ຂປລ.ອ່າງເກັບນ້ຳສູງ ຢູ່ບ້ານສະໜາມໄຊ ເຂດບຶງວະ ແລະ ຫລັກ 9 ເມືອງໄກສອນພົມວິຫານ ແຂວງສະຫວັນນະເຂດ ຈະໄດ້ລົງມືກໍ່ສ້າງ ອີກບໍ່ດົນນີ້ ຫລັງເປີດການປະມູນ ກໍ່ສ້າງແລ້ວ ກາງເດືອນນີ້ ແລະ ຖ້າສຳເລັດການກໍ່ສ້າງ ຈະສາມາດ ສະໜອງນ້ຳບໍລິໂພກ ໃຫ້ແກ່ປະຊາຊົນ ເມືອງດັ່ງກ່າວ ໄດ້ຢ່າງພຽງພໍ ໃນອະນາຄົດ.
ແຫລ່ງຂ່າວຈາກແຂວງສະຫວັນນະເຂດ ລາຍງານວ່າ: ຄະນະກຳມະການ ປະມູນບໍລິສັດນ້ຳປະປາ ສະຫວັນ-ດີເຄເອວເອສ ຈຳກັດໄດ້ເປີດຊອງ ປະມູນປະກວດລາຄາ2 ໜ້າວຽກຂອງໂຄງການ ກໍ່ສ້າງອ່າງເກັບນ້ຳ 2 ອ່າງ, ຕອກເສົາເຂັມ ອ່າງເກັບນ້ຳ ຢູ່ເຂດບຶງວະ ບ້ານສະໜາມໄຊ ແລະ ເສົາເຂັມຂອງ2 ອ່າງເກັບນ້ຳຫລັກ 9 ໂດຍແຕ່ລະອ່າງ ບັນຈຸນ້ຳໄດ້ 2.500 ແມັດກ້ອນ. ສຳລັບການກໍ່ສ້າງ ອ່າງເກັບນ້ຳນັ້ນ ມີ 2 ບໍລິສັດຮ່ວມປະມູນ ຄືບໍລິສດ ລ່ຽມມະນີແສງກໍ່ສ້າງຈຳກັດ ແລະ ບໍລິສັດ PML ກໍ່ສ້າງຈຳກັດ. ຂະນະທີ່ວຽກກົນຈັກ ແລະໄຟຟ້າ ມີ 1 ບໍລິສັດຄືບໍສັດ ໂຊນແອ ຈຳກັດ ປະເທດມາເລເຊຍ. ສ່ວນການຕອກເສົາເຂັມ ອ່າງເກັບນ້ຳ ເຂດບຶງວະ2 ອ່າງ ແລະ ເສົາ ເຂັມ 2 ອ່າງເກັບນ້ຳຢູ່ເຂດຫລັກ 9 ມີ 3 ບໍລິສັດ ຄືບໍລິສັດລ່ຽມມະນີແສງ ກໍ່ສ້າງຈຳກັດ, ບໍລິສັດ PML ກໍ່ສ້າງຈຳກັດ ແລະ ວິສາຫະກິດກໍ່ສ້າງ ຈັນດາລາ ເຂົ້າຮ່ວມປະມູນ.
ລັດຖະບານລາວ ແລະ ບໍລິສັດນ້ຳປະປາ
ສະຫວັນ-ດີ ເຄເອວເອສ ຈຳກັດ ມີແຜນຮັບປະກັນ ການສະໜອງນ້ຳ ຢ່າງໝັ້ນຄົງ ໃນອະນາຄົດຢູ່ຕົວເມືອງ ເຊ່ິງການກໍ່ສ້າງອ່າງເກັບນ້ຳ 2 ໜ່ວຍຢູ່ເຂດບຶງວະ ບ້ານສະໜາມໄຊ ແມ່ນໜ່ຶງໃນແຜນການດັ່ງກ່າວ. ຂະນະທີ່ 2 ອ່າງເກັບນ້ຳເຂດຫັກ 9 ຈະກໍ່ສ້າງໃນອະນາຄົດ, ແຕ່ການຕອກເສົາເຂັມ 2 ອ່າງນີ້ຕ້ອງໄດ້ປະຕິບັດໃນເວລາດຽວກັນ. ທັງນີ້ອ່າງເກັບນ້ຳທັງ 2 ແຫ່ງນີ້ຈະສາມາດ ຮັບຮອງການເຕີບໃຫຍ່ ຂະຫຍາຍຕົວຂອງເສດຖະກິດ ກໍຄືການເພີ່ມຂຶ້ນ ຂອງພົນລະເມືອງ ໃນອະນາຄົດກໍຄືການພັດທະນາ ເຂດເສດຖະກິດ ພິເສດ, ເຂດອຸດສາຫະກຳ ແລະ ເຂດການຄ້າອ້ອມຂ້າງ.ຂອບໃຈຂ່າວຈາກ:
