ລັດຖະມົນຕີການຕ່າງປະເທດຣັດເຊຍລະບຸວ່າ ສະຫະລັດອາເມຣິກາຄືບິດາຜູ້ໃຫ້ກຳເນີດກຸ່ມ IS ຈາກຄວາມລົ້ມເຫລວຂອງນະໂຍບາຍຕໍ່ຕາເວັນອອກກາງ.
ສຳນັກຂ່າວຕ່າງປະເທດ ລາຍງານໃນວັນທີ 23 ເມສານີ້ວ່າ ທ່ານ ເຊີເກ ລາບຣອບ ລັດຖະມົນຕີການຕ່າງປະເທດຣັດເຊຍ ໄດ້ອອກມາລະບຸວ່າ ການຖືກຳເນີດຂອງກຸ່ມຕິດອາວຸດລັດອິດສະລາມ ຫລື IS ນັ້ນ ແມ່ນເປັນຜົນພວງມາຈາກ ຄວາມລົ້ມເຫລວຊ້ຳຊາກຂອງນະໂຍບາຍຕ່າງປະເທດສະຫະລັດອາເມຣິກາ ຕໍ່ພາກພື້ນອາຊີຕາເວັນອອກກາງ.
ທ່ານ ລາບຣອບ ໄດ້ກ່າວລະບຸໃນມື້ວັນພຸດທີ 22 ເມສາຜ່ານມາ ທີ່ນະຄອນຫລວງມົດສະກູ ປະເທດຣັດເຊຍວ່າ ທີ່ຜ່ານມາລັດຖະບານວໍຊິງຕັນ ປະຕິເສດທີ່ຈະຍອມຮັບເຖິງຄວາມຜິດພາດຂອງຕົນ ໃນເລື່ອງດັ່ງກ່າວນີ້ມາໂດຍຕະຫລອດ ແຕ່ເຖິງແນວໃດກໍຕາມ ບໍ່ອາດປະຕິເສດຄວາມຮັບຜິດຊອບໄດ້ວ່າ ຄວາມລົ້ມເຫລວຕໍ່ເນື່ອງຂອງ ຂະບວນການນະໂຍບາຍຕ່າງປະເທດ ຂອງລັດຖະບານສະຫະລັດອາເມຣິກາ ຕໍ່ພາກພື້ນຕາເວັນອອກກາງ ໄດ້ຊຸກດັນໃຫ້ກຸ່ມ IS ກຳເນີດເກີດຂຶ້ນ ແລະ ກາຍມາເປັນໄພຄຸກຄາມໃຫຍ່ຫລວງ ຕໍ່ສັນຕິພາບ ແລະ ຄວາມໝັ້ນຄົງ ທັງຂອງສະຫະລັດອາເມຣິກາເອງ ແລະ ອີກຫລາຍໆປະເທດໃນທົ່ວໂລກ.
” ສະຫະລັດອາເມຣິກາ ຄືບິດາຜູ້ໃຫ້ກຳເນີດກຸ່ມ IS ນີ້ຄືຄວາມຈິງອັນໜ້າເຈັບປວດ ທີ່ບັນດາຜູ້ມີອຳນາດໃນວໍຊິງຕັນ ຕ້ອງຍອມຮັບໃຫ້ໄດ້ ” ທ່ານ ລາບຣອບ ກ່າວ.