ວັນທີ 20 ກໍລະກົດນີ້, ຢູ່ນະຄອນຫຼວງວໍຊີງຕັນຂອງອາເມລິກາ ໄດ້ຈັດພິທີຊັກທຸງຊາດຂຶ້ນເສົາເພື່ອ ເປີດສະຖານທູດກູບາປະຈໍາອາເມລິກາ; ມື້ດຽວກັນ, ສໍານັກງານຕົວແທນຜົນປະໂຫຍດອາເມລິກາ ປະຈໍາກູບາໄດ້ຍົກລະດັບເປັນສະຖານທູດຢ່າງເປັນທາງການ.
ໃນງານຖະແຫຼງຂ່າວທີ່ຈັດຂຶ້ນພາຍຫຼັງພິທີດັ່ງກ່າວ, ທ່ານຈອນ ເຄຣີ, ລັດຖະມົນຕີວ່າການກະຊວງການຕ່າງປະເທດ ອາເມລິກາກ່າວວ່າ, ຫຼັງຈາກການຢຸດຕິສາຍພົວພັນທາງການທູດ ເປັນເວລາ 54 ປີ, ອາເມລິກາກັບກູບາໄດ້ຟື້ນຟູສາຍພົວພັນທາງການທູດ ຢ່າງເປັນທາງການ ແລະເປີດສະຖານທູດຄືນໃໝ່, ນີ້ເປັນ”ມື້ືທີ່ມີລັກສະນະປະຫວັດສາດ”. ແຕ່ພ້ອມກັນນັ້ນ ທ່ານເຄຣີກ່າວວ່າ, ຢູ່ລະຫວ່າງສອງປະເທດຍັງຄົງມີຂໍ້ຂັດແຍ້ງກັນ, ການຫັນສາຍພົວພັນສອງຝ່າຍໃຫ້ເປັນປົກກະຕິ ຢ່າງຮອບດ້ານຍັງຕ້ອງການເວລາ.
ທ່ານບຣູໂນ ໂຣດຣີກູເອສ, ລັດຖະມົນຕີວ່າການກະຊວງການຕ່າງປະເທດ ກູບາກ່າວວ່າ, ອາເມລິກາຄວນຍົກເລີກການຂວໍ້າບາດດ້ານເສດຖະກິດ ການຄ້າຕໍ່ກູບາຢ່າງຮອບດ້ານ, ມອບດິນແດນຂອງກວານຕານາໂມທີ່ຍຶດຄອງ ຢ່າງຜິດກົດໝາຍນັ້ນຄືນໃຫ້ກູບາ, ພ້ອມກັນນັ້ນກໍ່ຕ້ອງເຄົາລົບນັບຖືອະທິປະໄຕຂອງກູບາ ແລະໃຊ້ແທນຕໍ່ຄວາມເຈັບປວດ ແລະຄວາມເສຍຫາຍຂອງປະຊາຊົນກູບາ, ມີແຕ່ເຮັດແນວນີ້ ສອງຝ່າຍຈຶ່ງຈະສາມາດສືບຕໍ່ເດີນຕາມເສັ້ນທາງ ແຫ່ງການຫັນສາຍພົວພັນສອງປະເທດໃຫ້ເປັນປົກກະຕິ.
ຂອບໃຈຂ່າວແລະຮູບຈາກ: ວິທະຍຸຊີອາໄອ ພາກພາສາລາວ