ສຳນັກຂ່າວຕ່າງປະເທດ ລາຍງານໃນວັນທີ 27 ພຶດສະພາຜ່ານມານີ້ວ່າ ບໍລິສັດຊຳຊຸງ ເອເລັກໂຕຣນິກ ເຊິ່ງເປັນຜູ້ຜະລິດເຄື່ອງໃຊ້ໄຟຟ້າລາຍໃຫຍ່ຂອງເກົາຫລີໃຕ້ ແລະ ຜູ້ຜະລິດໂທລະພາບລະດັບໂລກ ໄດ້ເປີດເຜີຍໃນມື້ວັນພະຫັດທີ 21 ພຶດສະພາຜ່ານມາ ວ່າຈະຢຸດການຜະລິດໂທລະພາບຢູ່ໂຮງງານໃນປະເທດໄທ ພາຍໃນໄຕມາດທຳອິດຂອງປີນີ້ ຫລັງຈາກທີ່ທາງບໍລິສັດ ໄດ້ລົງທຶນຈຳນວນມະຫາສານ ເພື່ອໄປຕັ້ງໂຮງງານໃໝ່ເພື່ອຜະລິດເຄື່ອງໃຊ້ໄຟຟ້າ ຢູ່ປະເທດ ສສ ຫວຽດນາມ ແທນ.
ທັງນີ້ ບໍລິສັດຊຳຊຸງ ໄດ້ລົງທຶນຫລາຍກ່ວາ 560 ລ້ານໂດລາ ເພື່ອສ້າງໂຮງງານໃໝ່ຢູ່ຫວຽດນາມ ເພື່ອເພີ່ມກຳລັງການຜະລິດຢູ່ໃນປະເທດທີ່ມີຄ່າໃຊ້ຈ່າຍ ໃນການດຳເນີນທຸລະກິດຕ່ຳກ່ວາ, ແນວໃດກໍຕາມ ທາງບໍລິສັດຍັງບໍ່ໄດ້ເປີດເຜີຍເທື່ອວ່າ ຈະມີການຍ້າຍການຜະລິດໂທລະພາບ ອອກຈາກປະເທດໄທ ໄປຍັງຫວຽດນາມ ຫລື ບໍ່ ມີພຽງແຕ່ວ່າ ໄດ້ປະກາດຢຸດຕິການຜະລິດແຕ່ຢ່າງດຽວເທົ່ານັ້ນ.
ນອກຈາກນັ້ນແລ້ວ, ບໍລິສັດ ແອວຈີ ເອເລັກໂຕຣນິກ ຜູ້ຜະລິດເຄື່ອງໃຊ້ໄຟຟຟ້າລາຍໃຫຍ່ຂອງຈີນອີກແຫ່ງໜຶ່ງ ເຊິ່ງຄອງອັນດັບ 2 ໃນຕະຫລາດການຜະລິດໂທລະພາບຢູ່ໃນໂລກ ກໍຈະຍ້າຍຖານການຜະລິດອອກຈາກປະເທດໄທ ໄປຍັງຫວຽດນາມອີກເຊັ່ນດຽວກັນໃນໄວໆນີ້ ເນື່ອງຈາກຫວຽດນາມມີຄ່າແຮງງານທີ່ຖືກກ່ວາ ແລະ ຍັງຢູ່ໃກ້ກັບປະເທດຈີນກ່ວາອີກດ້ວຍ.