ເຈົ້າ​ໜ້າ​ທີ່​ກູ້​ໄພ​ເນ​ປານ ສາ​ມາດ​ຊ່ວຍ​ເຫລືອ​ພໍ່​ຕູ້ ຟັນ​ຊູ ຕາ​ມັງ ອາ​ຍຸ 101 ປີ ລອດ​ຊີ​ວິດ​ໃນ​ຂະ​ນະທີ່​ຕິດ​ຢູ່​ກ້ອງ​ຊາກ​ຫັກ​ພັງ​ຂອງ​ອາ​ຄານ​ບ້ານ​ເຮືອນ ນັບ​ຕັ້ງ​ແຕ່​ມື້​ເກີດ​ແຜ່ນ​ດິນ​ໄຫວ​ເປັນ​ຕົ້ນ​ມາ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 4 ພຶດ​ສະ​ພາ​ນີ້​ວ່າ ເຈົ້າ​ໜ້າ​ທີ່​ກູ້​ໄພ​ສາ​ມາດ​ຊ່ວຍ​ເຫລືອ ພໍ່​ຕູ້ ຟັນຊູ ຕາ​ມັງ ອາ​ຍຸ 101 ປີ ອອກ​ມາ​ຈາກ​ຊາກ​ເຮືອນ​ຂອງ​ລາວ ໃນ​ເຂດນູ​ວາ​ໂກດ ຫ່າງ​ຈາກ​ນະ​ຄອນ​ຫລວງ​ກາດ​ມັນ​ດຸ ໄປ​ທາງ​ທິດ​ຕາ​ເວັນ​ຕົກ​ສຽງ​ເໜືອ​ ປະ​ມານ 80 ກິ​ໂລ​ແມັດ ໃນ​ມື້​ວັນ​ເສົາ (2 ພຶດ​ສະ​ພາ) ທີ່​ຜ່ານ​ມາ ຫລັງ​ຈາກ​ທີ່​ພໍ່​ຕູ້ ຕ້ອງ​ຖືກ​ຝັງ​ທັງ​ເປັນ​ຢູ່​ກ້ອງ​ຊາກ​ເຮືອນ​ດົນ​ເຖິງ 7 ມື້ ນັບ​ຕັ້ງ​ແຕ່​ເກີດ​ແຜ່ນ​ດິນ​ໄຫວ​ລະ​ດັບ 7.8 ແມັກ​ນິ​ຈູດ ຕັ້ງ​ແຕ່​ມື້​ວັນ​ທີ 25 ເມ​ສາ​ເປັນ​ຕົ້ນ​ມາ.

ທ່ານ ອະ​ຣຸນ ກຸ​ມານ ສິງ ເຈົ້າ​ໜ໊າ​ທີ່​ຕຳ​ຫລວດ​ທ້ອ​ງ​ຖິ່ນ​ລະ​ບຸ​ວ່າ ພໍ່​ຕູ້ ຟັນ​ຊູ ຕາ​ມັງ ໄດ້​ຮັບ​ບາດ​ເຈັບ​ພຽງ​ເລັກ​ໜ້ອຍ ບໍ​ລິ​ເວນ​ຂໍ້​ຕີນ ແລະ ມື​ເທົ່າ​ນັ້ນ ໂດຍ​ປັດ​ຈຸ​ບັນ​ລາວ​ໄດ້​ຖືກ​ນຳ​ຕົວ​ສົ່ງ​ໂຮງ​ໝໍ​ປະ​ຈຳ​ເຂດ​ແລ້ວ ແລະ ມີ​ອາ​ການ​ປົກ​ກະ​ຕິ​ດີ.