ເພື່ອ​ເປັນ​ການ​ຜັນ​ຂະຫຍາຍແຜນ​ຍຸດ​ທະ​ສາດ ປະຕິ​ຮູບ​ການສຶກ​ສາ​ແຫ່ງ​ຊາດ ແລະ ປະຕິບັດຕາມ​ແຜນການ ກະຊວງ​ສຶກ​ສາທິ​ການ ແລະ ກີລາ ທີ່​ຈັດ​ຕັ້ງ​ການສອບເສັງ​ລະດັບ​ຊາດ​ຂຶ້ນ​ທຸກໆ​ປີ ກໍ່​ຄື​ແຜນ​ພັດທະນາ​ການ​ສຶກ​ສາຂອງ​ພະ​ແນກ​ສຶກ​ສາ​ທິ​ການ ແລະ ກີລາ ນະຄອນຫຼວງ​ວຽງ​ຈັນ ແລະ ແຜນການ​ຮຽນ-ການ​ສອນ ປະຈຳ​ສົກຮຽນ 2014-2015 ຂອງໂຮງຮຽນ​ມັດທະຍົມ​ສຶກ​ສາ​ສົມບູນ​ວຽງ​ຈັນ ວຽກ​ງານ​ການ​ສ້າງນັກຮຽນ​ເກ່ງ ໂດຍ​ສະເພາະແມ່ນ​ນັກຮຽນ​ຂັ້ນ ມ4 ແລະ ມ7 ເພື່ອ​ເຂົ້າ​ສອບເສັງ​ແຕ່​ຂັ້ນ​ເມືອງ ຈົນ​ເຖິງ​ຂັ້ນ​ລະດັບ​ປະເທດ.

ທ່ານ​ນາງ ວຽງ​ສຸວັນ ພະໄຊ​ສົມບັດ ຮອງ​ຜູ້ອຳນວຍການໂຮງຮຽນ ໄດ້​ກ່າວ​ວ່າ: ສົກຮຽນ 2014-2015 ພາຍຫຼັງ​ທີ່​ຄັດເລືອກ​ນັກຮຽນ​ກຸ່ມ​ເປົ້າ​ໝາຍ ໂດຍ​ການ​ເປີດ​ການ​ສອບເສັງ​ຄັດເລືອກ​ມາ​ແຕ່​ເດືອນ​ກັນຍາ 2014 ສະເພາະ​ຊັ້ນ ມ7 ວິຊາ​ພາສາລາວ-ວັນນະຄະດີ ຟີ​ຊິກ​ສາດ ແລະ ຄະນິດສາດ ຄັດ​ເອົາ​ວິຊາລະ 30 ຄົນ ວິຊາ​ເຄ​ມີ​ສາດ 20 ຄົນ ສ່ວນ ມ4 ຄັດ​ເອົາ​ວິຊາ​ລະ 20 ຄົນ ຈາກ​ນັ້ນ ກໍ່​ເລີ່ມ​ຈັດ​ຕັ້ງການ​ຮຽນ​ບຳລຸງ ສະເລ່ຍ​ເປັນເວລາ 6 ເດືອນ ແລະ ສອບເສັງຄັດ​ເລືອກ​ຢູ່​ພາຍ​ໃນ​ໂຮງຮຽນ 2 ຄັ້ງ ເພື່ອ​ຄັດ​ເອົາ​ຜູ້​ທີ່​ມີ​ຄະແນນສູງ​ສຸດ​ ເປັນ​ຕົວ​ແທນ​ເຂົ້າ​ຮ່ວມການ​ສອບເສັງ​ຂັ້ນ​ເມືອງ ນະຄອນ​ຫຼວງ ແລະ ຂັ້ນ​ປະເທດ.

ເພາະ​ໃນ​ສົກຮຽນ​ນີ້ ໂດຍລວມ​ແລ້ວ​ແມ່ນ​ຍັງ​ສາມາດ​ຮັກສາ​ເກນ​ມາດຕະຖານ​ທີ່​ດີ ສາມາດ​ຍາດ​ໄດ້​ອັນ​ດັບ​ໜຶ່ງຂອງ​ປະເທດ ໃນ​ວິຊາ​ຟີ​ຊິກ​ສາດ​ຊັ້ນ ມ4 ແລະ ອັນ​ດັບ​ທີ​ສອງ​ຂອງ​ປະເທດ ໃນ​ວິຊາ​ຟີ​ຊິກ​ສາດ ແລະ ເຄ​ມີສາດຂອງ​ຊັ້ນ ມ7 ມາ​ຄອງ.

ພິທີ​ສະຫຼຸບ​ວຽກ​ງານ​ການສ້າງ​ນັກຮຽນ​ເກັ່ງ​ປະຈຳ​ສົກຮຽນ 2014-2015 ຂອງ ​ມສ ວຽງ​ຈັນ ຈັດ​ຂຶ້ນ​ວັນ​ທີ 4 ມິຖຸນາ 2015 ທີ່ໂຮງຮຽນ​ດັ່ງກ່າວ ໂດຍ​ມີ​ທ່ານ ສຸດ​ທະນີ ໄຊ​ຍະ​ສານ ຮອງ​ຫົວໜ້າ​ພະ​ແນກ​ສຶກ​ສາ​ທິ​ການ ແລະ ກີລາ ນະຄອນຫຼວງ​ວຽງ​ຈັນ ທ່ານຜູ້ອຳນວຍການ​ໂຮງຮຽນ ທ່ານປະທານ​ມູນ​ນິທິ​ສົ່ງເສີມ​ການ​ສຶກສາ ປະທານ​ສະພາ​ໂຮງຮຽນ ສະມາ​ຄົມ​ພໍ່​ແມ່​ນັກຮຽນ ພະນັກງານ ຄູອາຈານ ແລະ ນັກຮຽນ​ເຂົ້າຮ່ວມ.

ແຫລ່ງຂ່າວ: ວຽງຈັນໃໝ່