ໄລຍະເວລາທີ່ຜ່ານມາຊ່ວງຫລັງໆນີ້ ຖ້າເຮົາເປັນຄົນໃຊ້ລົດໃຊ້ຖະໜົນເຮົາເຄີຍສັງເກດບໍວ່າໂລກມັນຢູ່ຍາກຂຶ້ນທຸກມື້ໂດຍສະເພາະເວລາເຮົາຂັບລົດໃຊ້ຖະໜົນທຸກມື້ນີ້ມັກຈະພົບເລື່ອງທີ່ເຮັດໃຫ້ເຮົາຫົວເສຍຈາກພຶດຕິກຳບໍ່ດີ ຂອງເພື່ອນມະນຸດທີ່ໃຊ້ຖະໜົນຮ່ວມກັນກັບເຮົາເຊີ່ງແທ້ໆແລ້ວຄົົນທີ່ມີມານລະຍາດໃນການຂັບລົດແລະໃຊ້ຖະໜົນນັ້ນກໍຍັງພໍມີຢູ່ແຫລະພຽງແຕ່ເຮົາບໍ່ຄ່ອຍເຫັນເພາະວ່າມັນຫາຍາກຫລາຍ ມີແຕ່ຄົົນທີ່ເຫັນແກ່ຕົວ ບໍ່ແຄໃຜ ນັກເລງແລະມີນິໄສຫລືພຶດຕິກຳບໍ່ດີ ເຕັມໄປຫມົດ
ແລະນີ້ຄືທີ່ມາທີ່ ບົດຄວາມຂອງ 10 ພຶດຕິກຳບໍ່ດີ ທີ່ພົບເປັນປະຈຳຕອນໃຊ້ຖະໜົນ
ເປີດໄຟຕັດໝອກຕະຫລອດເວລາ
ໄຟຕັດໝອກ ເປັນອຸປະກອນເພີ່ມຄວາມປອດໄພໃນສະພາວະທີ່ມີໝອກລົງຈັດຫລືຝົນຕົກໜັກຫລືໃນສະພາວະທີ່ວິໄສທັດໃນການເບິ່ງເຫັນບໍ່ດີ ເພື່ອໃຫ້ລົດຄັນອື່ນສາມາດເຫັນລົດຂອງເຮົາໄດ້ຈາກໄລຍະໄກ ແຕ່ປະຈຸບັນກັບມີຜູ້ເປີດໃຊ້ໄຟຕັດໝອກຢ່າງພ່ຳເພື່ອ ແມ່ນໃນສະພາບອາກາດປົກກະຕິ ເຊີ່ງແສງທີ່ໄດ້ນັ້ນເຮັດໃຫ້ລົບກວນສາຍຕາຜູ້ຂັບຂີ່ຄັນອື່ນເປັນຢ່າງຫລາຍ ຍິ່ງເມື່ອຕ້ອງຂັບຕາມຫລັງເປັນເວລາດົນໆ ແລ້ວ ມັນເຮັດໃຫ້ເຮົາເຊີ່ງຂັບຕາມຫລັງແສບຕາສຸດໆ ເພາະໄຟຕັດໝອກມັນແຍງຕາ ມັນກໍຍັງມີຄົົນທີ່ເປີດໄຟຕັດໝອກໄວ້ຕະຫລອດເວລາ ວ່າຂ້ອຍຫາກໍ່ໄດ້ມີໄຟຕັດໝອກເທື່ອທຳອິດໃຊ້ຊີວິດເລີຍເປີດໃຫ້ຮູ້ກັນ 3 ໂລກໄປເລີຍວ່າເຂົາມີ
ລ້ຽວຫລືປ່ຽນເລນໂດຍບໍ່ໃຫ້ສັນຍານໄຟລ້ຽວ
ໄຟລ້ຽວເປັນອຸປະກອນເພື່ອເພີ່ມຄວາມປອດໄພຍາມຕ້ອງການລ້ຽວຫລືປ່ຽນເລນ ແຕ່ດຽວນີ້ມີຜູ້ຂັບຂີ່ຈຳນວນຫລາຍທີ່ປ່ຽນເລນຫລືລ້ຽວໂດຍບໍ່ເປີດໄຟລ້ຽວ (ເຊີ່ງຂ້ອຍຈະເອີ້ນຄົນພວກນີ້ວ່າພວກມັກງ່າຍ ຂ້ອຍກໍບໍ່ເຂົ້າໃຈແທ້ໆ ວ່າມັນຍາກຫລາຍບໍທີ່ຈະເປີດໄຟລ້ຽວກ່ອນລ້ຽວຫລືປ່ຽນເລນ) ເຊີ່ງອາດເຮັດໃຫ້ເກີດອຸປະຕິເຫດໄດ້ງ່າຍຫລາຍ ເພາະມັກຈະເຮັດໃຫ້ລົດຄັນທີ່ຢູ່ໃນເລນຕົກໃຈຢູ່ເລື້ອຍໆ ຖ້າຕາມຫລັງກັນມາກໍເບຣກກັນຈົນຫົວຕຳຫົວຕຳເພາະບໍ່ຮູ້ວ່າເຈົ້າຈະລ້ຽວ
ຂັບຊ້າແຊ່ຊ້າຍ
ພຶດຕິກຳຂັບລົດແຊ່ໃນຊ່ອງຈະລາຈອນດ້ານຊ້າຍ ກໍເປັນພຶດຕິກຳທີ່ພົບເຫັນໄດ້ເລື້ອຍຂຶ້ນ (ເຊີ່ງທາງຊ້າຍກົດຈະລາຈອນວ່າໃຫ້ແຊງຊ້າຍ) ບໍ່ວ່າຈະດ້ວຍຄວາມຕັ້ງໃຈຫລືບໍ່ຕັ້ງໃຈຂອງຄົນຂັບກໍຕາມ ເຊີ່ງການຂັບລົດແຊ່ຊ້າຍຈະເຮັດໃຫ້ຜູ້ຂັບຂີ່ທີ່ຂັບໄວກວ່າ ຕ້ອງແຊງຂຶ້ນໄປທາງດ້ານຂວາແທນ ເຊີ່ງອາດກໍ່ໃຫ້ເກີດອັນຕະລາຍໄດ້ຫລາຍກວ່າ ຢ່າງຫລາຍຄົນເຄີຍຖາມວ່າຖ້າຕົວເອງຂັບຢູ່ທາງຊ້າຍທີ່ຄວາມໄວ 140 ກມ. /ຊມ. ແລ້ວມີຄົນມີຈໍ່ກົ້ນແລະເປີດໄຟສູງໄລ່ຫລັງເຮົາຄວນຈະຫລົບຫລືບໍ່ສົນໃຈເພາະເຮົາກໍບໍ່ຊ້າ ຂ້ອຍກໍຕອບໄປວ່າຖ້າເຂົາມາໄວກວ່າເຮົາຕໍ່ໃຫ້ເຮົາຢູ່ທີ່ 160 ຕາມມາລະຍາດເຮົາກໍຄວນຈະຫລົບໃຫ້ແລະຄ່ອຍກັບໄປຢູ່ທາງຊ້າຍຫລັງຈາກທີ່ເຂົາແຊງເຮົາໄປແລ້ວ
ຂັບລົດຈີ້ຫລັງມິດຊິດ
ການຂັບລົດຈີ້ຄັນໜ້າຖືເປັນພຶດຕິກຳທີ່ກໍ່ຄວາມສ່ຽງຕໍ່ການເກີດອຸບັດເຫດໄດ້ ແລະຍັງຖືວ່າເປັນມາລະຍາດທີ່ບໍ່ດີຫລາຍ ທາງທີ່ດີຄວນເວັ້ນໄລຍະຄັນໜ້າປະມານ 2 ແມັດ ຫລືອາດນ້ອຍກວ່ານັ້ນຂຶ້ນຢູ່ກັບສະພາບຈະລາຈອນ ຫລືຫາກຕ້ອງການແຊງ ກໍຄວນໃຊ້ໄຟສູງຂໍທາງແທນດີກວ່າ ຖ້າຈີ້ຫລາຍໆ ລະວັງເບຣກບໍ່ທັນລະວົງຕຳກົ້ນກັນເດີ
ແຊງກະຊັ້ນຊິດ
ການແຊງກະຊັ້ນຊິດບໍ່ວ່າຈະຕັ້ງໃຈຫລືບໍ່ກໍຕາມ ເປັນພຶດຕິກຳທີ່ອາດເຮັດໃຫ້ເກີດອຸປະຕິເຫດຕາມມາໄດ້ ແຖມເປັນການຂັບທີ່ມາລະຍາດບໍ່ດີອີກດ້ວຍ ທາງທີ່ດີກ່ອນແຊງຄວນກະໄລຍະຂອງຄັນທີ່ສວນມາໃຫ້ແນ່ໃຈວ່າມີໄລຍະທາງຫລາຍພໍໃຫ້ເລັ່ງແຊງ ທີ່ສຳຄັນຄືເມື່ອແຊງພົ້ນແລ້ວ ຄວນຮີບກັບໄປຍັງຊ່ອງທາງເດີນທີ່ຖືກຕ້ອງຢ່າງວ່ອງໄວ ແຕ່ຢ່າລືມວ່າຕ້ອງໃຫ້ຮັກສາໄລຍະຫ່າງໄວ້
ເປີດໄຟສູງຄ້າງໄວ້
ການເປີດໄຟສູງຄ້າງໄວ້ ສ່ວນຫລາຍເກີດຂຶ້ນດ້ວຍຄວາມບໍ່ຕັ້ງໃຈ ໂດຍສະເພາະຢ່າງຍິ່ງຜູ້ທີ່ຫາກໍ່ຂັບລົດໃໝ່ໆ ທີ່ຍັງໃຊ້ອຸປະກອນພາຍໃນລົດໄດ້ບໍ່ຄ່ອງແຄ່ວ ເຊີ່ງຈະເຮັດໃຫ້ເກີດອັນຕະລາຍຕໍ່ລົດທີ່ສວນມາຢ່າງຫລາຍ ເພາະໄຟສູງມີຄວາມເຂ້ມຂອງແສງສູງ ເຮັດໃຫ້ສາຍຕາມົວ ໄດ້ ເປັນອັນຕະລາຍຕໍ່ຜູ້ຮ່ວມທາງຢ່າງຍິ່ງ
ຂັບລົດດ້ວຍຄວາມໄວເກີນກົດໝາຍກຳນົດ
ທາງຫລວງຫລາຍໆເສັ້ນ ມັກອະນຸຍາດໃຫ້ຜູ້ຂັບຂີ່ ສາມາດໃຊ້ຄວາມໄວໄດ້ເຖິງ 120 ກມ. /ຊມ. ເຊີ່ງກໍນັບວ່າພຽງພໍແລ້ວສຳລັບການຂັບຂີ່ໃນຊີວິດປະຈຳວັນ ການຂັບລົດດ້ວຍຄວາມໄວສູງຫລາຍໆ ນັ້ນ ຈະເຮັດໃຫ້ມີເວລາຕັດສິນໃຈນ້ອຍລົງຫາກເກີດເຫດສຸກເສີນຂຶ້ນມາຫລາຍໆປະເທດທົ່ວໂລກລວມເຖິງປະເທດລາວເຮົາ ມີໂຄສະນາອອກມາເພື່ອ ຊ່ວຍໃຫ້ຜູ້ຂັບຂີ່ໃຊ້ຄວາມໄວຢ່າງເໝາະສົມ ເພາະການຂັບລົດໄວຖືເປັນປັດໄຈທີ່ອາດກໍ່ໃຫ້ເກີດອຸປະຕິເຫດທາງລົດເປັນອັນດັບຕົ້ນໆ
ແຊກ/ບຽດ/ປາດໜ້າກ່ອນເຖິງທາງແຍກ
ພຶດຕິກຳນີ້ເປັນນິໄສບໍ່ດີທີ່ສຸດ ມັນສະແດງໃຫ້ເຫັນເຖິງສັນດານແລະນິໄສວ່າຄົົນທີ່ມີພຶດຕິກຳເຫລົ່ານີ້ເປັນຄົນຢ່າງໃດ ແລະໜ້າຕົກໃຈກໍຄືມັນເປັນສິ່ງທີ່ພົບເຫັນໄດ້ສະຕະຫລອດ ໂດຍສະເພາະຢ່າງຍິ່ງຊ່ວງເວລາລົດຕິດໜັກ ຄືຈະມີລົດສ່ວນນ້ອຍທີ່ບໍ່ອົດທົນຕໍ່ແຖວໃນເລນຕາມການຈາລະຈອນປົກກະຕິ ແຕ່ຈະໃຊ້ວີທີແຊກຫລືບຽດຫົວແຖວ ບໍລິເວນກ່ອນເຖິງທາງແຍກເລັກນ້ອຍ ເຊີ່ງເປັນພຶດຕິກຳທີ່ໜ້າລັງກຽດພໍໆ ກັບແຊງຄິວຊື້ຂອງນັ້ນແຫລະ ເພາະນອກຈາກຈະເປັນການກີດຂວາງຈາລະຈອນເລນອື່ນແລ້ວ ກໍຈະເຮັດໃຫ້ລົດເຄື່ອນຕົວໄດ້ຊ້າກວ່າປົກກະຕິເມື່ອໄດ້ສັນຍານໄຟຂຽວອີກດ້ວຍ ເພາະຕ້ອງປ່ອຍໃຫ້ຄົນກຸ່ມນີ້ແຊງໄປກ່ອນນັ້ນເອງ
ເປີດໄຟສຸກເສີນເພື່ອແລ່ນທາງແຍກ
ມີຜູ້ຂັບຂີ່ບໍ່ນ້ອຍທີ່ມີເຈດນາດີດ້ວຍການເປີດໄຟສຸກເສີນກ່ອນເຖິງທາງແຍກ ເພື່ອບອກໃຫ້ຜູ້ຮ່ວມທາງຮູ້ວ່າ “ຂ້ອຍຈະຂັບກົງໄປເດີ!” ແຕ່ເຈດຕະນາດັ່ງກ່າວບໍ່ມີປະໂຫຍດເລີຍແຖມຍັງກໍ່ໃຫ້ເກີດຄວາມສ່ຽງອີກດ້ວຍ ເນື່ອງຈາກລົດທາງດ້ານຊ້າຍແລະຂວາຈະເຫັນໄຟກະພິບພຽງຂ້າງດຽວ ເຮັດໃຫ້ເຂົ້າໃຈຜິດຄິດວ່າຜູ້ຂັບຈະລ້ຽວຊ້າຍຫລືຂວາຫລາຍກວ່າທີ່ຈະຂັບກົງໄປ ເຊີ່ງໂດຍປົກກະຕິຫາກຕ້ອງການຂັບລົດກົງໄປ ກໍບໍ່ຈຳເປັນຈະຕ້ອງເປີດສັນຍານໃດໆຢູ່ແລ້ວ
ເມົາແລ້ວຂັບ
ເຖິງວ່າປະຈຸບັນຈະມີການໂຄສະນາຕໍ່ຕ້ານການເມົາແລ້ວຂັບຢູ່ເປັນຈຳນວນຫລາຍ ແຕ່ກໍຍັງສາມາດພົບເຫັນໄດ້ຢູ່ເລື້ອຍໆ ເພາະບາງເທື່ອຄົນຂັບຈະຄິດວ່າຕົວເອງຮູ້ສຶກມຶນໆ ແຕ່ບໍ່ເຖິງກັບເມົາ (ເຊີ່ງກໍຄືເມົານັ້ນແຫລະ!) ເຊີ່ງເປັນພຶດຕິກຳທີ່ຂາດຄວາມຮັບຜິດຊອບຕໍ່ສັງຄົມຢ່າງຍິ່ງ ແລະອາດກໍ່ໃຫ້ເກີດອຸປະຕິເຫດກັບຄົນບໍ່ຮູ້ຫຍັງໄດ້
ນີ້ກໍ່ຄື 10 ພຶດຕິກຳການໃຊ້ລົດທີ່ໄດ້ກ່າວໄປຂ້າງຕົ້ນ ເຊີ່ງລ້ວນແຕ່ເປັນສາມັນສຳນີກຂອງຜູ້ໃຊ້ລົດທຸກຄົນຢູ່ແລ້ວ ສະນັ້ນເຮົາຈຶ່ງຄວນປະຕິບັດຕາມກົດຈາລະຈອນ ເພື່ອໃຫ້ການເດິນທາງເທິງທ້ອງຖະໜົນເປັນເລື່ອງປອດໄພຫລາຍຂຶ້ນ