ສຳນັກຂ່າວຕ່າງປະເທດລາຍງານໃນວັນທີ 19 ສິງຫານີ້ວ່າ ອົງການສົນທິສັນຍາປ້ອງກັນແອັດແລນຕິກເໜືອ ຫລື ນາໂຕ້ ພ້ອມດ້ວຍບັນດາປະເທດພັນທະມິດ ໄດ້ເປີດສາກຊ້ອມຮົບຄັ້ງໃຫຍ່ທີ່ສຸດໃນພາກພື້ນເອີຣົບ ນັບຕັ້ງແຕ່ຍຸກສົງຄາມເຢັນເປັນຕົ້ນມາ ທ່າມກາງສະພາບການທີ່ຍັງມີການສູ້ຮົບກັນ ລະຫວ່າງກອງທັບອູແກຣນ ແລະ ກຸ່ມແບ່ງແຍກດິນແດນທາງພາກຕາເວັນອອກຂອງປະເທດ ໂດຍການຊ້ອມຮົບຄັ້ງນີ້ ມີທະຫານເກືອບ 5,000 ຄົນ ຈາກ 11 ປະເທດສະມາຊິກພັນທະມິດນາໂຕ້ ໄດ້ເລີ່ມຂຶ້ນນັບຕັ້ງແຕ່ວັນທີ 15 ສິງຫາ 2015 ເປັນຕົ້ນມາ ພາຍໃຕ້ຊື່ Swift Response 15 ຊຶ່ງເປັນປະຕິບັດການຊ້ອມຮົບທາງອາກາດ.

ດ້ານກອງທັບສະຫະລັດອາເມຣິກາ ໜຶ່ງໃນປະເທດທີ່ເຂົ້າມຮ່ວມໃນການຊ້ອມຮົບຄັ້ງນີ້ໄດ້ລະບຸວ່າ ອັນທີ່ພົ້ນເດັ່ນໃນການຊ້ອມຮົບເທື່ອນີ້ ແມ່ນຈະມີຂຶ້ນໃນວັນທີ 26 ສິງຫາ ໂດຍຈະມີເຮືອບິນສູ້ຮົບຂອງຊາດພັນທະມິດ ທຳການປ່ອຍທະຫານໂຕນຈ້ອງຫລາຍກ່ວາ 1,000 ຄົນ ພ້ອມດ້ວຍອາວຸດຍຸດໂທປະກອນຕ່າງໆ ລົງສູ່ພື້ນທີ່ຊ້ອມຮົບໃນປະເທດເຢຍລະມັນ ຊຶ່ງໃນມື້ດຽວກັນນີ້ ກໍຈະມີການຊ້ອມຮົບຄ້າຍຄືກັນອີກ ຢູ່ໃນເຂດຊ້ອມຮົບຂອງປະເທດບູນກາຣີອີກດ້ວຍ.

ທັງນີ້ ປະຕິບັດການຊ້ອມຮົບດັ່ງກ່າວ ມີທະຫານເຂົ້າຮ່ວມຫລາຍກ່ວາ 4,800 ຄົນ ຈາກປະເທດຕ່າງໆເຊັ່ນ ບູນກາຣີ, ຝຣັ່ງ, ເຢຍລະມັນ, ເກຣັກ, ອີຕາລີ, ໂຮນລັງ, ໂປໂລຍ, ປັອກຕຸຍການ, ແອັດສະປາຍ, ອັງກິດ ແລະ ສະຫະລັດອາເມຣິກາ ຊຶ່ງການຊ້ອມຮົບຈະສິ້ນສຸດລົງໃນວັນທີ 13 ກັນຍານີ້.