ທ່ານນາຍົກລັດຖະມົນຕີ ທອງສິງ ທຳມະວົງ ຕ້ອນຮັບການເຂົ້າຢ້ຽມຂ່ຳນັບຂອງທ່ານ ອາກິຮິໂກະ ທານາກະ ປະທານອົງການຮ່ວມມືສາກົນຍີ່ປຸ່ນ ພ້ອມຄະນະ ໃນໂອກາດທີ່ໄດ້ເດີນທາງຢ້ຽມຢາມ ສປປ ລາວ ໃນວັນທີ 28-29 ສິງຫາ 2013 ຊຶ່ງພິທີຕ້ອນຮັບໄດ້ຈັດຂຶ້ນໃນວັນທີ 29 ສິງຫາ 2013 ທີ່ຫ້ອງວ່າການລັດຖະບານ.
ໂອກາດດັ່ງກ່າວ ທ່ານນາຍົກລັດຖະມົນຕີ ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຊົມເຊີຍຕໍ່ການເດີນທາງມາຢ້ຽມຢາມ ສປປ ລາວ ຂອງຄະນະຜູ້ແທນດັ່ງກ່າວ ພ້ອມນັ້ນ ທ່ານຍັງໄດ້ສະແດງຄວາມຂອບໃຈ ຕໍ່ກັບການໃຫ້ການຊ່ວຍເຫຼືອຂອງອົງການ JICA ຕະຫຼອດໄລຍະທີ່ຜ່ານມາ ບໍ່ວ່າຈະເປັນການພັດທະນາພື້ນຖານໂຄງລ່າງ ກະສິກຳ-ປ່າໄມ້ ການສຶກສາ ແລະ ສາທາລະນະສຸກ ອັນໄດ້ປະກອບສ່ວນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງ ສປປ ລາວ ໃຫ້ໄດ້ຮັບການຂະຫຍາຍຕົວຢ່າງຕໍ່ເນື່ອງ ຊຶ່ງເປັນສ່ວນໜຶ່ງເຂົ້າໃນການເສີມສ້າງ ການເຊື່ອມໂຍງກັບບັນດາປະເທດໃນພາກພື້ນ ໂດຍສະເພາະແມ່ນ ການເຊື່ອມໂຍງປະຊາຄົມເສດຖະກິດອາຊຽນ (AEC) ໃນປີ 2015.
ທ່ານ ອາກິຮິໂກະ ທານາກະ ກໍໄດ້ສະແດງຄວາມຊົມເຊີຍຕໍ່ກັບຜົນສຳເລັດ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII ອັນໄດ້ເຮັດໃຫ້ເສດຖະກິດ-ສັງຄົມຂອງ ສປປ ລາວ ໄດ້ຮັບການພັດທະນາຂຶ້ນ ເຮັດໃຫ້ອັດຕາການຂະຫຍາຍຕົວຂອງເສດຖະກິດຢູ່ໃນລະດັບ 8% ຂຶ້ນໄປ.
ໃນວັນດຽວກັນ ທ່ານ ອາກິຮິໂກະ ທານາກະ ໄດ້ເດີນທາງເຂົ້າຢ້ຽມຂ່ຳນັບ ແລະ ພົບປະກັບທ່ານ ສົມດີ ດວງດີ ລັດຖະມົນຕີວ່າການ ກະຊວງແຜນການ-ການລົງທຶນ ແລະ ເວລາຕໍ່ມາ ກໍໄດ້ເດີນທາງເຂົ້າຢ້ຽມ ແລະ ພົບປະກັບທ່ານ ພູເພັດ ຄຳພູນວົງ ລັດຖະມົນຕີວ່າການກະຊວງການເງິນ.
ການເດີນທາງຢ້ຽມຢາມ ສປປ ລາວ ຄັ້ງນີ້ ຄະນະຜູ້ແທນຍັງມີໂອກາດເດີນທາງຢ້ຽມຢາມ ບັນດາໂຄງການທີ່ອົງການ JICA ໃຫ້ທຶນຊ່ວຍເຫຼືອອີກດ້ວຍ.