ກຸ່ມພັນທະມິດອາຫລັບນຳໂດຍຊາອຸດິອາຣະເບຍ ໂຈມຕີທາງອາກາດໃສ່ຄັງແສງຈະຫລວດໃນເມືອງຫລວງປະເທດເຢເມນ ສ້າງຄວາມເສຍຫາຍວົງກວ້າງ ມີຜູ້ເສຍຊີວິດ ແລະ ບາດເຈັບຫລາຍຮ້ອຍຄົນ.
ສຳນັກຂ່າວຕ່າງປະເທດ ລາຍງານໃນວັນທີ 21 ເມສານີ້ວ່າ ເຮືອບິນສູ້ຮົບຂອງກຸ່ມພັນທະມິດຊາດອາຫລັບນິກາຍສຸໜີ່ ເຊິ່ງນຳໂດຍປະເທດຊາອຸດິອາຣະເບຍ ໄດ້ດຳເນີນການໂຈມຕີທາງອາກາດໃນປະເທດເຢເມນອີກເທື່ອໜຶ່ງ ໃນມື້ວັນຈັນ (20 ເມສາ) ທີ່ຜ່ານມາ ໂດຍມີເປົ້າໝາຍທຳລາຍຄັງແສງທີ່ເກັບມ້ຽນຈະຫລວດ ເທິງເນີນພູ ຟາດ ອັດຕັນ ຂອງນະຄອນຫລວງຊານາ ປະເທດເຢເມນ ເຊິ່ງຖືກກຸ່ມຕິດອາວຸດ ” ຮູຕິ ” ຍຶດຄອງໄດ້ ໂດຍການໂຈມຕີໄດ້ເຮັດໃຫ້ເກີດມີການລະເບີດຮຸນແຮງ ຈົນເຮືອນຊານທີ່ຢູ່ອ້ອມຮອບໄດ້ເພພັງ ຖືກລະຫລົ່ມເສຍຫາຍເປັນວົງກວ້າງ ສົ່ງຜົນເຮັດໃຫ້ມີປະຊາຊົນເສຍຊີວິດ 18 ຄົນ ແລະ ບາດເຈັບອີກຢ່າງໜ້ອຍ 300 ຄົນ ໂດຍເຊື່ອວ່າຕົວເລກທີ່ແທ້ຈິງອາດຈະສູງກ່ວານີ້.
ທັງນີ້ ກຸ່ມພັນທະມິດຊາດອາຫລັບດັ່ງກ່າວ ເຊິ່ງນຳໂດຍຊາອຸດິອາຣະເບຍ ໄດ້ເລີ່ມປະຕິບັດການໂຈມຕີທາງອາກາດ ຕໍ່ຕ້ານກຸ່ມຕິດອາວຸດມຸດສະລິມນິກາຍຊີອະ ສາຍໄຊດີ ຫລື ກຸ່ມ ” ຮູຕິ ” ຕັ້ງແຕ່ເດືອນມີນາທີ່ຜ່ານມາ ໂດຍໃຫ້ຄຳໝັ້ນສັນຍາວ່າ ຈະຄືນອຳນາດໃຫ້ແກ່ປະທານາທິບໍດີ ອາເບດຣາບບູ ມານຊູ ຮາດີ ເຊິ່ງຖືກກຸ່ມຮູຕິເຂົ້າຍຶດອຳນາດ ຈົນຕ້ອງໄດ້ອົບພະຍົບມາລີ້ໄພທາງການເມືອງຢູ່ປະເທດຊາອຸດິອາຣະເບຍ.
ທ່ານ ພົນຈັດຕະວາ ອາເໝັດ ອັນ-ອັດຊີຣີ ໂຄສົກຂອງກຸ່ມພັນທະມິດດັ່ງກ່າວໄດ້ເປີດເຜີຍມື້ວານນີ້ (20 ເມສາ) ວ່າ ພວກເຂົາໄດ້ດຳເນີນການໂຈມຕີທາງອາກາດໄປແລ້ວ ຫລາຍກ່ວາ 2,000 ຄັ້ງ ສາມາດຄວບຄຸມນ່ານຟ້າຂອງປະເທດເຢເມນໄດ້ຢ່າງສົມບູນ ແລະ ກຳລັງຈະທຳລາຍຮາກຖານຂອງກຸ່ມຕິດອາວຸດດັ່ງກ່າວ.
