ການແຂ່ງຂັນເຕະບານ ຮຸ່ນອາຍຸບໍ່ເກີນ 20 ປີ ຫຼື ຢູ-20 ຊີງແຊ້ມໂລກ ທີ່ປະເທດນິວຊີແລນ ເປັນເຈົ້າພາບ ເມື່ອວັນທີ 17 ມິຖຸນາ ຜ່ານມາ, ຮອບຮອງ ຊະນະເລີດ ຫຼື ຮອບ 4 ທີມ ສຸດທ້າຍ ລະຫວ່າງ ທີມຊາດ ເບຣຊິລ ໜຶ່ງໃນທີມເຕັງແຊ້ມ ພົບກັບ ທີມຊາດເຊເນກັລ ທີມມ້າມືດຈາກອັຟຟຣິກາ.
ໃນຮອບແບ່ງກຸ່ມ ເບຣຊິລ ເປັນແຊ້ມກຸ່ມ E ມີ 9 ຄະແນນ ເຕັມ ຊະນະ ໄນຈີເຣຍ 4-2, ຊະນະ ຮົງກາລີ 2-1 ແລະ ຊະນະ ສປປ ເກົາຫຼີ 3-0, ສ່ວນ ໃນຮອບ 16 ທີມ ເອົາຊະນະ ອຸຣຸໄກວ 5-4 ໃນການຍິງຈຸດໂທດ ຫຼັງຈາກເວລາປົກກະຕິ ແລະ ຕໍ່ໄລຍະເວລາພິເສດ ສະເໝີກັນ 0-0 ປະຕູ ກ່ອນຈະ ເອົາຊະນະ ປອກຕຸຍການ ດ້ວຍການດວນຈຸດໂທດເຊັ່ນກັນ ໃນ ຮອບ 8 ທີມສຸດທ້າຍ ຂະນະທີ່ ເຊເນກັລ ເປັນ 1 ໃນ 4 ທີມ ອັນດັບ 3 ທີ່ມີຄະແນນດີທີ່ສຸດ ເຊິ່ງໃນຮອບ 16 ທີມ ດວນດັບຝັນຈຸດໂທດ ຢູເຄຣນ 3-1, ຫຼັງຈາກສະເໝີກັນໃນເວລາ ປົກກະຕິ 1-1 ທະລຸເຂົ້າເຖິງ ຮອບ 8 ທີມສຸດທ້າຍ ເປັນຄັ້ງ ປະຫວັດສາດ ກ່ອນຈະບຽດ ເອົາຊະນະ ອຸຊເບກິສະຖານ ຫວຸດຫວິດ 1-0 ປະຕູ.
ຜ່ານການແຂ່ງຂັນປາກົດວ່າ ເບຣຊິລ ເປັນຝ່າຍທີ່ຫຼິ້ນໄດ້ເໜືອກວ່າ ເອົາຊະນະ ເຊເນກັລ ໄປແບບຖະຫຼົ່ມຖະລາຍເຖິງ 5-0 ປະຕູ, ໂດຍໄດ້ປະຕູຈາກ ຄໍເຣຍ ນາທີ 5, ກີລເຮີເມ ນາທີ 7 ກັບ 78, ບອສຊິລເລຍ ນາທີ 19 ແລະ ຈອສ ໂອລິເວຍຣາ ນາທີ 35 ສົ່ງຜົນໃຫ້ ບຣາຊິລ ຜ່ານເຂົ້າຮອບຊີງຊະນະເລີດໄດ້ສຳເລັດ ເຊິ່ງຈະໄປພົບກັບ ເຊີ ເບຍ ທີ່ເອົາຊະນະ ມາລີ ໄປ ຫວຸດຫວິດ ໃນໄລຍະຕໍ່ເວລາ ພິເສດ 2-1 ປະຕູ. ສຳລັບຮອບ ຊີງ-ຊະນະເລີດ ແລະ ຊີງອັນ ດັບ 3 ຈະແຂ່ງຂັນໃນວັນທີ 20 ມິຖຸນານີ້.
