ຂປລ. ວັນທີ 21 ສິງຫາ 2015 ບໍລິສັດ SCG ຮ່ວມກັບ ພະແນກສຶກສາ ທິການ ແລະ ກິລາ ໄດ້ຈັດກອງປະຊຸມຜ່ານຮ່າງ ແບບຟອມໃບສະໝັກ ຮັບທຶນ ການສຶກສາ ໃຫ້ແກ່ນ້ອງນັກຮຽນ ໂດຍເປັນກຽດ ເຂົ້າຮ່ວມ ມີທ່ານ ນັນຕະໄຊ ອິນທະສອນ ຮອງຫົວໜ້າ ພະແນກສຶກສາ ທິການ ແລະ ກິລາ ແຂວງຄຳມ່ວນ, ທ່ານ ວິໄລສັກ ເມຄາຜ່ອງອຳໄພ ຜູ້ຈັດການພັດທະນາ ອົງກອນຢ່າງຍືນຍົງ ບໍລິສັດ ຄຳມ່ວນຊັງມັງ, ທ່ານ ນາງ ສຸຣະພີ ວີຣະວົງສ໌ ຫົວໜ້າຫ້ອງການສະມາຄົມ ຮ່ວມນ້ຳໃຈ ກັບເດັກນ້ອຍລາວ, ມີຫົວໜ້າຫ້ອງການ, ອຳນວຍການ ໂຮງຮຽນ ເມືອງທ່າແຂກ, ໜອງບົກ ແລະ ມະຫາໄຊເຂົ້າຮ່ວມ.
ໂຄງການ ແບ່ງປັນຄວາມຝັນ ກັບ SCG ຫຼື SCG Sharing the Dream ແມ່ນໂຄງການ ມອບທຶນ ຊຸກຍູ້ການສຶກສາ ໃຫ້ແກ່ນັກຮຽນ ມັດທະຍົມປາຍ ຜູ້ທີ່ຫຍຸ້ງຍາກ ເສດຖະກິດ ແຕ່ຢາກຮຽນ ໃຫ້ສຳເລັດ ຊັ້ນມັດທະຍົມປາຍ ແລະ ສືບຕໍ່ຮຽນ ໃນລະດັບສູງຂຶ້ນໄປ, ມີຄຸນສົມບັດດີ, ປະກອບສ່ວນ ກິດຈະກຳ ຂອງໂຮງຮຽນ ແລະ ສັງຄົມ,ກະຕັນຍູ, ຫ້າວຫັນ ຊ່ວຍສ້າງ ເສດຖະກິດ ຄອບຄົວ.
