ຂປລ. ໃນວັນທີ 13 ສິງຫາ 2015 ນີ້, ທ່ານ ກ່ວນ ຮົວ ປິງ ເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສປ ຈີນ ປະຈຳລາວ ໄດ້ຕາງໜ້າໃຫ້ລັດຖະບານ ແຫ່ງ ສປ ຈີນ ນຳເງິນຈຳນວນ 100 ລ້ານກີບ ມາມອບໃຫ້ແກ່ ລັດຖະບານລາວ ເພື່ອຊ່ວຍເຫລືອ ແກ້ໄຂບັນເທົາທຸກ ໃຫ້ແກ່ປະຊາຊົນ ຜູ້ທີ່ໄດ້ຮັບຜົນກະທົບຈາກ ໄພນ້ຳຖວມ ເຊິ່ງຮັບໂດຍ ທ່ານ ອາຊາງ ລາວລີ ຮອງນາຍົກລັດຖະມົນຕີ, ປະທານກຳມະການ ປ້ອງກັນ ແລະ ຄວບຄຸມໄພພິບັດ ແຫ່ງຊາດ, ມີພາກສ່ວນກ່ຽວຂ້ອງ ສອງຝ່າຍ ເຂົ້າຮ່ວມ ເປັນສັກຄີພິຍານ.
ທ່ານ ອາຊາງ ລາວລີ ໄດ້ສະແດງ ຄວາມຂອບໃຈຕໍ່ ທ່ານ ກ່ວນ ຮົວ ປິງ ກໍຄື ລັດຖະບານແຫ່ງ ສປ ຈີນ ທີ່ໄດ້ໃຫ້ການຊ່ວຍເຫລືອ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນ ສຳຄັນເຂົ້າໃນການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມື ຊ່ວຍເຫລືອເຊິ່ງກັນ ແລະ ກັນ ໃຫ້ໄດ້ຮັບການ ພັດທະນາ ແລະ ແຕກດອກອອກຜົນ ຍິ່ງໆຂຶ້ນ, ພ້ອມທັງຢືນຢັນວ່າ ຈະນຳເອົາເງິນ ຈຳນວນດັ່ງກ່າວ ໄປຊ່ວຍເຫລືອ, ແກ້ໄຂ-ບັນເທົາທຸກ ໃຫ້ປະຊາຊົນ ຜູ້ທີ່ໄດ້ຮັບຜົນກະທົບ ຈາກໄພນ້ຳຖວມ ຢ່າງທົ່ວເຖິງ.
ໂອກາດດຽວກັນ ທ່ານ ອາຊາ ງ ລາວລີ ຍັງໄດ້ຮຽກຮ້ອງ ມາຍັງປະຊາຊົນ ທຸກທົ່ວໜ້າ, ບັນດາທູຕານຸທູດ ແລະ ຊາວຕ່າງດ້າວ ທີ່ອາໄສ ຢູ່ ສປປ ລາວ ຈົ່ງພ້ອມໃຈກັນ ປະກອບສ່ວນ ຊ່ວຍເຫລືອແກ້ໄຂບັນ ເທົາທຸກແກ່ປະຊາຊົນ ຜູ້ທີ່ໄດ້ຮັບຜົນກະທົບດັ່ງກ່າວ ເພື່ອໃຫ້ກັບຄືນ ສູ່ສະພາບປົກກະຕິ ແລະ ຖ້າຫາກພາກສ່ວນໃດຢາກປະກອບສ່ວນ ຊ່ວຍເຫລືອ ສາມາດຕິດຕໍ່ພົວພັນ ມາຍັງກົມຄຸ້ມຄອງໄພພິບັດ ແລະ ການປ່ຽນແປງ ດິນຟ້າອາກາດ ໄດ້ທີ່ເບີ 021 265017 ຫລື ອີແມວ info.ncdpc@gmail.com.
ຂອບໃຈຂ່າວຈາກ:
