ເກີດເຫດມືປືນກວາດຍິງຜູ້ພິພາກສາ ພ້ອມທະນາຍຄາສຳນັກງານສານ ຕາຍ 4 ຄົນ ຢູ່ເມືອງມິລານ ປະເທດອີຕາລີ.
ສຳນັກຂ່າວຕ່າງປະເທດ ລາຍງານໃນວັນທີ 10 ເມສານີ້ວ່າ ເກີດເຫດມືປືນກວາດຍິງ ໃນສຳນັກງານສານ ພາເລດ ອອບ ຈັສຕິສ ໃນເມືອງມິລານ ປະເທດອີຕາລີ ໂດຍຜູ້ກໍ່ເຫດຄື ທ້າວ ເຄລາດິໂອ ຈາດິເອນໂລ ເຊິ່ງຕົກເປັນຈຳເລີຍຖືກຟ້ອງລົ້ມລະລາຍ ເຊິ່ງເຂົາໄດ້ບຸກຍິງຜູ້ພິພາກສາ, ທະນາຍຄວາມ ແລະ ຊາຍອີກ 1 ຄົນ ໃນຕອນເຊົ້າຂອງມື້ວັນພຸດ (8 ເມສາຜ່ານມາ) ຕາມເວລາໃນທ້ອງຖິ່ນ. ເບື້ອງຕົ້ນ ມືປືນລາຍນີ້ກຳລັງນັ່ງຟັງການພິຈາລະນາຄະດີລົ້ມລະລາຍ ຈາກການສໍ້ໂກງຂອງເຂົາ ທີ່ຫ້ອງພິຈາລະນາຄະດີເທິງຊັ້ນ 3 ຂອງອາຄານສານ ພາເລດ ອອບ ຈັສຕິສ ກ່ອນທີ່ເຂົາຈະຈົກປືນອອກມາຍິງທະນາຍຄວາມ ແລະ ຊາຍອີກຄົນໜຶ່ງ ເຮັດໃຫ້ທະນາຍຄວາມເສຍຊີວິດພາຍໃນສານ ສ່ວນຊາຍອີກຄົນທີ່ຖືກຍິງ ແມ່ນໄປເສຍຊີວິດຢູ່ໂຮງໝໍ, ຈາກນັ້ນ ມືປືນລາຍດັ່ງກ່າວ ກໍອອກຈາກຫ້ອງພິຈາລະນາຄະດີ ແລ້ວມຸ່ງໜ້າໄປຍັງສຳນັກງານຂອງຜູ້ພິພາກສາສານອຸທອນ ເຊິ່ງມີ ທ່ານ ເຟີນັນໂດ ຊາມປີ ຢູ່ພາຍໃນສຳນັກງານດັ່ງກ່າວ ແລ້ວເຂົາກໍຍິງທ່ານ ເຟີນັນໂດ ຈົນເສຍຊີວິດ, ຕໍ່ມາເຈົ້າໜ້າທີ່ໄດ້ພົບມີຜູ້ເສຍຊີວິດອີກຄົນທີ 4 ຢູ່ພາຍໃນອາຄານສານ ໂດຍເຊື່ອວ່າເສຍຊີວິດເພາະຫົວໃຈວາຍຈາກເຫດຍິງກັນ.
ມືປືນລາຍດັ່ງກ່າວ ໄດ້ຫລົບຊ່ອນຢູ່ພາຍໃນອາຄານສານດົນກ່ວາ 1 ຊົ່ວໂມງ ກ່ອນທີ່ຈະຫລົບໜີດ້ວຍລົດຈັກ ແຕ່ກໍຖືກໜ່ວຍສາລະວັດທະຫານ ຄາຣາບິເນຍຣີ ຈັບກຸມຕົວໄດ້ ທີ່ເມືອງວິເມີຄາເຕ ເຊິ່ງຫ່າງອອກຈາກເມືອງມິລານ ໄປທາງທິດຕາເວັນອອກສຽງເໜືອປະມານ 25 ກີໂລແມັດ.