ສຳນັກຂ່າວຕ່າງປະເທດ ລາຍງານໃນວັນທີ 4 ມິຖຸນານີ້ວ່າ ເຈົ້າໜ້າທີ່ລະດັບສູງຂອງລັດຖະບານຍີ່ປຸ່ນ ໄດ້ຈັດກອງປະຊຸມຮ່ວມກັນກັບສະມາຄົມຜູ້ຜະລິດລິບໄຟຟ້າໂດຍສານ ແຫ່ງປະເທດຍີ່ປຸ່ນ (AEM) ທີ່ນະຄອນຫລວງໂຕກຽວ ໃນມື້ວານນີ້ (3 ມິຖຸນາ) ເພື່ອຫາລືເຖິງແນວທາງການພັດທະນາ ແລະ ຕິດຕັ້ງວິດຖ່າຍພາຍໃນລິບໂດຍສານ ລວມເຖິງຫາລືເຖິງການຈັດຫານ້ຳດື່ມ, ສະບຽງອາຫານ ແລະ ອຸປະກອນທີ່ຈຳເປັນໄວ້ ເພື່ອກໍລະນີສຸກເສີນຈາກໄພພິບັດທາງທຳມະຊາດ ໂດຍສະເພາະແມ່ນແຜ່ນດິນໄຫວ ອັນອາດສົ່ງຜົນສະທ້ອນໃຫ້ລິບຢຸດເຮັດວຽກ.

ທັງນີ້ ກອງປະຊຸມດັ່ງກ່າວ ຈັດຂຶ້ນຢ່າງຮີບດ່ວນທີ່ສຸດ ຫລັງຈາກເຫດການແຜ່ນດິນໄຫວຂະໜາດ 7.8 ແມັກນິຈູດ ຢູ່ທາງພາກໃຕ້ຂອງປະເທດຍີ່ປຸ່ນ ໃນມື້ວັນທີ 30 ພຶດສະພາຜ່ານມາ ເຮັດໃຫ້ມີຜູ້ຕິດຢູ່ໃນລິບທົ່ວປະເທດຍີ່ປຸ່ນ ລວມທັງໝົດ 14 ຄົນ ເຊິ່ງໃນນັ້ນລວມມີຜູ້ສູງອາຍຸ ເຮັດໃຫ້ຜູ້ທີ່ຕິດຢູ່ເກີດພາວະຂາດນ້ຳ ເພາະຕິດຢູ່ໃນລິບດົນຫລາຍຊົ່ວໂມງ ເຊິ່ງລັດຖະບານໄດ້ສະເໜີໃຫ້ມີການພິຈາລະນາ ຕິດຕັ້ງວິດຖ່າຍແບບພັບເກັບມ້ຽນໄດ້ ໂດຍໃຊ້ວັດສະດຸດູດຊືມຄວາມຊຸ່ມ ແລະ ປ້ອງກັນກິ່ນເໝັນ ໂດຍທາງຜູ້ຜະລິດຈະຕ້ອງເອົາແນວຄິດດັ່ງກ່າວໄປອອກແບບ ແລະ ນຳສະເໜີລາຍລະອຽດຜະລິດຕະພັນຂອງຕົນຕໍ່ລັດຖະບານ.