ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ Sheikh Ahmad Al Fahad Al Sabah ອະດີດຮອງນາຍົກລັດຖະມົນຕີ ແຫ່ງ ກູເວດ ປະທານສະມາຄົມຄະນະກຳມະການໂອແລມປິກແຫ່ງຊາດກູເວດ ທັງເປັນປະທານໂອແລມປິກອາຊີ ໃນວັນທີ 29 ເມສາ 2013 ທີ່ຫ້ອງວ່າການລັດຖະບານ ເນື່ອງໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 28-29 ເມສາ 2013 ນີ້.
ທ່ານນາຍົກລັດຖະມົນຕີ ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ການຢ້ຽມຢາມ ແລະ ເຮັດວຽກຢູ່ ສປປ ລາວ ຊຶ່ງເປັນການປະກອບສ່ວນໃນການເພີ່ມພູນຄູນສ້າງ ແລະ ເປັນຂີດໝາຍສຳຄັນໃນການເສີມຂະຫຍາຍສາຍພົວພັນຮ່ວມມືລະຫວ່າງປະຊາຊົນທັງສອງຊາດ ກໍຄືສອງປະເທດ ລາວ-ກູເວດ ໂດຍສະເພາະໃນຂົງເຂດວຽກງານກີລາໂອແລມປິກຂອງສອງປະເທດ ໃຫ້ແໜ້ນແຟ້ນຍິ່ງໆຂຶ້ນ.
ໃນວັນດຽວກັນນີ້ ທີ່ໂຮງແຮມລາວພລາຊາ ປະທານໂອແລມປິກອາຊີ ພ້ອມຄະນະ ຍັງໄດ້ເຂົ້າຢ້ຽມຂ່ຳນັບທ່ານ ດຣ.ພັນຄຳ ວິພາວັນ ລັດຖະມົນຕີວ່າການກະຊວງສຶກສາທິການ ແລະ ກີລາ ປະທານຄະນະກຳມະການໂອແລມປິກລາວ ໃນການຢ້ຽມຢາມຄັ້ງນີ້ທັງສອງຝ່າຍໄດ້ມີການແລກປ່ຽນຄຳຄິດຄຳເຫັນທາງດ້ານກີລາຂອງສອງປະເທດ ໂດຍສະເພາະໃນຂະແໜງການກີລາໂອແລມປິກ ເພື່ອເຮັດໃຫ້ວົງການກີລາໃນຂົງເຂດອາຊີມີການພັດທະນາໃຫ້ເຕີບໃຫຍ່ຂະຫຍາຍຕົວຂຶ້ນເລື້ອຍໆ.