| ຜົນຂອງໂຄງການແຂ່ງຂັນຄວາມທ້າທາຍຜູ້ປະກອບການຍິງຢູ່ຂົງເຂດລຸ່ມແມ່ນ້ຳຂອງສາມາດຄັດເລືອກໄດ້ 10 ບໍລິສັດຍິງຂອງລາວ ຈາກຈຳນວນ 100 ກວ່າບໍລິສັດທີ່ເຂົ້າຮ່ວມແຂ່ງຂັນ, ພ້ອມທັງຮັບລາງວັນມູນຄ່າເກືອບ 10 ພັນໂດລາສະຫະລັດຕໍ່ບໍລິສັດ. ໂສມຫນ້າບໍລິສັດທີ່ໄດ້ຮັບລາງວັນຊະນະເລີດປະກອບມີ: ບໍລິສັດວຽງໄຊສິນນິຍົມຂົນສົ່ງຈຳກັດ, ວິສາຫະກິດສ່ວນບຸກຄົນໂຮງງານແອວບີທີ, ກຸ່ມຜະລິດຕະພັນຊາວບ້ານ, ວິສາຫະກິດສ່ວນບຸກຄົນ ຟາມຫມູ່ຈັນທະຈອນ, ບໍລິສັດວິຊາການໄຟຟ້າໂຍທາ ແລະ ກົນຈັກລາວຈຳກັດ ຜູ້ດຽວ, ກຸ່ມຜະລິດຕະພັນກະສິກຳສະຫມຸນໄພ, ບໍລິສັດລາວຈິບ ຊິນີມ່າ, ຣີສອດຖາວອນສຸກ, ບໍລິສັດກາເຟ ແລະ ຂົ້ວກາເຟເລີທຣີໂອ, ໂຮງສີເຂົ້ານາງນາລີຍົດໃຫຍ່. ໃນງານຖະແຫລງຂ່າວການປະກາດຜົນງານວັນຊະນະເລີດຂອງໂຄງການແຂ່ງຂັນຄວາມທ້າທາຍຂອງຜູ້ປະກອບການຍິງຢູ່ຂົງເຂດລຸ່ມແມ່ນ້ຳຂອງ, ທີ່ຈັດຂຶ້ນຢູ່ສະມາຄົມນັກຂ່າວແຫ່ງປະເທດລາວ, ມື້ວານນີ້ຮູ້ວ່າ: ໂຄງການນີ້ ເປັນໂຄງການແຂ່ງຂັນຜູ້ປະກອບການຍິງທີ່ມີຄວາມກະຕືລືລົ້ນ ແລະ ແຮງບັນດານໃຈສູງແມ່ນຜູ້ບໍລິຫານ ແລະ ເປັນເຈົ້າຂອງທຸລະກິດ. ເພື່ອເປັນການສົ່ງເສີມທຸລະກິດຍິງມີການຂະຫຍາຍຕົວ, ເຊິ່ງຜົນຕອບຮັບຈາກໂຄງການແມ່ນຜູ້ປະກອບການຈະໄດ້ຮັບເງິນເກືອບ 10 ພັນໂດລາ ເພື່ອນຳໄປປັບປຸງທຸລະກິດ, ໄດ້ຮັບການໃຫ້ຄຳປຶກສາແບບຕົວຕໍ່ຕົວ, ໂດຍແນໃສ່ແກ້ໄຂບັນຫາ ແລະ ຄວາມທ້າທາຍຂອງທຸລະກິດ, ຮ່ວມສຳມະນາ ແລະ ຝຶກອົບຮົມແບບປະຕິບັດ, ແລກປ່ຽນຄຳແນະນຳໃນບັນດາຂະແຫນງການ ແລະ ໂອກາດໃນການສ້າງເຄືອຂ່າຍ, ການສຶກສາຖອດຖອນບົດຮຽນນຳກັນດ້ານຕະຫລາດ, ການບໍລິຫານຊັບພະຍາກອນ ແລະ ງົບປະມານ. |
| ຂ່າວຈາກ: www.ecom.org.la |
