ໂຮງແຮມແຫ່ງໜື່ງຢູ່ຍີ່ປຸ່ນກຽມເປີດໂຕວຫຸ່ນຍົນພະນັກງານຕ້ອນຮັບ ເຊີ່ງມີທັງຫຸ່ນຍົນພະນັກງານສາວງາມ ຫຸ່ນຍົນໄດໂນເສົາ ຫຸ່ນຍົນຕ໌ຂົນກະເປ໋າ ແລະ ຫຸ່ນຍົນຂະໜາດນ້ອຍຖ້າໃຫ້ບໍລິການໃນຫ້ອງພັກ
ຄລິບຈາກ Thai PBS
ໂຮງແຮມເຮນນະ ຫຼື “ໂຮງແຮມປະຫຼາດ” ມີຈຸດຂາຍຢູ່ທີ່ການໃຊ້ພະນັກງານຫຸ່ນຍົນເບິ່ງແຍງຜູ້ເຂົ້າພັກ ນອກຈາກຫຸ່ນຍົນພະນັກງານສາວງາມແລ້ວ ຍັງມີຫຸ່ນຍົນໄດໂນເສົາ ເຮັດຫນ້າທີ່ຕ້ອນຮັບ ໂດຍຫຸ່ນຍົນສາມາດເວົ້າໄດ້ເຖິງ 4 ພາສາ ຍີ່ປຸ່ນ ອັງກິດ ຈີນແລະ ເກົາຫຼີ ຫຸ່ນຍົນພະນັກງານຕ້ອນຮັບສາວງາມທັກທາຍແຂກທີ່ເຂົ້າພັກໃນໂຮງແຮມເຮນນະດ້ວຍສຽງທີ່ອ່ອນຫວານພ້ອມກັບຮອຍຍິ້ມສ້າງຄວາມປະທັບໃຈໃຫ້ກັບຜູ້ທີ່ມາເຂົ້າພັກ
ເມື່ອລົງຊື່ເຂົ້າພັກທີ່ໂຮງແຮມແລ້ວ ກໍຈະມີຫຸ່ນຍົນນຳກະເປົ໋າໄປສົ່ງໃຫ້ເຖິງຫ້ອງພັກໂດຍຜູ້ເຂົ້າພັກບໍ່ຕ້ອງຖືຄີກາດຈ໌ ຫຼື ກະແຈຫ້ອງ ເພາະບ່ອນນີ້ຈະໃຊ້ລະບົບສະແກນໃບໜ້າເພື່ອເປີດປະຕູ
ນອກຈາກນີ້ ພາຍໃນຫ້ອງພັກຍັງມີຫຸ່ນຍົນໂຕນ້ອຍຮູບຮ່າງຄ້າຍດອກທິວລິບ ເຮັດຫນ້າທີ່ຮັບຄຳສັ່ງຂອງຜູ້ເຂົ້າພັກແລະປັບແສງສະວ່າງ ສ່ວນອຸນຫະພູມໃນຫ້ອງກໍແສນສະບາຍ ເພາະມີລະບົບກວດຈັບອຸນຫະພູມຮ່າງກາຍແລະປັບອຸນຫະພູມໃຫ້ເໝາະສົມ ເພື່ອໃຫ້ຜູ້ເຂົ້າພັກຮູ້ສຶກຜ່ອນຄາຍຫຼາຍທີ່ສຸດ
ທ່ານຮິເດໂອະ ຊາວາດະ ຜູ້ບໍລິຫານບໍລິສັດນຳທ່ຽວລາຄາຍ່ອມເຍົາ “ເອດໄອເອສ” ບອກວ່າ ເຖິງວ່າຫຸ່ນຍົນບໍ່ສາມາດແທນທີ່ຄົນໄດ້ ແຕ່ກໍມີຄວາມສຸພາບແລະເປັນມິດບໍ່ຕ່າງກັນ ໂດຍລາຄາທີ່ພັກຢູ່ໃນລາຄາທີ່ສະບາຍກະເປົ໋າພຽງແຕ່ຄືນລະ 450.000 ກີບເທົ່ານັ້ນ