນ​ໃຈ​ໃຫ້​ກັບ ສາວົກ iPhone ຢ່າງ​ຫລວງຫລາຍ​ເລີຍ​ ໂດຍ​ສະເພາະ​ຟັງຊັ່ນໃໝ່​ແກະ​ກ່ອງ​ຢ່າງ Force Touch, 3D Touch, ກ້ອງ​ຖ່າຍ​ຮູບ​ອັບ​ເກດ​ໃໝ່ ລວມ​ໄປ​ເຖິງ​ສີ​ສັນ​ໃໝ່​ຢ່າງ ສີ​ຊົມ​ພູ Rose Gold ຊຶ່ງ​ໃນ​ຂະນະ​ທີ່ ສາວົກ iPhone ກຳ​ລັງ​ຕື່ນຕາຢູ່ນັ້ນ ຝັ່ງ​ຂອງ ຜູ້​ໃຊ້ Android ຕ່າງ​ເສີຍໆ ກັບ​ຟັງຊັ່ນ​ເຫລົ່າ​ນີ້ ເນື່ອງ​ຈາກ​ຟັງຊັ່ນ​ບາງຢ່າງ ມີ​ໃຫ້​ໃຊ້​ເທິງ ມື​ຖື Android ມາ​ດົນ​ແລ້ວ​ນັ້ນ​ເອງ ມາ​ເບິ່ງ​ກັນ​ດີກວ່າ​ວ່າ ຂອງ​ໃໝ່​ເທິງ iPhone 6S ມີ​ຫຍັງ​ທີ່​ເປັນ​ຂອງ​ເກົ່າ​ເທິງ Android

ຮອງ​ຮັບ​ການ​ຖ່າຍ​ຄລິບ​ວີ​ດີ​ໂອ​ຄວາມ​ລະອຽດ 4K

ທັງ iPhone 6S ແລະ iPhone 6S Plus ນອກ​ຈາກ​ຈະ​ມາ​ພ້ອມ​ກັບ ກ້ອງ​ດ້ານ​ຫລັງ ຄວາມ​ລະອຽດ 12 ລ້ານ​ພິກ​ເຊລ​ແລ້ວ ຍັງ​ເປັນ​ເທື່ອ​ທຳອິດ​ທີ່​ສາມາດ​ຮອງ​ຮັບ​ການ​ຖ່າຍ​ຄລິບ​ວີ​ດີ​ໂອ ຄວາມ​ລະອຽດ​ລະ​ດັບ 4K ອີກ​ດ້ວຍ ສ່ວນ ມື​ຖື Android ຕ້ອງ​ບອກວ່າ ສາມາດ​ຖ່າຍ​ຄລິິບ​ວີ​ດີ​ໂອ ຄວາມ​ລະອຽດ​ລະ​ດັບ 4K ໄດ້​ມາ​ດົນ​ພໍ​ສົມຄວນ​ແລ້ວ ຊຶ່ງ​ຟັງຊັ່ນ​ນີ້ ມີ​ໃຫ້​ເລືອກ​ກັນ​ກວ່າ 30 ລຸ້ນ​ເລີຍ

ໄຟ​ແຟັດ​ທີ່​ກ້ອງ​ດ້ານ​ໜ້າ

ນອກ​ຈາກ​ຈະ​ປັບປຸງ​ກ້ອງ​ດ້ານ​ຫລັງ​ແລ້ວ ໃນ​ສ່ວນ​ຂອງ​ກ້ອງ​ດ້ານ​ໜ້າ ໄດ້​ປັບ​ຄວາມ​ລະອຽດ​ຈາກ​ເກົ່າ 1.2 ລ້ານ​ພິກ​ເຊລ ເປັນ 5 ລ້ານ​ພິກ​ເຊລ ອີກ​ທັງ​ຍັງ​ມາ​ພ້ອມ​ກັບ ໄຟ​ແຟັດ​ທີ່​ກ້ອງ​ດ້ານ​ໜ້າ ທີ່​ທາງ ແອບ​ເປີນ ເອີ້ນວ່າ Retina Flash ຊຶ່ງ​ຈະ​ໃຊ້​ການ​ກະພິບ​ຂອງ​ໜ້າ​ຈໍ​ເປັນ​ແຟັດ ເພື່ອ​ຊ່ວຍ​ເພີ່ມ​ແສງ​ສະຫວ່າງ​ຂະນະ​ຖ່າຍ​ຮູບ​ນັ້ນ​ເອງ

ແຕ່​ເທິງ ມື​ຖື Android ບາງ​ລຸ້ນ ກໍ​ມາ​ພ້ອມ​ກັບ​ໄຟ​ແຟັດ​ທີ່​ກ້ອງ​ດ້ານ​ໜ້າ​ແລ້ວ​ເຊັ່ນ​ກັນ ຢ່າງ​ເຊັ່ນ Samsung Galaxy J7 ເປັນ​ຕົ້ນ

ບໍ​ດີ້​ແບບ ອະ​ລູ​ມິ​ນຽ່ມ​ອັນ​ລອຍ ເກດ 7000

ຫລັງ​ຈາກ​ທີ່​ເກີດ​ກະ​ແສ Bendgate ເທິງ iPhone 6 ເມື່ອ​ປີ​ທີ່​ຜ່ານມາ ເຮັດໃຫ້​ໃນ​ປີ​ນີ້ ແອບ​ເປີນ ຕັດ​ສິນ​ໃຈ​ປ່ຽນ​ວັດ​ຖຸ​ທີ່​ໃຊ້​ຜະລິດ​ຕົວ​ເຄື່ອງ iPhone 6S ແລະ iPhone 6S Plus ໃໝ່ ເປັນ​ບໍ​ດີ້​ແບບ ອະ​ລູ​ມິ​ນຽ່ມ​ອັນ​ລອຍ ເກດ 7000 ຊຶ່ງ​ໃຊ້​ກັນ​ຫລາຍ​ໃນ​ອຸດສາຫະກຳ​ເຄື່ອງ​ບິນ

ແຕ່​ສຳລັບ ມື​ຖື Android ລຸ້ນ​ທຳອິດ​ທີ່​ປ່ຽນ​ມາ​ໃຊ້ ວັດ​ຖຸຕົວ​ເຄື່ອງ​ແບບ ອະ​ລູ​ມິ​ນຽ່ມ​ອັນ​ລອຍ ເກດ 7000 ນັ້ນ​ກໍ​ຄື Samsung Galaxy S6 edge+ ຊຶ່ງ​ເປີດ​ຕົວ​ໄປ​ເມື່ອ​ບໍ່ດົນມານີ້

ຫນ່ວຍ​ຄວາມ​ຈຳ RAM ຂະໜາດ 2 GB

ປົກກະຕິ​ແລ້ວ ສະ​ເປັກ​ຂອງ iPhone ແຕ່​ລະ​ລຸ້ນ ທາງ​ແອບ​ເປີນ​ມັກ​ຈະ​ບໍ່​ຄ່ອຍ​ກ່າວເຖິງ ຫນ່ວຍ​ຄວາມ​ຈຳ RAM ປານໃດ ເນື່ອງ​ຈາກ​ບໍ່​ຄ່ອຍ​ເນັ້ນ​ຂາ​ຍສະ​ເປັກ​ຄື​ກັບ ມື​ຖື​ລຸ້ນ​ອື່ນໆ ແຕ່​ຈາກ​ຂໍ້​ມູນ​ເທິງ Xcode ທີ່​ນັກ​ພັດທະນາ iOS ລາຍ​ໜຶ່ງ ໄດ້​ຄົ້ນ​ພົບ​ຫລ້າ​ສຸດ ເຜີຍ​ວ່າ ທັງ iPhone 6S ແລະ iPhone 6S Plus ມາ​ພ້ອມ​ກັບ​ຫນ່ວຍ​ຄວາມ​ຈຳ RAM ຂະໜາດ 2 GB ແລ້ວ ທີ່​ເອີ້ນ​ໄດ້​ວ່າ ໜ້າ​ຈະ​ສ້າງ​ຄວາມ​ດີ​ໃຈ​ໃຫ້​ກັບ ສາວົກ iPhone ບໍ່​ນ້ອຍ

ສ່ວນ​ຝັ່ງ Android ລຸ້ນ​ປະຈຸບັນ ມາ​ພ້ອມ​ກັບ​ຫນ່ວຍ​ຄວາມ​ຈຳ RAM ເຖິງ 4 GB ຈຶ່ງ​ຖື​ວ່າ ບໍ່ແມ່ນ​ເລື່ອງ​ທີ່​ໜ້າ​ຕື່ນ​ເຕັ້ນ​ປານໃດ