ປະທານາທິບໍດີ ສີ ຈິ້ນຜິງ ແຫ່ງປະເທດຈີນ ໄດ້ພົບປະກັບ ທ່ານ ເອຣິກ ຊູ ປະທານພັກກົກມິນຕັງຂອງໄຕ້ຫວັນ ທີ່ນະຄອນຫລວງປັກກິ່ງ ໃນມື້ວັນທີ 4 ພຶດສະພາຜ່ານມານີ້ ເຊິ່ງຖືເປັນການພົບປະລະຫວ່າງຜູ້ນຳ 2 ດິນແດນ ຄັ້ງທຳອິດໃນຮອບ 6 ປີ.
ສຳນັກຂ່າວຕ່າງປະເທດ ລາຍງານໃນວັນທີ 5 ພຶດສະພາຜ່ານມານີ້ວ່າ ທ່ານ ສີ ຈິ້ນຜິງ ຕ້ອງການໃຫ້ທັງສອງຝ່າຍ ໃຫ້ການປຶກສາຫາລືບັນຫາທາງການເມືອງທີ່ແຕກຕ່າງ ບົນພື້ນຖານຂອງຄວາມສະເໝີພາບກັນໄດ້ ແຕ່ຕ້ອງຢູ່ພາຍໃຕ້ຫລັກການນະໂຍບາຍຈີນດຽວ ເຊິ່ງເປັນແນວຄິດທີ່ຊາວໄຕ້ຫວັນສ່ວນໃຫຍ່ຄັດຄ້ານ ໃນຂະນະທີ່ ທ່ານ ເອຣິກ ຊູ ໄດ້ຮຽກຮ້ອງຂໍໂອກາດໃຫ້ໄຕ້ຫວັນ ໄດ້ມີສ່ວນຮ່ວມກັບອົງການລະດັບສາກົນໃຫ້ຫລາຍຂຶ້ນ.