ພິທີປະດັບຫຼຽນກາມິດຕະພາບ (CROSS OF FRIENDSHIP) ໃຫ້ທ່ານ ສຈ.ດຣ. ກິມ ກວານ ຊາງ ປະທານຄະນະບໍລິ
ຫານງານສູນກາງໂທລະພາບລັດຖະບານແຫ່ງ ສ.ເກົາຫຼີ ແລະ ທ່ານ ສຈ.ດຣ. ນາງ ຢູ ຮຽນ ສຸກ ປະທານສະມາຄົມສິລະປິນ
ມວນຊົນແຫ່ງ ສ.ເກົາຫຼີ ໄດ້ມີຂຶ້ນວັນທີ 1 ມີນາ 2013 ຢູ່ສະພາແຫ່ງຊາດ ໂດຍໃຫ້ກຽດປະດັບຫຼຽນຄັ້ງນີ້ໂດຍທ່ານ ສົມພັນ
ແພງຄຳມີ ຮອງປະທານສະພາແຫ່ງຊາດ ມີພະນັກງານກ່ຽວຂ້ອງເຂົ້າຮ່ວມ.
ທ່ານ ສຈ.ດຣ. ກິມ ກວານ ຊາງ ແລະ ທ່ານ ສຈ.ດຣ. ນາງ ຢູ ຮຽນ ສຸກ ເປັນຜູ້ທີ່ມີຜົນງານຄຸນງາມຄວາມດີ ປະກອບສວນ
ຊ່ວຍເຫຼືອທາງດ້ານອຸປະກອນໃຫ້ແກ່ສະພາແຫ່ງຊາດ ສປປ ລາວ ເຊິ່ງແມ່ນລົດຖ່າຍທອດໂທລະພາບ ພ້ອມດ້ວຍອຸປະກອນວິຊາ
ສະເພາະ ໃນວັນທີ 6 ກຸມພາ 2013 ທີ່ຜ່ານມາ ລວມມູນຄ່າ 1.450.000 ໂດລາສະຫະລັດ ຫຼື ປະມານ 11.600.000.000
ກີບ ຜົນງານດັ່ງກ່າວ ເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງ
ສປປ ລາວ ກັບ ສ.ເກົາຫຼີ ສະນັ້ນ ນາຍົກລັດຖະມົນຕີ ແຫ່ງ ສປປ ລາວ ຈຶ່ງໄດ້ອອກດຳລັດວ່າດ້ວຍການປະດັບຫຼຽນກາມິດຕະ
ພາບໃຫ້ສອງທ່ານດັ່ງກ່າວ ແລະ ມອບໃຫ້ສະພາແຫ່ງຊາດ ເປັນຜູ້ຈັດຕັ້ງປະຕິບັດປະດັບຫຼຽນໃຫ້ຢ່າງສົມກຽດ.
ໂອກາດດຽວກັນນີ້ ທັງສອງຝ່າຍ ສປປ ລາວ-ສ.ເກົາຫຼີ ຍັງໄດ້ມີການພົບປະ ແລະ ສົນທະນາກ່ຽວກັບການຊ່ວຍເຫຼືອກູ້ຢືມເງິນ
ເພື່ອລົງທຶນສ້າງເຄືອຂ່າຍລະບົບໄອທີຂອງສະພາແຫ່ງຊາດແບບອອນໄລທົ່ວປະເທດ ປຶກສາຫາລືກ່ຽວກັບໂຄງສ້າງຂອງຕຶກຫໍສະ
ພາຫຼັງໃໝ່ ເພື່ອໃຫ້ແທດເໝາະກັບການຕິດຕັ້ງອຸປະກອນລະບົບໄອທີ ລວມເຖິງການຈະໃຫ້ການຊ່ວຍເຫຼືອສ້າງໂຮງຮຽນປະຖົມຢູ່
ຖ້ຳລານາຄຳ ເມືອງວຽງທອງ ແຂວງຫົວພັນ ເພື່ອເປັນຂອງຂວັນແກ່ທ່ານນາຍົກລັດຖະມົນຕີແຫ່ງ ສປປ ລາວ ແລະ ປຶກສາຫາ
ລືກ່ຽວກັບການຈະນຳເອົາສິລະປິນພື້ນເມືອງ ສ.ເກົາຫຼີ ມາສະແດງຢູ່ ສປປ ລາວ ໃນໂອກາດປີໃໝ່ລາວ ໃນເດືອນເມສາ 2013
ອີກດ້ວຍ.
ທີ່ມາhttp://www.vientianemai.net