ພິທີເຊັນບັນທຶກຄວາມເຂົ້າໃຈໂຄງການເຂື່ອນໄຟຟ້ານ້ຳຕົກນ້ຳຊຳ 4 ຢູ່ເມືອງຊຳເໜືອ ແຂວງຫົວພັນ ລະຫວ່າງລັດຖະບານແຫ່ງ ສປປ ລາວ ກັບບໍລິສັດ ຊີມອງ ທີ່ປຶກສາດ້ານການລົງທຶນພາຍໃນ ແລະ ຕ່າງປະເທດ ຈຳກັດ ໄດ້ຈັດຂຶ້ນໃນວັນທີ 22 ມີນາ 2013 ນີ້ ທີ່ກະຊວງແຜນການ ແລະ ການລົງທຶນ.
ການລົງນາມໃນບົດບັນທຶກຄັ້ງນີ້ ຕາງໜ້າໃຫ້ລັດຖະບານລາວ ແມ່ນທ່ານ ດຣ.ບຸນທະວີ ສີສຸພັນທອງ ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນ ແລະ ຕາງໜ້າບໍລິສັດແມ່ນທ່ານ ຈັງເທຈິນ ປະທານໃຫຍ່ບໍລິສັດຊີມອງ ທີ່ປຶກສາດ້ານການລົງທຶນພາຍໃນ ແລະ ຕ່າງປະເທດ ຈຳກັດ ພ້ອມດ້ວຍການເຊັນເປັນສັກຂີພິຍານຂອງພາກສ່ວນທີ່ກ່ຽວຂ້ອງ ໂດຍເປັນກຽດເຂົ້າຮ່ວມຂອງທ່ານ ສີນາວາ ສຸພານຸວົງ ລັດຖະມົນຕີຊ່ວຍວ່າການກະຊວງພະລັງງານ ແລະ ບໍ່ແຮ່ ທ່ານ ວັນໄຊ ແພງສົມມາ ຮອງເຈົ້າແຂວງຫົວພັນ ອຳນວຍການໃຫຍ່ລັດວິສາຫະກິດໄຟຟ້າລາວ ພ້ອມດ້ວຍຜູ້ກ່ຽວຂ້ອງທັງສອງຝ່າຍເຂົ້າຮ່ວມ.
ໂຄງການເຂື່ອນໄຟຟ້ານ້ຳຕົກນ້ຳຊຳ 4 ຢູ່ເມືອງຊຳເໜືອ ແຂວງຫົວພັນ ແມ່ນມີກຳລັງ 50-100 ເມກາວັດ ນອກຈາກນີ້ຢູ່ບໍລິເວນເຂື່ອນດັ່ງກ່າວຍັງຈະພັດທະນາ ເປັນສວນສະໜຸກ ສະຕູດີໂອຄົບວົງຈອນ ສະຖານທີ່ບັນເທີງ ສວນສາທາລະນະ ແລະ ສິ່ງອື່ນໆອີກຫຼາຍຢ່າງ ເພື່ອເປັນສະຖານທີ່ທ່ອງທ່ຽວແຫ່ງໜຶ່ງໃຫ້ກັບນັກທ່ອງທ່ຽວທັງພາຍໃນ ແລະ ຕ່າງປະເທດ.
ທີ່ມາhttp://www.vientianemai.net