ທ່ານ ທອງຫຼໍ່ ສີລະມາດ ຫົວໜ້າກຸ່ມກະສິກຳອິນຊີ ນະຄອນຫຼວງວຽງຈັນ (ນວ) ໄດ້ກ່າວວ່າ: ກຸ່ມກະສິກຳອິນຊີ ນວ ແມ່ນໄດ້ຮັບການຊີ້ນຳຈາກຂະແໜງປູກຝັງ ນວ ປັດຈຸບັນນີ້ ໄດ້ຂະຫຍາຍກຸ່ມກະສິກຳອິນຊີ ທີ່ເຮັດການຜະລິດເພື່ອຈຳໜ່າຍທັງໝົດ 10 ກຸ່ມ ໃນ 6 ຕົວເມືອງ ມີສະມາຊິກ 150 ຄອບຄົວ ເຫັນວ່າເພີ່ມຂຶ້ນ ສາມາດຜະລິດພືດຜັກໄດ້ທັງໝົດ 5-6 ໂຕນຕໍ່ອາທິດ ການຈຳໜ່າຍແມ່ນອາທິດໜຶ່ງ 4 ມື້ ຄື: ວັນພຸດ ແລະ ວັນເສົາ ຈຳໜ່າຍຢູ່ທີ່ສວນໄຊເຊດຖາ ວັນຈັນ ແລະ ວັນພະຫັດ ຈຳໜ່າຍຢູ່ສວນເຈົ້າຟ້າງຸ່ມ ເມືອງສີໂຄດຕະບອງ ສຳລັບລາຍຮັບຂອງສະມາຊິກພາຍໃນກຸ່ມ ແມ່ນສະເລ່ຍຄອບຄົວໜຶ່ງ 1 ລ້ານກີບຕໍ່ອາທິດ ໃນດ້ານການກຳນົດລາຄາຈຳໜ່າຍຜັກກະສິກຳອິນຊີ ແມ່ນໄດ້ກຳນົດລາຄາໃນ 2 ລະດູ ຄື: ລະດູແລ້ງ ແລະ ລະດູຝົນ ໃນນັ້ນ ລະດູຝົນ ລາຄາຜັກຈະສູງຂຶ້ນປະມານ 20-30% ພ້ອມນັ້ນ ກໍ່ໄດ້ອີງໃສ່ລາຄາຕະຫຼາດທົ່ວໄປ ແລະ ຕົ້ນທຶນການຜະລິດ.
ສຳລັບການຜະລິດໃນໄລຍະລະດູແລ້ງນີ້ເຫັນວ່າ ເກີດມີຜົນກະທົບ ເພາະຂາດແຄນນ້ຳ ໂດຍສະເພາະ ໃນບາງກຸ່ມທີ່ເຮັດການຜະລິດນຳໃຊ້ນ້ຳບາດານ ຈຶ່ງເກີດຜົນກະທົບໃນການຂາດແຄນນ້ຳ ຈຳເປັນຕ້ອງໄດ້ຫຼຸດປະລິມານການປູກລົງປະມານ 30% ເພື່ອໃຫ້ພຽງພໍກັບນ້ຳທີ່ມີຢູ່ກຸ່ມ ທີ່ກຳລັງປະເຊີນກັບການຂາດແຄນນ້ຳ ປັດຈຸບັນແມ່ນກຸ່ມໂນນແຕ້ ເມືອງໄຊທານີ ດັ່ງນັ້ນ ຈຶ່ງຮຽກຮ້ອງມາຍັງພາກສ່ວນທີ່ກ່ຽວຂ້ອງ ເຂົ້າໄປຊ່ວຍໃນການເຈາະບາດານເພີ່ມຕື່ມ ເພື່ອໃຫ້ນ້ຳມີພຽງພໍກັບຄວາມຕ້ອງການ.
ຕັ້ງແຕ່ເລີ່ມຕົ້ນຮອດປັດຈຸບັນ ເຫັນວ່າຕະຫຼາດກະສິກຳອິນຊີ ແມ່ນໄດ້ມີການຂະຫຍາຍຕົວສູງຂຶ້ນ ເພາະຜູ້ບໍລິໂພກໄດ້ຫັນມາບໍລິໂພກຜັກກະສິກຳອິນຊີຫຼາຍຂຶ້ນ ສະແດງໃຫ້ເຫັນເຖິງຄວາມເອົາໃຈໃສ່ໃນການຮັກສາສຸຂະພາບ ແລະ ໃນຕໍ່ໜ້າແມ່ນໄດ້ມີການວາງແຜນຈະຂະຫຍາຍຕະຫຼາດກະສິກຳອິນຊີ ກວມ 9 ຕົວເມືອງ ໃນ ນວ ພ້ອມທັງໄດ້ວາງແຜນເຮັດການຫຸ້ມຫໍ່ພືດຜັກສົ່ງຕາມຮ້ານຄ້າຕ່າງໆ ເພື່ອເຮັດໃຫ້ແຜນດັ່ງກ່າວສຳເລັດ ຈຶ່ງຕ້ອງການຮຽກຮ້ອງໃຫ້ພາກສ່ວນທີ່ກ່ຽວຂ້ອງ ໃຫ້ການຈັດຫາຕະຫຼາດຖາວອນໃນການຈຳໜ່າຍ ແລະ ທັງລະດົມແຫຼ່ງທຶນເຂົ້າຊ່ວຍເຫຼືອເພີ່ມຕື່ມ ຖ້າປະຊາຊົນ ຫຼື ກຸ່ມບ້ານມີຄວາມສົນໃຈ ຫຼື ຕ້ອງການເຂົ້າກຸ່ມກະສິກຳອິນຊີ ນວ ແມ່ນເຮັດເປັນກຸ່ມຜະລິດແລ້ວ ທາງກຸ່ມກະສິກຳອິນຊີ ຈະລົງໄປເຝິກອົບຮົມໃຫ້ຄວາມຮູ້ກ່ຽວກັບວິທີ ແລະ ເຕັກນິກການປູກຜັກກະສິກຳອິນຊີ ສາມາດຕິດຕໍ່ໄດ້ນຳຄະນະກຳມະການກຸ່ມດັ່ງກ່າວ ທີ່ຕະຫຼາດກະສິກຳອິນຊີ.
ແຫລ່ງຂ່າວ: ວຽງຈັນໃໝ່