ທ່ານ ບາກ​ບີ​ແອ ເດີ​ລາ​ແຊ (Mr. Barbier Delaserre) ຜູ້ໃຫ້​ທຶນ​ອົງ­ການ​ເດັກ​ອາ­ຊີ ປະ­ເທດຝຣັ່ງ (EA) ໄດ້​ມອບ​ທຶນ​ຊ່ວຍ​ປຸກສ້າງ​ຫ້ອງ​ຮຽນ ມ ຕົ້ນ ແຕງ​ວາງ ເປັນ​ເງິນຈຳ­ນວນ 352 ລ້ານ​ກີບ ໃຫ້​ອຳ­ນາດ​ການ​ປົກ­ຄອງ​ບ້ານແຕງ​ວາງ ເມືອງ​ປາກ​ແບງ ແຂວງອຸ­ດົມ​ໄຊ ເນື່ອງ​ໃນ​ໂອ­ກາດທີ່​ທ່ານ​ໄດ້​ລົງ​ຢ້ຽມ­ຢາມ​ພົບ​ປະ​ຄູ-ອາ­ຈານ ແລະ ນ້ອງ​ນັກ­ຮຽນໂຮງ­ຮຽນ​ເປົ້າ​ໝາຍ​ຂອງ​ອົງ­ການ ເມື່ອ​ພົບ​ເຫັນ​ໂຮງ­ຮຽນ​ຍັງ​ມີຄວາມ​ຂາດ­ເຂີນ​ ນັກ­ຮຽນ​ກໍ່ຫຍຸ້ງຍາກ ຈຶ່ງ​ໄດ້​ນຳ​ເອົາ​ເງິນ​ຈຳ­ນວນດັ່ງ­ກ່າວ​ມາ​ມອບ​ໃຫ້​ທາງ​ອຳ­ນາດການ​ປົກ­ຄອງ​ ບ້ານ ເພື່ອ​ສ້າງ​ໃຫ້ໂຮງ­ຮຽນ​ກາຍ­ເປັນ​ໂຮງ­ຮຽນ​ຕົວແບບ​ຂອງ​ອົງ­ການ ແລະ ສ້າງ​ໂອກາດ​ໃຫ້ເດັກ­ນ້ອຍ​ໄດ້​ຮັບ​ການ​ສຶກສາ​ທີ່​ດີ.

ວັນ​ທີ 15 ພຶດ­ສະ­ພາ 2015 ທີ່​ໂຮງ­ຮຽນ​ບ້ານ​ແຕງ​ວາງ ອຳນາດ​ການ​ປົກ­ຄອງ​ບ້ານ​ແຕງວາງ ຈຶ່ງ​ໄດ້​ຈັດ​ພິ­ທີ​ລົງ​ນາມ​ເຊັນ​ສັນ­ຍາໂຄງ­ການ​ກໍ່­ສ້າງ ຫ້ອງ​ຮຽນ​ມັດທະ​ຍົມ​ຕອນ​ຕົ້ນແຕງ​ວາງ ຕາງໜ້າ​ລົງ​ນາມ​ແມ່ນ​ທ່ານ ຄຳ​ສຸຍ ນາຍ­ບ້ານ​ແຕງ​ວາງ ໃນ​ນາມ​ເຈົ້າຂອງໂຄງ­ການ ແລະ ທ່ານຈານ ຄຳ ຈັນ­ທະ​ພາ­ນິດ ຜູ້​ອຳ­ນວຍການ​ບໍ­ລິ­ສັດວັງ​ຄຳ​ກໍ່­ສ້າງ ເປັນຜູ້​ຮັບ​ເໝົາ ໂດຍ​ມີ​ທ່ານ ຈິນ­ດາວົງ ສົມ​ສາ­ມາດ ຮອງ​ຫົວ­ໜ້າພະ​ແນກ​ສຶກ​ສາ​ທິ​ການ ແລະ ກີລາ ແຂວງ​ອຸ­ດົມ​ໄຊ ທ່ານ ບາກ​ບີແອ ເດີ​ລາ​ແຊ ຜູ້​ໃຫ້​ທຶນ​ການກໍ່­ສ້າງ​ອົງ­ການ​ເດັກ​ອາ­ຊີ​ປະ­ເທດຝຣັ່ງ ຫົວ­ໜ້າ​ຫ້ອງ­ການ​ສຶກ​ສາທິ​ການ ແລະ ກີ­ລາ ເມືອງ​ປາກແບ່ງ ຄະ­ນະ​ພັດ­ທະ­ນາ​ການ​ສຶກສາ​ຂັ້ນ​ບ້ານ ແລະ ຄູ-ອາ­ຈານພາຍ​ໃນ​ໂຮງ­ຮຽນ​ເຂົ້າ​ຮ່ວມ.

ສຳ­ລັບ​ໂຄງ­ການ​ກໍ່­ສ້າງ​ໂຮງຮຽນ​ດັ່ງ­ກ່າວມີ​ມູນ​ຄ່າ 352 ລ້ານ​ກີບ ປະ­ເພດ​ການ​ກໍ່­ສ້າງແມ່ນຫ້ອງ​ຮຽນ​ແບບ​ຖາ­ວອນ ຊັ້ນ 1 ຈຳ­ນວນ 1 ຫຼັງ ຂະ­ໜາດ 7,50X28 ແມັດ ປະ­ກອບ​ມີ 4 ຫ້ອງ​ຮຽນ ແລະ 1 ຫ້ອງ­ການ ມີອຸ­ປະ­ກອນ​ເຟີ​ນີ​ເຈີ​ຄົບ​ຊຸດ ພາຍ­ຫຼັງຫ້ອງ​ຮຽນຫຼັງ​ນີ້​ກໍ່­ສ້າງ​ສຳ­ເລັດແລ້ວ ຈະ​ເຮັດ​ໃຫ້​ຊຸມ​ຊົນ ແລະ ບັນ­ດາ​ນ້ອງ​ນັກ­ຮຽນ​ໄດ້​ມີ​ບ່ອນ​ສຶກ​ສາຮ່ຳ­ຮຽນ​ຢູ່​ໃນ​ສະ­ພາບ​ແວດລ້ອມ​ທີ່​ ດີ ແລະ ຫຼຸດ­ຜ່ອນ​ຄວາມແອ​ອັດ​ຈາກ​ຈຳ­ນວນ​ນັກ­ຮຽນ​ທີ່ເພີ່ມ​ຂຶ້ນ​ໃນ​ແຕ່​ລະ​ປີ ໂຄງ­ການນີ້​ເລີ່ມ​ລົງ­ມື​ກໍ່­ສ້າງ​ຕັ້ງ­ແຕ່​ກາງເດືອນ​ພຶດ­ສະ­ພາ  ແລະ ໃຫ້ສຳເລັດ​ເດືອນ​ກໍ­ລະ­ກົດ 2015.

ແຫລ່ງ​ຂ່າວ: ວຽງ​ຈັນ​ໃໝ່