ເປັນອັນວ່າ ໃກ້ຈະອາວະ ສານລົງແລ້ວ ສຳລັບການແຂ່ງຂັນບານເຕະເຍົາວະຊົນ ຮຸ່ນ ອາຍບໍ່ເກີນ 19 ປີ ຊີງແຊ້ມ ອາຊຽນ ຫຼື AFF Championship 2015 ທີ່ ສປປ ລາວ ເປັນເຈົ້າພາບ ແລະ ກໍ່ເປັນ ໄປຕາມຄວາມຄາດໝາຍ ເຊິ່ງ ຖືວ່າ ເປັນຍຸກສຸດຍອດຂອງທັງ 2 ຊາດນີ້ເລີຍກໍ່ວ່າໄດ້ ບໍ່ວ່າ ຈະເປັນການແຂ່ງຂັນບານເຕະ ລາຍການໃດກໍ່ຕາມໃນອາຊຽນ ເຊັ່ນ: ກິລາ ຊີເກມ, ຊູຊູກິ ຄັບ ລວມເຖິງ AFF ຢູ-16 ແລະ ຢູ-19 ຄູ່ຊີງຊະນະເລີດກໍ່ໜີບໍ່ພົ້ນ ທີມຊາດໄທກັບທີມຊາດຫວຽດນາມ ເຊິ່ງມີໜ້ອຍຄັ້ງທີ່ຈະມີທີມຊາດອື່ນທີ່ຜ່ານເຂົ້າມາເຖິງຮອບນີ້ໄດ້.
ເກມຮອບຊີງຊະນະເລີດ ທີ່ຈະລົງແຂ່ງຂັນໃນຕອນແລງມື້ນີ້ (ວັນທີ 4 ກັນຍາ) ເວລາ 19:00 ໂມງ ລະຫວ່າງ ຢູ-19 ທີມຊາດຫວຽດນາມ ຮອງ ແຊ້ມເກົ່າ 2 ປີຊ້ອນ (2013 ແລະ 2014) ແລະ ອະດີດ ແຊ້ມ ປີ 2007 ພົບກັບ ຢູ-19ທີມຊາດໄທ ອະດີດແຊ້ມ 3 ສະໄໝ (2002, 2009 ແລະ 2011) ຖືໄດ້ວ່າ ເປັນ ຄູ່ຊີງທີ່ສົມສັກສີ ແລະ ເປັນ ຄູ່ປັບຕະຫຼອດໃນວົງການບານເຕະອາຊຽນ ເຊິ່ງສະຖິຕິການພົບກັນຂອງທັງ 2 ທີມໃນລາຍ ການນີ້ 6 ຄັ້ງ ທີມຊາດໄທ ດີ ກວ່າເລັກນ້ອຍ ໂດຍທີມຊາດ ໄທ ຊະນະ 2 , ເສຍ 1 ແລະ ສະເໝີ 3 ນັດ ຄື: ປີ 2002 ທີ່ປະເທດໄທ ແລະ ກຳປູເຈຍ ເປັນເຈົ້າພາບຮ່ວມ ໄທ ເອົາຊະນະ ຫວຽດນາມ ຫວຸດຫວິດ 3-2 ໃນຮອບ 4 ທີມ ຕໍ່ມາໃນ ປີ 2006 ທີ່ປະເທດມາເລເຊຍ ເປັນເຈົ້າພາບ ໄທ ກໍ່ສາມາດເອົາ ຊະນະ ຫວຽດນາມ ໄປໄດ້ອີກ 2-1 ແຕ່ໃນຄັ້ງນັ້ນ ມີພຽງ 4 ທີມເຂົ້າຮ່ວມ ຄື: ມາເລເຊຍ ເຈົ້າພາບ, ອອສເຕຣເລຍ, ໄທ ແລະ ຫວຽດນາມ ແຂ່ງແບບ ພົບກັນໝົດ. ປີ 2007 ທີ່ ສສ ຫວຽດນາມ ເປັນເຈົ້າພາບ ທັງ 2 ທີມສະເໝີກັນ 1-1 ໃນ ຮອບແບ່ງກຸ່ມ A ແລະ ປີ 2010 ໃນຮອບແບ່ງກຸ່ມ ກຸ່ມ B ທັງ 2 ທີມກໍ່ສະເໝີກັນອີກ 1-1 ປະຕູ ສ່ວນປີ 2011 ທີ່ ປະເທດມຽນມາ ເປັນເຈົ້າພາບ ຮອບຊີງຊະນະເລີດ ຫວຽດນາມ ໄລ່ຕີສະເໝີ ໄທ 1-1 ກ່ອນຈະພາດທ່າໃຫ້ ໄທ ໃນການຍິງຈຸດໂທດ 4-5 ປະຕູ ແລະ ຄັ້ງຫຼ້າສຸດທີ່ພົບກັນ ປີ 2013 ທີ່ປະເທດອິນໂດເນເຊຍ ຫວຽດນາມ ສາມາດເອົາຊະນະ ໄທ ຫວຸດຫວິດ 3-2 ໃນຮອບ ແບ່ງກຸ່ມ ກຸ່ມ B ພ້ອມສົ່ງ ໄທ ຕົກຮອບແບ່ງກຸ່ມ.
ສຳລັບເສັ້ນທາງສູ່ຮອບຊີງ ຊະນະເລີດຂອງທັງ 2 ທີມ ຖື ວ່າສົດໃສ ໂດຍທີມຊາດໄທ ເປັນແຊ້ມກຸ່ມ A ສ່ວນທີມ ຊາດຫວຽດນາມ ເປັນແຊ້ມກຸ່ມ B; ໃນຮອບແບ່ງກຸ່ມ ກຸ່ມ A ນັດທຳອິດ ໄທ ເອົາຊະນະ ລາວ 2-1, ນັດທີ 2 ຖະຫຼົ່ມ ຟີລິບ ປິນ 4-1, ນັດທີ 3 ຖະຫຼົ່ມ ບຣູໄນ 6-0 ແລະ ຖະຫຼົ່ມກຳ ປູເຈຍ ອີກ 6-0 ໃນນັດສົ່ງທ້າຍ ມີ 12 ຄະແນນເຕັມ ຜ່ານເຂົ້າ ຮອບຮອງຊະນະເລີດ ໃນຖາ ນະແຊ້ມກຸ່ມ A ໄປພົບກັບ ມາ ເລເຊຍ ຮອງແຊ້ມ 3 ສະໄໝ ກ່ອນຈະຖະຫຼົ່ມ ມາເລເຊຍ ໄປ ແບບໝົດສະພາບ 5-0 ປະຕູ.
ຂະນະທີ່ ຫວຽດນາມ ໃນຮອບແບ່ງກຸ່ມ ກຸ່ມ B ນັດ ທຳອິດ ຊະນະ ຕີມໍເລສເຕ 2-0, ນັດທີ 2 ສະເໝີ ມາເລ ເຊຍ 0-0 ກ່ອນນັດທີ 3 ຈະມາ ຖະຫຼົ່ມ ສິງກະໂປ 6-0 ແລະ ນັດສົ່ງທ້າຍ ໄລ່ຕ້ອນ ມຽນມາ 2-0 ຜ່ານເຂົ້າຮອບ 4 ທີມໃນ ຖານະແຊ້ມກຸ່ມ B ມີ 10 ຄະແນນ ກ່ອນຈະມາຖະຫຼົ່ມ ທີມຊາດລາວ ໄປແບບຂາດ ຮອຍ 4-0 ຜ່ານເຂົ້າຮອບຊີງຊະນະເລີດໄດ້ຕາມຄາດໝາຍ.
ແຕ່ທັງນີ້, ທັງນັ້ນ ຖ້າເຮົາ ເບິ່ງຈາກສະຖິຕິການພົບກັນ ຂອງທັງ 2 ທີມ ຖືວ່າສູສີກັນ ແຕ່ຖ້າມາເບິ່ງຟອມການຫຼິ້ນໃນຕອນນີ້ແລ້ວ ທີມຊາດໄທ ດີກວ່າ ເຊິ່ງເບິ່ງຈາກຜົນປະຕູໄດ້ ເສຍ
ແນວໃດກໍ່ຕາມ ແມ່ນຫຍັງກໍ່ເກີດຂຶ້ນໄດ້ ໃຜຊິຄິດວ່າ ຫວຽດນາມ ຈະຖະຫຼົ່ມລາວ ໄປແບບໝົດສະພາບປານນັ້ນ ທັງໆ ທີເຄິ່ງເວລາທຳອິດ ເກມຂອງລາວດີກວ່າທຸກຢ່າງພຽງແຕ່ ເສຍປະຕູໄວ ແລະ ຍິງປະ ຕູຄູ່ຕໍ່ສູ້ບໍ່ໄດ້ຊື່ໆແຕ່ນີ້ຄື ຫວຽດນາມ ທັງໝົດທັງປວງຕ້ອງຍົກໃຫ້ນັກເຕະຫວຽດນາມທຸກໆຄົນ ໂດຍເພາະ Hà Đức Chinh ທີ່ຍິງຄົນດຽວ 3 ປະຕູ ລວມເຖິງການປັບເກມການຫຼິ້ນ ຂອງຄູເຝິກໃນເຄິ່ງຫຼັງເຮັດໃຫ້ ຊາວຫວຽດນາມ ທີ່ຢູ່ໃນ ສປປ ລາວ ກໍ່ຄືຜູ້ຊົມທີ່ຢູ່ທາງບ້ານ ສະເຫຼີມສະຫຼອງວັນຊາດ ຄົບ ຮອບ 70 ຢ່າງຄຶກຄື້ນມ່ວນຊື່ນ ແລະ ຈະຍິ່ງຄຶກຄື້ນກວ່ານີ້ ຖ້າຫາກຂຸນພົນນັກເຕະຫວຽດນາມ ສາມາດລ້າງຕາ ທີມຊາດໄທ ໄດ້ສຳເລັດ ຫຼັງເຄີຍປະລາ ໄຊໃຫ້ໄທ ໃນຮອບຊີງຊະນະເລີດເມື່ອ 4 ກ່ອນ.
