ກອງປະຊຸມປະຈຳສົກປີ 2013-2014 ແລະ ທິດທາງແຜນການປະຈຳສົກປີ 2014-2015 ຂອງພະແນກພະລັງງານ ແລະ ບໍ່ແຮ່ ນະຄອນຫຼວງວຽງຈັນ ໄດ້ຈັດຂຶ້ນໃນວັນທີ 8 ເມສາ 2015 ທີ່ພະແນກດັ່ງກ່າວ ເປັນປະທານຂອງທ່ານ ຊົງເລົາ ຢົງນູ ຫົວໜ້າພະແນກພະລັງງານ ແລະ ບໍ່ແຮ່ ນະຄອນຫຼວງວຽງຈັນ ມີທ່ານ ຄຳມະນີ ອິນທິລາດ ລັດຖະມົນຕີຊ່ວຍວ່າການ ກະຊວງພະລັງງານ ແລະ ບໍ່ແຮ່ ແລະ ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍພະນັກງານ ແລະ ແຂກທີ່ຖືກເຊີນເຂົ້າຮ່ວມ.
ທ່ານຫົວໜ້າພະແນກພະລັງງານ ແລະ ບໍ່ແຮ່ນະຄອນຫຼວງ ໄດ້ຂຶ້ນລາຍງານບົດສະຫຼຸບປະຈຳປີວ່າ: ໃນໜຶ່ງປີຜ່ານມາ ພະແນກພະລັງງານ ແລະ ບໍ່ແຮ່ ໄດ້ເອົາໃຈໃສ່ຈັດຕັ້ງປະຕິບັດວຽກງານ ຈຶ່ງສາມາດຍາດໄດ້ຜົນສຳເລັດໃນຫຼາຍດ້ານ ເປັນຕົ້ນແມ່ນ ວຽກງານພະລັງງານ ໂດຍສະເພາະການຊົມໃຊ້ພະລັງງານໄຟຟ້າທົ່ວ ນວ ເທົ່າກັບ 43,70% ຂອງການຊົມໃຊ້ໄຟຟ້າທົ່ວປະເທດ ມີຈຳນວນຄອບຄົວທີ່ໄດ້ຊົມໃຊ້ໄຟຟ້າຖາວອນກວມ 99,98 % ຂອງຈຳນວນຄອບຄົວທັງໝົດ ແລະ ມີບໍລິສັດໄຟຟ້າເອກະຊົນ ທີ່ໄດ້ຮັບອະນຸຍາດດຳເນີນທຸລະກິດ 154 ບໍລິສັດ ລວມມູນຄ່າການລົງທຶນທັງໝົດ 644 ຕື້ກີບ ຄຽງຄູ່ກັນນັ້ນ ໄດ້ມີຫົວໜ່ວຍທຸລະກິດດ້ານບໍ່ແຮ່ 97 ຫົວໜ່ວຍ ມູນຄ່າລົງທຶນທັງໝົດ 404 ຕື້ກວ່າກີບ ເນື້ອທີ່ສຳປະທານຂຸດຄົ້ນ 96,64 ກິໂລແມັດ ກວມເອົາ 2,46% ອອກອະນຸຍາດໃຫ້ແກ່ຜູ້ປະກອບການທັງໝົດ 22 ຫົວໜ່ວຍ ແລະ ສາມາດສະຫຼຸບການຜະລິດການຈຳໜ່າຍຂອງບໍລິສັດ ໄດ້ຜະລິດຄຳ 48 ແທ່ງ ມູນຄ່າ 1 ຕື້ກວ່າກີບ ເງິນ 31 ແທ່ງ 39 ລ້ານກວ່າກີບ ເຊິ່ງບັນດາບໍລິສັດໄດ້ມອບພັນທະຄ່າຊັບພະຍາກອນ ແລະ ອາກອນຕ່າງໆໃຫ້ລັດຮອດປັດຈຸບັນ 1,9 ຕື້ກີບ ແລະ ໄດ້ມີໂຮງງານອຸດສາຫະກຳເສີມຄຸນຄ່າ ແລະ ແຍກທາດ ຈຳນວນ 23 ແຫ່ງ ມູນຄ່າລົງທຶນ 874 ຕື້ກວ່າກີບ ແລະ ຄຸ້ມຄອງການຂຸດຄົ້ນດິນແດງໃນ ນວ ມີທັງໝົດ 51 ຫົວໜ່ວຍ ມູນຄ່າລົງທຶນ 50,5 ຕື້ກີບ ລວມບໍລິມາດໃນການຂຸດຄົ້ນ 207.600 ແມັດກ້ອນ ໂດຍປະຕິບັດພັນທະເຂົ້າງົບປະມານທັງໝົດ 729 ລ້ານກວ່າກີບ ນອກຈາກນັ້ນ ກໍ່ໄດ້ຜ່ານທິດທາງແຜນການໃນຕໍ່ໜ້າແຕ່ລະດ້ານ ພ້ອມທັງແຜນຍຸດທະສາດ ແລະ ວິໄສທັດ ໄປພ້ອມກັບແຜນພັດທະນາວຽກງານພະລັງງານ ແລະ ບໍ່ແຮ່ໄລຍະ 5 ປີ (2016-2020) ແລະ ບັນຫາຄົງຄ້າງທີ່ນຳມາປຶກສາຫາລື ແລະ ຄົ້ນຄວ້າວິທີແກ້ໄຂ ເພື່ອເຮັດໃຫ້ວຽກງານດັ່ງກ່າວ ຍາດໄດ້ຜົນສຳເລັດເພີ່ມຂຶ້ນ.
ແຫລ່ງຂ່າວ: ວຽງຈັນໃໝ່