ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ໄດ້ກຳນົດເອົາ 5 ເມືອງ (ເມືອງນາຊາຍທອງ ໄຊທານີ ຫາດຊາຍຟອງ ສັງທອງ ແລະ ເມືອງປາກງື່ມ) ໃນການຜະລິດເຂົ້າ ປູກພືດຜັກ ປູກຫຍ້າ ແລະ ລ້ຽງງົວ ໃຫ້ກາຍເປັນສິນຄ້າ ເພື່ອສະໜອງພາຍໃນ ແລະ ສົ່ງອອກ.
ວັນທີ 8 ເມສາ 2015 ທີ່ພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ໄດ້ຈັດກອງປະຊຸມການເຊື່ອມຊຶມ ແຜນພັດທະນາເສດຖະກິດ-ສັງຄົມ ຄັ້ງທີ 8 ແລະ ແຜນຍຸດທະສາດພັດທະນາກະສິກຳ 2025 ຂັ້ນສູນກາງ ແລະ ຂັ້ນແຂວງ ແລະ ແຜນພັດທະນາກະສິກຳ ແລະ ປ່າໄມ້ ໄລຍະ 5 ປີ ໂດຍເປັນກຽດເຂົ້າຮ່ວມຂອງທ່ານ ດຣ. ພວງປາຣິສັກ ປຣະວົງວຽງຄຳ ລັດຖະມົນຕີຊ່ວຍວ່າການກະຊວງກະສິກຳ ແລະ ປ່າໄມ້ ທ່ານ ດຣ. ອານຸພາບ ຕຸນາລົມ ຮອງເຈົ້າຄອງນະຄອນຫຼວງວຽງຈັນ ພ້ອມກັນນີ້ ກໍ່ມີພະແນກກະສິກຳ ແລະ ປ່າໄມ້ ແຂວງວຽງຈັນ ເມືອງທົດລອງວຽກງານສາມສ້າງ ແລະ ຫ້ອງການກ່ຽວຂ້ອງເຂົ້າຮ່ວມ.
ທ່ານ ຮສ.ດຣ. ລິນຄຳ ດວງສະຫວັນ ຫົວໜ້າພະແນກກະສິກຳ ແລະ ປ່າໄມ້ ກ່າວວ່າ: ເພື່ອຮັບປະກັນຄວາມໝັ້ນຄົງທາງດ້ານສະບຽງອາຫານ ໂດຍເລັ່ງໃສ່ການປູກເຂົ້າລະດູຝົນ ປູກພືດຜັກ ລ້ຽງງົວ ຢູ່ເຂດທີ່ມີເງື່ອນໄຂໃນ 5 ຕົວເມືອງຄື: ເມືອງນາຊາຍທອງ ໄຊທານີ ຫາດຊາຍຟອງ ສັງທອງ ແລະ ເມືອງປາກງື່ມ ຕາມຄວາມເໝາະສົມ ເຊິ່ງຈະຊຸກຍູ້ສົ່ງເສີມການຜະລິດເປັນສິນຄ້າ ຕິດພັນກັບອຸດສາຫະກຳ-ປຸງແຕ່ງ ແລະ ການຕະຫຼາດເພື່ອສະໜອງພາຍໃນ ແລະ ສົ່ງອອກຕ່າງແຂວງ ແລະ ຕ່າງປະເທດ ໂດຍເລັ່ງໃສ່ກະສິກຳອິນຊີ ກະສິກຳສະອາດ ຫັນເປັນການຜະລິດແບບຄົບວົງຈອນ ອິງໃສ່ບັນດາໂຄງການຊົນລະປະທານທີ່ມີນ້ຳໄຫຼເອງ ເຊັ່ນ: ໂຄງການນ້ຳຫຸມ-ນ້ຳຊວງ ແລະ ບ່ອນອື່ນໆ.
ຕາມການຄາດໝາຍແຕ່ປີ 2016-2020 ຈະຜະລິດເຂົ້າໃຫ້ໄດ້ສະເລ່ຍ 372.200 ໂຕນຕໍ່ປີ ໃນເນື້ອທີ່ 77.800 ເຮັກຕາຕໍ່ປີ ພືດຜັກ 125.200 ໂຕນຕໍ່ປີ ໃນເນື້ອທີ່ 11.700 ເຮັກຕາຕໍ່ປີ ປູກຫຍ້າ ແລະ ລ້ຽງງົວ ສະໜອງຊີ້ນໃຫ້ໄດ້ 1.200 ໂຕນ ຫຼື ລ້ຽງງົວໃຫ້ໄດ້ 17.000 ໂຕ ແລະ ປູກຫຍ້າໃຫ້ໄດ້ໃນເນື້ອທີ່ 600 ເຮັກຕາ ນອກຈາກນີ້ ຍັງມີໂຄງການຜະລິດເປັນສິນຄ້າອື່ນໆອີກປະກອບມີ: ການຜະລິດເຂົ້າອິນຊີ ຜັກອິນຊີ ສາລີ ມັນຕົ້ນ ປູກໄມ້ໃຫ້ໝາກ ລ້ຽງໝູ ປາ ແລະ ສັດປີກ.
ຫາກໂຄງການດັ່ງທີ່ກ່າວມາຂ້າງເທິງນີ້ ສຳເລັດຕາມແຜນອີກ 5 ປີ ຈະເຮັດໃຫ້ນະຄອນຫຼວງວຽງຈັນ ມີຄວາມສົມບູນແບບກວ່າເກົ່າ ເພາະໃນຕົວເມືອງຈະມີການບໍລິການ ແລະ ສູນການຄ້າທີ່ທັນສະໄໝ ທີ່ເຕັມໄປດ້ວຍຄວາມສວຍງາມ ສ່ວນນອກເມືອງຈະເຫັນກະສິກຳທີ່ສວຍສົດງົດງາມ ຕະຫຼອດທັງລະດູແລ້ງ ແລະ ລະດູຝົນ.
ແຫລ່ງຂ່າວ: ວຽງຈັນໃໝ່