ທາງການເກົາຫລີໃຕ້ ເລີ່ມມາດຕະການພົ່ນຢາຂ້າເຊື້ອໃນສະຖານທີ່ສາທາລະນະທັງໝົດ 9,973 ແຫ່ງ ຈົນເຖິງວັນທີ 21 ມິຖຸນານີ້ ເພື່ອສະກັດກັ້ນໄວຣັດ MERS-CoV ທີ່ກຳລັງລະບາດ ໃນຂະນະທີ່ມີຜູ້ຕິດເຊ່ື້ອເສຍຊີວິເພີ່ມອີກ 3 ຄົນ ລວມເປັນ 19 ຄົນ.
ສຳນັກຂ່າວຕ່າງປະເທດ ລາຍງານໃນວັນທີ 17 ມິຖຸນານີ້ວ່າ ເຈົ້າໜ້າທີ່ສາທາລະນະສຸກຂອງເກົາຫລີໃຕ້ ໄດ້ຖືກຄຳສັ່ງໃຫ້ລົງສີດພົ່ນຢາຂ້າເຊື້ອ ຕາມຮ້ານອິນເຕີເນັດຢ່າງລະອຽດ ຕະຫລອດຮອດເຄື່ອງຄອມພິວເຕີ້, ຫູຟັງ, ໂຕະ, ຕັ່ງ ພາຍໃນຮ້ານ ສ່ວນຕາມສູນສີລະປະການສະແດງ ເຈົ້າໜ້າທີ່ກໍໄດ້ເດີນທາງໄປສີດພພົ່ນຢາຂ້າເຊື້ອທົ່ວບໍລິເວນພາຍໃນ ເຊິ່ງການສີດພົ່ນຢາຂ້າເຊື້ອໃນສະຖານທີ່ສາທາລະນະດັ່ງກ່າວ ທົ່ວນະຄອນຫລວງເຊອູນ ຈະດຳເນີນໄປຈົນເຖິງວັນທີ 21 ມິຖຸນາ ເພື່ອສະກັດເຊື້ອໄວຣັດ MERS-CoV ບໍ່ໃຫ້ມີການແຜ່ລະບາດໃນຊຸມຊົນ.
ທັງນີ້ ກະຊວງສາທາລະນະສຸກ ແລະ ສະຫວັດດີການຂອງເກົາຫລີໃຕ້ ໄດ້ລາຍງານລ່າສຸດວ່າ ປັດຈຸບັນມີຜູ້ຕິດເຊື້ອໄວຣັດດັ່ງກ່າວ ເສຍຊີວິເພີ່ມອີກ 3 ຄົນ ລວມເປັນ 19 ຄົນ ແລະ ມີຜູ້ຕິດເຊື້ອລາຍໃໝ່ອີກ 4 ຄົນ ລວມເປັນທັງໝົດ 154 ຄົນ.