ນົມແມ່ເປັນອາຫານທີ່ດີທີ່ສຸດສຳລັບລູກນ້ອຍເພາະນົມແມ່ເຕັມໄປດ້ວຍສານອາຫານທີ່ມີປະໂຫຍດຕໍ່ການຈະເລີນເຕີບໂຕຂອງລູກດັ່ງນັ້ນການລ້ຽງລູກດ້ວຍນົມແມ່ຈຶ່ງເປັນເລື່ອງທີ່ແມ່ຄວນໃຫ້ການເບິ່ງແຍງແລະໃສ່ໃຈເປັນພິເສດ
ຂັ້ນຕອນການກຽມໂຕເປັນແມ່ເລີ່ມຂຶ້ນຕັ້ງແຕ່ແມ່ຮູ້ຕົວວ່າຖືພາຈົນຮອດມື້ທີ່ລູກນ້ອຍມືນຕາອອກມາເບິ່ງໂລກບົດບາດທີ່ສຳຄັນຂອງແມ່ອີກຢ່າງໜຶ່ງໄດ້ເລີ່ມຂຶ້ນນັ້ນຄືການໃຫ້ລູກນ້ອຍໄດ້ດື່ມກິນນົມຈາກເອິກຂອງແມ່ເອງຄົນເປັນແມ່ຈະຕ້ອງຕັ້ງໃຈແລະໝັ້ນໃຈວ່າຕົນເອງສາມາດໃຫ້ນົມລູກໄດ້ເຖິງວ່າໄລຍະທໍາອິດຈະມີອຸປະສັກກໍຢ່າທໍ້ແທ້ການໃຫ້ລູກດູດນົມຈະຕ້ອງຈັດທ່າໃຫ້ຖືກຕ້ອງແລະອຸ້ມລູກໃຫ້ຖືກວິທີ
ການດູດນົມທີ່ຖືກຕ້ອງຈະຕ້ອງອົມຫົວນົມໃຫ້ເລິກເຖິງເຕົ້ານົມການທີ່ລູກອົມບໍລິເວນເຕົ້ານົມນໍານັ້ນຈະເຮັດໃຫ້ນ້ຳນົມໄຫລສະດວກແລະແມ່ຈະບໍ່ມີບັນຫາຫົວນົມແຕກເຈັບ ໃນຂະນະທີ່ລູກດູດນົມແມ່ຈະຕ້ອງບໍ່ຮູ້ສຶກເຈັບຫົວນົມຖ້າເຈັບສະແດງວ່າລູກດູດບໍ່ຖືກຕ້ອງຕ້ອງຈັດທ່າໃໝ່ໃຫ້ຖືກ
ອີກຢ່າງໜຶ່ງຄືຄວນໃຫ້ລູກດູດນົມເທື່ອລະຂ້າງຈົນກ້ຽງເຕົ້າແລ້ວຈຶ່ງຄ່ອຍປ່ຽນຂ້າງໃໝ່ໃຫ້ລູກດູດວິທີນີ້ຈະຊ່ວຍໃຫ້ແມ່ສ້າງນ້ຳນົມໄດ້ດີຂຶ້ນທີ່ສຳຄັນຄວນໃຫ້ລູກດູດນົມເລື້ອຍໆ ເທົ່າທີ່ພວກເຂົາຕ້ອງການເພາະການທີ່ລູກດູດນົມເລື້ອຍໆຈະເປັນການກະຕຸ້ນໃຫ້ຮ່າງກາຍຂອງແມ່ຜະລິດນ້ຳນົມໄດ້ຫລາຍຂຶ້ນແລະໃນໄລຍະທີ່ໃຫ້ນົມລູກແມ່ຕ້ອງເລືອກກິນອາຫານທີ່ມີປະໂຫຍດແລະດື່ມນ້ຳສະອາດຫລາຍໆຮ່າງກາຍຈະໄດ້ແຂງແຮງຜະລິດ ນ້ຳນົມທີ່ມີຄຸນນະພາບໃຫ້ລູກໄດ້ຫລາຍໆນັ້ນເອງ