ເຂົ້າສູ້ໂຄ້ງສຸດທ້າຍແລ້ວ ສຳລັບ ການແຂ່ງຂັນເຕະບານ ພຣີເມຍລີກ ອັງກິດ ເຊິ່ງເຫຼືອການແຂ່ງຂັນອີກພຽງ 2 ນັດ ໂດຍ ເຊລຊີ ໄດ້ແຊ້ມໄປນອນກອດຢ່າງແນ່ນອນແລ້ວ ຂະນະທີ່ ອັນດັບ 2 ຕ້ອງລຸ້ນຕໍ່ລະຫວ່າງ ອາເຊນອລ ກັບ ແມນເຊັດສ໌ເຕີ ຊິຕີ ສ່ວນ ແມນເຊັດສ໌ເຕີ ຢູໄນເຕັດ ໄດ້ອັນດັບ 4 ແບບບໍ່ຕ້ອງສົງໄສ ຕ່າງແຕ່ວ່າ ຈະມີຄະແນນຫ່າງ ລິເວີພູລ ທີມອັນດັບ 5 ຈັກຄະແນນເທົ່ານັ້ນເອງ. ແຕ່ສິ່ງໜ້າສົນໃຈ, ສິ່ງທີ່ຕ້ອງລຸ້ນ ໃນຕອນນີ້ ກໍ່ຄືທີມ ທີ່ຈະຕາມ ເບິນລີ ໄປຫຼິ້ນໃນລີກ ແຊ໋ມປຽນຊິບ ລະດູການໜ້າ ໂດຍມີ ແອສຕັນ ວິລລາ, ເລສເຕີ ຊິຕີ, ຊັນເດີແລນ, ນິວຄາສເຊິລ ແລະ ຮັລ ຊິຕີ ທີ່ຫາຍໃຈຍັງຝືດຢູ່.
ແຊ້ມພຣີເມຍລີກ ລະດູການນີ້ ຮູ້ຕັ້ງແຕ່ ນັດທີ 31-32 ໂດຍ ເຊລຊີ ຄູ່ຄວນກັບຕຳແໜ່ງນີ້ຫຼາຍທີ່ສຸດ ເພາະມີຜົນງານດີຕໍ່ເນື່ອງ ພວກເຂົາມີເກມຮັບເປັນທີ 1 ແລະ ເກມບຸກເປັນທີ 2 ມູຣິນໂຢ ກັບມາຄຸມທີມເຊລຊີ ໄດ້ຢ່າງໂດດເດັ່ນ ພຽງ 2 ປີ ກໍ່ຄວ້າແຊ້ມ.
ສ່ວນທີມທີ່ຈະໄດ້ໄປຫຼິ້ນ ຢູຟາ ແຊ້ມປຽນລີກ ມີ ເຊລຊີ, ແມນ ຊິຕີ, ອາເຊນອລ ແລະ ແມນຢູ ເພາະຫຼັງຈາກທີ່ ລິເວີພູລ ບໍ່ຊະນະຈັກເທື່ອ ທີ່ ສະແຕມຟອດ ບຣິດ ກໍ່ສະເໝີ ເຊລຊີ 1-1 ເຮັດໃຫ້ ຫົງແດງ ລິເວີພູລ ຕາມຫຼັງ ຜີສາດແດງ ແມນຢູ ເຖິງ 6 ຄະແນນ ແລະ ປະຕູໄດ້ເສຍເປັນຮອບເຖິງ 14 ປະຕູ.
ໃນໂລກແຫ່ງຈິນຕະນາການ 14 ປະຕູ ກັບເກມທີ່ເຫຼືອອີກ 2 ນັດ ຟິລິບເປ ຄູຕິນໂຢ, ສະຕີເວັນ ເຈີຣາດ, ແລະ ຮາຣິມ ສະເຕີລິງ ຊ່ວຍແບ່ງກັນຍິງໜ້າຈະໄດ້ ແຕ່ໂລກແຫ່ງຄວາມເປັນຈິງ ໂອກາດມີບໍ່ຮອດ 1 ເປີເຊັນ ຄື ແມນຢູ ຕ້ອງເສຍໃນ 2 ນັດທີ່ເຫຼືອກັບເກມເປີດບ້ານພົບກັບ ອາເຊນອລ ແລະ ບຸກໄປຢາມ ຮັລ ຊິຕີ ຂະນະທີ່ ລິເວີພູລ ຕ້ອງເປີດ ແອນຟິລ ຊະນະ ຄຣິສຕັນ ພາເລຊ ແລະ ບຸກໄປຊະນະ ສະໂຕ໊ກ ຊິຕີ ທັງ 4 ເກມ ຜົນການແຂ່ງຂັນຕ້ອງເປັນແບບນີ້. ແຕ່ຄິດບໍ່ອອກ ໃນ 4 ເກມ ປະຕູໄດ້ເສຍຈະອອກມາເທົ່າ 14 ປະຕູ ເມື່ອຍໃຈແທນ ນັ້ນໝາຍຄວາມວ່າ ແມນຢູ ຕ້ອງເສຍ 3-4 ປະຕູ 2 ເກມຕິດຕໍ່ກັນ ແລະ ລິເວີພູລ ຕ້ອງຊະນະ 3-4 ປະຕູ ໃນ 2 ນັດທີ່ເຫຼືອເຊັ່ນກັນ. ແຕ່ແນວໃດກໍ່ຕາມ ອັນດັບ 5 ບໍ່ຫຼຸດມື ລິເວີພູລ ຢູ່ແລ້ວ ໂດຍ ສະເປີ ກັບ ເຊົາແທມຕັນ ກໍ່ຕ້ອງຍາດອັນດັບ 6-7 ເຊິ່ງອັນດັບ 6 ຈະໄດ້ໄປຫຼິ້ນ ຢູຟາ ຢູໂຣປາລີກ ແລະ ອັນດັບ 7 ກໍ່ຕ້ອງລຸ້ນໃຫ້ ອາເຊນອລ ຊະນະ ແອສຕັນ ວິລລາ ໃນເກມ ເອັຟເອ ຄັບ ຮອບຊີງຊະນະເລີດ ຈຶ່ງຈະໄດ້ໄປຫຼິ້ນໃນລາຍການດັ່ງກ່າວ ແຕ່ຖ້າ ອາເຊນອລ ສົ່ງຜົນໃຫ້ ວິລລາ ທີ່ໄດ້ແຊ້ມ ຄວ້າໂຄຕ້າ ໄປແທນ.

ໃນເລື່ອງດາວຊັລໂວ ພຣີເມຍລີກ ເຊຄິໂອ ກຸນ ອາເກວໂຣ ຍິງແຮດທຣິກ ໄດ້ໃນເກມ ແມນ ຊິຕີ ຖະຫຼົ່ມ ຄວີນປາກ 6-0 ໃນອາທິດຜ່ານມາ ກໍ່ເປັນອັນຈົບໄປ ເພາະຕອນນີ້ ນຳ ແຮຣີ ເຄນ ດາວຮຸ່ງ ສະເປີ ຢູ 5 ປະຕູ ແຕ່ ຖ້າ ເຄນ ສະແດງອະພິນິຫານ ໃນເກມທີ່ເຫຼືອ ແລະ ແຊງ ກຸນ ຄວ້າລາງວັນເກີບຄຳໄປຄອງ
ແຕ່ສິ່ງດຽວທີລໍຖ້າຢູ່ໃນ 2 ນັດທີ່ເຫຼືອຂອງພຣີເມຍລີກ ຄື ທີມໃດຈະເປັນທີມສຸດທ້າຍທີ່ຕົກຊັ້ນຕາມຫຼັງ ເບິນລີ ແລະ ຄວີນປາກ.
5 ທີມຜູ້ໂຊກດີທີ່ມີຊື່ເຂົ້າປະກວດໃນຮອບສຸດທ້າຍໄດ້ແກ່: ຮັລ ຊິຕີ, ຊັນເດີແລນ, ນິວຄາສເຊິລ, ເລສເຕີ ຊິຕີ ແລະ ແອສຕັນ ວິລລາ.
ແລັດໂບຣກ ບໍລິສັດ ຮັບການພະນັນບານຖືກກົດໝາຍຂອງອັງກິດ ໄດ້ເຜີຍອັດຕາສ່ວນຄວາມສ່ຽງຄື: ຮັລ ຊິຕີ 1-3, ຊັນເດີແລນ 5-1, ນິວຄາສເຊິລ 5-1, ເລສເຕີ 33-1 ແລະ ແອສຕັນ ວິລລາ 66-1 ຕົວເລກ ຂອງ ຮັລ ຊິຕີ ຄື ແທງ 3 ຈ່າຍ 1 ວ່າ ຈະຕົກຊັ້ນ ເຊິ່ງໝາຍຄວາມວ່າ ມີໂອກາດສູງກວ່າທີມອື່ນໆ ທີ່ຈະປິວໃນລະດູການໜ້າ ສະຕີຟ ບຣູຊ ໃນເກມ ຮັລ ຊິຕີ ເປີດບ້ານເສຍໃຫ້ ເບິນລີ 0-1 ສະແດງໃຫ້ເຫັນວ່າ ລາວພ້ອມແລ້ວທີ່ຈະພາທີມໄປຫຼິ້ນໃນ ແຊ້ມປ້ຽນຊິບ.
ຂະນະທີ່ ຊັນເດີແລນ ກັບ ນິວຄາສເຊິລ ມີໂອກາດຕົກຊັ້ນ 5-1 ຫຼື ແທງ 1 ຈ່າຍ 5 ໂອກາດຕົກຊັ້ນບໍ່ໜ້ອຍໜ້າຄືກັນ ພຽງແຕ່ກະແຈດອກສຳຄັນ ຢູ່ທີ່ເກມນັດທີ 37 ຊັນເດີແລນ ຕ້ອງຮ້ອງ ເຢ໋…ແລະ ນິວຄາສເຊິລ ຕ້ອງອຸທານວ່າ ໂອຍຕາຍ..ຖ້າເກິດວ່າ ຮັລຊິຕີ ບຸກໄປຊະນະ ສະເປີ ທີ່ ໄວ ຮາດ ເລນ ສ່ວນ ເລສເຕີ ຊິຕີ ກັບ ແອສຕັນ ວິລລາ ຈະຕົກຊັ້ນ ພວກເຂົາຕ້ອງ ເສຍ 2 ນັດທີ່ເຫຼືອ. ລຸ້ນກັນຕໍ່ໄປວ່າ ທີມໃດທີ່ຈະຕົກຊັ້ນເປັນທີມສຸດທ້າຍ ຫຼື ຈະເປັນ ຮັລ ຊິຕີຕາມການວິເຄາະຫຼືບໍ?

ຂ່າວໂດຍ: ແຄ່ງທອງ