ໃນການແຂ່ງຂັນບານເຕະຊາຍໃນຊີເກມ 2015 ທີ່ສິງກະໂປ, ທີມຊາດລາວຈະລົງສະໜາມນັດທຳອິດພົບກັບທີມຊາດໄທ, ໃນວັນສຸກວັນທີ 29 ພຶດສະພາ 2015 ເວລາ 19:30 ໂມງ, ເຊິ່ງກົງກັບເວລາ 20:30 ໃນປະເທດສິງກະໂປ

ທ່ານເດວິດບູດ ຄູເຝີກທີມຊາດລາວໄດ້ນຳພານັກກິລາທົດສອບຄວາມພ້ອມຫຼາຍຄັ້ງ ເຫັນວ່າມີການພັດທະນາອີກຂັ້ນໜຶ່ງ ແລະ ມາຮອດມື້ນີ້ ທັງຄູເຝີກ ແລະ ນັກກິລາທຸກຄົນມີຄວາມພ້ອມເຕັມຮ້ອຍເພື່ອຮັບມືກັບທີມຊາດໄທ ແລະ ທຸກຄົນໄດ້ໃຫ້ຄຳໝັ້ນສັນຍາວ່າຈະເຮັດສຸດຄວາມສາມາດເພື່ອໃຫ້ມີຜົນງານອອກມາດີທີ່ສຸດ ເຖິງແມ່ນວ່າທີມໄທເປັນອີກທີມໜຶ່ງທີ່ມີຄວາມແຂງແກ່ນກໍ່ຕາມ.

ສຳລັບການແຂ່ງຂັນເຕະບານຊາຍ ຢູ່ຊີເກມ ແບ່ງອອກເປັນ 2 ກຸ່ມ ໃນນີ້ທີມຊາດລາວຢູ່ ກຸ່ມ B ເຊິ່ງນັດທຳອິດຈະພົບກັບທີມຊາດໄທ ໃນວັນທີ 29 ພຶດສະພາ 2015, ນັດທີ 2 ຈະພົບກັບທີມຊາດບຣູໄນ ໃນວັນທີ 31 ພຶດສະພາ 2015, ນັດທີ 3 ຈະພົບກັບທີມຊາດ ຫວຽດນາມ ໃນວັນທີ 4 ມີຖຸນາ 2015, ນັດທີ 4 ຈະພົບກັບທີມຊາດ ຕີມໍເລສເຕ ໃນວັນທີ 9 ມີຖຸນາ 2015 ແລະ ນັດສຸດທ້າຍຂອງຮອບທຳອິດຈະພົບກັບ ທີມຊາດ ມາເລເຊຍ ໃນວັນທີ 11 ມີຖຸນາ 2015, ທຸກນັດທີ່ລາວລົງແຂ່ງຂັນແມ່ນ ເວລາ 19:30 ໂມງ ຕາມເວລາບ້ານເຮົາ.

ກຽມຕິດຕາມທີ່ໜ້າຈໍນຳກັນໄດ້ທົ່ວປະເທດທາງໂທລະພາບຊ່ອງ TV Lao HD, ຢ່າລືມເປັນກຳລັງໃຈໃຫ້ນັກກິລານຳກັນເດີ