ທີມຊາດລາວຊຸດໃຫຍ່ພ້ອມເຕັມຮ້ອຍໃນການລົງນັດທີ 4 ພົບກັບທີມຊາດຄູເວດ ໃນການແຂ່ງຂັນບານໂລກ 2018 ຮອບຄັດເລືອກ ໂຊນອາຊີ ກຸ່ມ G ໃນຕອນແລງມື້ນີ້ (8 ກັນຍາ).
ຂະນະທີ່ ຄູເຝິກຊາວ ອັງກິດຂອງທີມຊາດລາວ ເຊີນຊວນແຟນບານລາວທົ່ວປະເທດ ເຂົ້າຮ່ວມເປັນກຳລັງໃຈເຊຍນັກເຕະລາວສູ້ຢ່າງສຸດຂີດເພື່ອຄວ້າໄຊຊະນະ.
ເມື່ອວັນທີ 7 ກັນຍາ ຜ່ານມາ ທີ່ໂຮງແຮມ ແລນມາກ ແມ່ຂອງ ລີເວີໄຊ ນະຄອນຫຼວງວຽງຈັນ ໄດ້ມີພິທີຖະແຫຼງຂ່າວການແຂ່ງຂັນບານໂລກ 2018 ຮອບຄັດເລືອກ ໂຊນອາຊີ ກຸ່ມ G ນັດລະຫວ່າງ ທີມຊາດລາວ ພົບກັບ ທີມຊາດຄູເວດ ໃນວັນທີ 8 ກັນຍາ 2015 ເວລາ 18:00 ໂມງ ທີ່ສະໜາມກິລາແຫ່ງຊາດ (ຫຼັກ 16) ນະຄອນຫຼວງວຽງຈັນ.
ໂດຍມີ ທ່ານ ສະຕິບ ດາບີ ຄູເຝິກຊາວອັງກິດຂອງທີມຊາດລາວ ແລະ ທ່ານ ໂນບີລ ມູລອລ ຄູເຝິກຂອງທີມຊາດຄູເວດ ພ້ອມດ້ວຍຜູ້ຮັບຜິດຊອບຈັດການແຂ່ງຂັນ, ນັກກິລາທັງ 2 ຝ່າຍ ແລະ ສື່ມວນຊົນ ເຂົ້າຮ່ວມ.
ໂອກາດດັ່ງກ່າວ ທ່ານ ສະຕິບ ດາບີ ກໍ່ໄດ້ກ່າວເຖິງເກມນັດທີ່ຈະພົບກັບ ທີມຊາດຄູເວດ ໃນຕອນແລງມື້ນີ້ ວ່າເປັນນັດທີ່ສຳຄັນອີກນັດໜຶ່ງ ບໍ່ຕ່າງຫຍັງກັບນັດທີ່ຜ່ານມາ ແລະ ໃນຕອນນີ້ ນັກກິລາພວກເຮົາແມ່ນພ້ອມເຕັມຮ້ອຍທຸກຢ່າງແລ້ວ ຫຼັງຈາກມາຟື້ນຟູສະພາບຈິດໃຈ ແລະ ຮ່າງກາຍຈາກນັດທີ່ເສຍ ທີມຊາດ ສ ເກົາຫຼີ 0-8 ປະຕູ.
ຢ່າງໃດກໍ່ຕາມ, ການທີ່ທີມຊາດລາວ ໄດ້ພົບກັບທີມທີ່ມີນັກກິລາລະດັບອາຊີບ ຈະເຮັດໃຫ້ນັກກິລາລາວ ມີປະສົບການຂຶ້ນຕື່ມ.
ສະນັ້ນ ໃນມື້ນີ້ຢາກເຊີນຊວນປະຊາຊົນ ກໍ່ຄືແຟນບານລາວທົ່ວປະເທດ ເຂົ້າຮ່ວມເປັນກຳລັງໃຈເຊຍນັກເຕະລາວ ເພື່ອໃຫ້ສາມາດຄວ້າໄຊຊະນະໄດ້ໃນນັດນີ້.
ພ້ອມດຽວກັນນັ້ນ, ທ້າວ ຄໍາແພງ ໄຊຍະວຸດທິ ກອງໜ້າປ້າຍແດງສະໂມສອນ ລ້ານຊ້າງ ຢູໄນເຕັດ ຂອງທີມຊາດລາວ ກໍ່ໄດ້ກ່າວວ່າ : “ ຕອນນີ້ພວກເຮົາ ພ້ອມທີ່ຈະສູ້ສຸດຄວາມສາມາດ ສ່ວນເລື່ອງທີ່ຈະຍິງໄດ້ ຫຼື ບໍ່ໄດ້ນັ້ນ ແມ່ນຂຶ້ນກັບເກມໃນມື້ນີ້. ສະນັ້ນ, ຢາກໃຫ້ອ້າຍນ້ອງນັກກິລາລາວເຮົາທຸກຄົນຈົ່ງລືມຝັນຮ້າຍນັດທີ່ຜ່ານມາ ແລະ ມາຕັ້ງໜ້າສູ້ກັນໃໝ່ໃນນັດຕໍ່ໄປ”.
ຂະນະທີ່, ທ່ານ ໂນບີລ ມູລອລ ຄູເຝິກຂອງທີມຊາດຄູເວດ ກໍ່ໄດ້ກ່າວວ່າ : “ ທີມພວກເຮົາ ກໍ່ບໍ່ຄ່ອຍມີເວລາຫຼາຍ ໄດ້ເຝິກຊ້ອມຮ່ວມກັນບໍ່ເຖິງເດືອນ. ແຕ່ຢ່າງໃດກໍ່ຕາມ, ໃນນັດນີ້ ກໍ່ຈະບໍ່ປະໝາດທີມຊາດລາວ ແລະ ພວກເຮົາຈະສູ້ເຕັມທີ່ຄືກັນກັບນັດທີ່ຜ່ານມາ. ສ່ວນການວາງຕົວນັກກິລານັ້ນ ແນ່ນອນພວກເຮົາຈະຕ້ອງຈັດໃຫ້ເໝາະສົມ ແລະ ໃຫ້ໄດ້ໄຊຊະນະທຸກໆນັດ ບໍ່ວ່າຈະເປັນທີມໃດກໍ່ຕາມ”.
ສ່ວນ ຜົນງານທີ່ຜ່ານມາ ຂອງທີມຊາດລາວ ຊຸດໃຫຍ່ ໃນລາຍການນີ້ ສະເໝີ ມຽນມາ 2-2 ປະຕູ , ເສຍ ເລບານອນ 0-2 ປະຕູ ແລະ ສ ເກົາຫຼີ 0-8 ປະຕູ ຕາມລຳດັບ. ສະຫຼຸບອັນດັບຕາຕະລາງຄະແນນ ອັນດັບ 1 ຄູເວດ ມີ 6 ຄະແນນ, ອັນດັບ 2 ສ ເກົາຫຼີ ມີ 6 ຄະແນນ, ອັນດັບ 3 ເລບານອນ ມີ 3 ຄະແນນ, ອັນດັບ 4 ທີມຊາດລາວ ມີ 1 ຄະແນນ ແລະ ອັນດັບທີ 5 ທີມຊາດມຽນມາ 1 ຄະແນນ.
ສຳລັບ ຕາຕະລາງແຂ່ງຂັນນັດຕໍ່ໄປຂອງທີມຊາດລາວ ໃນວັນທີ 13 ຕຸລາ 2015 ພົບກັບ ມຽນມາ (ບໍ່ລະບຸສະໜາມ ແລະ ເວລາ ເຈົ້າບ້ານຂອງມຽນມາ), ໃນວັນທີ 12 ພະຈິກ 2015 ພົບກັບ ເລບານອນ ທີ່ສະໜາມກິລາຄາມິລເລ ຊາມຸນ ເລບານອນ ເວລາ 17:00 ໂມງ, ໃນວັນທີ 17 ພະຈິກ 2015 ພົບກັບ ສ ເກົາຫຼີ ທີ່ສະໜາມກິລາແຫ່ງຊາດ (ຫຼັກ16) ສປປ ລາວ ເວລາ 18:00 ໂມງ ແລະ ໃນວັນທີ 24 ມີນາ 2016 ພົບກັບ ຄູເວດ ທີ່ສະໜາມກິລາອາ-ຮາມາດິ ຄູເວດ ເວລາ18:35 ໂມງ