ນັກວິໄຈຈາກຄະນະແພດສາດ ມະຫາວິທະຍາໄລແຄລິຟໍເນຍ ຊານດິເອໂກ ແລະສະຖາບັນຊິນລີອາຍ ໄດ້ຄົ້ນພົບໂມເລກຸນທີ່ເປັນກາວເຊື່ອມສະຫມອງທີ່ເຮັດໃຫ້ພາບທີ່ເບິ່ງເຫັນນັ້ນຍັງແຈ້ງ ແມ່ນວັດຖຸ ຫຼື ຕາຂອງເຮົາຈະເຄື່ອນໄຫວກໍຕາມ
ນັກວິໄຈຊີ້ວ່າ ໂປຕີນ Contactin-4 ແລະ amyloid precursor ນັ້ນກໍ່ໃຫ້ເກີດຄວາມສະຖຽນຂອງພາບ ໂດຍໄດ້ເຜີຍແຜ່ຜົນງານການຄົ້ນພົບນີ້ໃນວາລະສານວິຊາການ Neuron ແລ້ວ
“ໃນລະບົບຂອງພາບນັ້ນ ການເຊື່ອມຕໍ່ລະຫວ່າງຕາແລະສະຫມອງທີ່ແມ່ນຍຳຈະຊ່ວຍໃນການເບິ່ງເຫັນພາບແລະເຮັດໃຫ້ໝັ່ນໃຈວ່າພາບນັ້ນແຈ້ງແລະຄົມ” ດຮ. ແອນົດລູວ໌ ຮູເບີລ໌ແມນ ນັກວິໄຈກ່າວວ່າ
“ເຊັນເຊີໃນຕານັ້ນສາມາດກວດຈັບການເຄື່ອນໄຫວແລະເຊື່ອມຕໍ່ໄປຍັງສະຫມອງດ້ວຍວິທີທີ່ຖືກຕ້ອງໄດ້ ເພື່ອເຮັດໃຫ້ຕານັ້ນເຄື່ອນໄປຍັງທິດທາງທີ່ຖືກຕ້ອງໂດຍບໍ່ເຮັດໃຫ້ພາບເບີໄດ້ ເຊີ່ງເປັນຫລັກການດຽວກັບເວລາເຮົາຖ່າຍພາບນິ່ງຂອງວັດຖຸທີ່ກຳລັງເຄື່ອນໄຫວ ຈົນເຖິງຕອນນີ້ ເຮົາຍັງບໍ່ເຂົ້າໃຈວ່າຕາກັບສະຫມອງຄວບຄຸມການເຮັດວຽກງານນີ້ໄດ້ຢ່າງໃດໃນລະດັບໂມເລກຸນ”
ໃນການສຶກສາວ່າຕາແລະສະຫມອງນັ້ນເຮັດວຽກສຳພັນກັນຢ່າງໃດເພື່ອໃຫ້ໄດ້ຄວາມສະຖຽນນີ້ ດຮ. ຮູເບີລ໌ແມນ ແລະທີມງານໄດ້ສຶກສາໄປທີ່ກຸ່ມເຊວປະສາດໃນສະຫມອງທີ່ກໍ່ໃຫ້ເກີດວົງຈອນເຊື່ອມຕໍ່ໃນສະຫມອງບາງແບບ ວິທີການນີ້ເຮັດໃຫ້ນັກວິໄຈສາມາດເບິ່ງໄປທີ່ອົງປະກອບຂອງການເບິ່ງເຫັນພາບ ແລະ ສຸດທ້າຍກໍຈະຮູ້ໄດ້ວ່າ ຍີນຕົວໃດທີ່ເຊວປະສາດ “ເປີດການເຮັດວຽກງານ” ເພື່ອທີ່ຈະໃຫ້ເກີດການເຊື່ອມຕົວລະຫວ່າງສະຫມອງກັບຕາທີ່ຖືກຕ້ອງ
ຈາກການສຶກສາ ນັກວິໄຈພົບວ່າ ໂມເລກຸນໂປຕີນທີ່ຊື່ Contactin-4 ນັ້ນມີການສະແດງອອກທີ່ຄ່ອນຂ້າງມີຄວາມສະເພາະເຈາະຈົ່ງກັບການເຮັດໃຫ້ພາບສະຖຽນ ໂດຍເມື່ອນັກວິໄຈເຮັດໃຫ້ຍີນ Contactin-4 ປ່ຽນແປງໄປດ້ວຍການຕັດຕໍ່ພັນທຸກຳ ວົງຈົນກໍບໍ່ສາມາດເຮັດວຽກໄດ້ຢ່າງປົກກະຕິ ແລະ ເຊວເບິ່ງເຫັນພາບກໍບໍ່ໄດ້ເຮັດວຽກໄດ້ຢ່າງປົກກະຕິໃນສະຫມອງ ໃນທາງກົງກັນຂ້າມ ເມື່ອເຕີມ Contactin-4 ເຂົ້າໄປໃນເຊວທີ່ປົກກະຕິບໍ່ໄດ້ມີການສ້າງ ໂປຕີນທີ່ເພີ່ມຂຶ້ນມານີ້ກໍເຮັດໃຫ້ເຊວສ້າງວົງຈົນເພື່ອໃຫ້ສະຫມອງກັບຕາເຊື່ອມຕໍ່ກັນໄດ້ສະຖຽນ
ຈາກການຄົ້ນພົບເຫລົ່ານີ້ ດຮ. ຮູເບີລ໌ແມນ ໄດ້ຕັ້ງສົມມຸດຖານວ່າ ໜ້າຈະມີຍີນບາງກຸ່ມທີ່ເຮັດໃຫ້ເຊວປະສາດທີ່ຖືກຕ້ອງສ້າງວົງຈົນທີ່ຖືກຕ້ອງໄດ້ ແລະຍີນເຫລົ່ານີ້ກໍໜ້າຈະມີຄວາມສຳຄັນຕໍ່ການຮັບຮູ້ພາບທີ່ຖືກຕ້ອງ
“ຫ້ອງປະຕິບັດການວິໄຈຂອງເຮົາມີຄວາມສົນໃຈທີ່ຈະສ້າງການເຊື່ອມຕໍ່ແລະສ້າງວົງຈົນໃໝ່ທີ່ເສຍໄປຈາກການບາດເຈັບ ຫຼື ພະຍາດຮ້າຍ ໃຫ້ກັບມາເຮັດວຽກໄດ້ອີກເທື່ອ” ດຮ. ຮູເບີລ໌ແມນກ່າວ