ເນື່ອງໃນໂອກາດສົ່ງທ້າຍປີເກົ່າ ປີມະເມຍ ພສ 2557 ແລະ ຕ້ອນຮັບປີໃໝ່ ປີມະແມ ພສ 2558 ຂ້າພະເຈົ້າມີຄວາມປິຕິຊົມຊື່ນເປັນຢ່າງຍິ່ງ ສົ່ງພອນໄຊອັນປະເສີດມາຍັງພີ່ນ້ອງຮ່ວມຊາດ ຢູ່ພາຍໃນປະເທດ ແລະ ຊາວລາວ ທີ່ກຳລັງເຮັດວຽກ ຫຼື ດຳລົງຊີວິດຢູ່ຕ່າງແດນ ພ້ອມທັງຊາວຕ່າງດ້າວ ແລະ ຊາວຕ່າງປະເທດ ທີ່ດຳລົງຊີວິດ ແລະ ປະຕິບັດໜ້າທີ່ຂອງຕົນຢູ່ ສປປ ລາວ ຂໍໃຫ້ທຸກໆຄົນຈົ່ງມີແຕ່ຄວາມສຸກ ມີຄວາມເບີກບານມ່ວນຊື່ນ ແລະ ໄດ້ຮັບຜົນສຳເລັດໃໝ່ໃນປີໃໝ່ນີ້.
ໃນຕະຫຼອດປີມະເມຍທີ່ຜ່ານມາ ເຖິງວ່າສະພາບແວດລ້ອມສາກົນ ແລະ ພາກພື້ນໄດ້ຜັນແປຢ່າງສັບສົນ ໄພພິບັດທຳມະຊາດເກີດຂຶ້ນຫຼາຍຄັ້ງ ຄວາມຫຍຸ້ງຍາກດ້ານການເງິນ-ງົບປະມານ ແລະ ອຸປະສັກຕ່າງໆ ໄດ້ສົ່ງຜົນກະທົບຕໍ່ປະເທດເຮົາໃນບາງດ້ານກໍ່ຕາມ ແຕ່ການນຳຂອງພັກ ແລະ ລັດຖະບານພວກເຮົາກໍ່ໄດ້ຕັ້ງໜ້າ ແລະ ຕັດສິນໃຈຮ່ວມກັບປະຊາຊົນລາວບັນດາເຜົ່າໃນທົ່ວປະເທດ ເປັນເຈົ້າການຜ່ານຜ່າຂໍ້ຫຍຸ້ງຍາກຕ່າງໆ ສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ 9 ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 7 ຂອງລັດ ສຸມໃສ່ແກ້ໄຂຄວາມທຸກຍາກຂອງປະຊາຊົນ ແລະ ຈັດຕັ້ງປະຕິບັດເປົ້າໝາຍສະຫັດສະວັດຂອງສະຫະປະຊາຊາດ ອັນໄດ້ເຮັດໃຫ້ ສປປ ລາວ ມີຜົນສຳເລັດໃນຫຼາຍດ້ານ ອັນໄດ້ສ້າງສະຖຽນລະພາບທາງດ້ານການເມືອງຢ່າງໜັກແໜ້ນ ສັງຄົມມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍ ຈັງຫວະການພັດທະນາເສດຖະກິດ-ສັງຄົມໄດ້ສືບຕໍ່ຂະຫຍາຍຕົວ ການລົງທຶນຈາກພາຍໃນ ແລະ ຕ່າງປະເທດ ກໍ່ໄດ້ເພີ່ມຂຶ້ນຢ່າງຕໍ່ເນື່ອງ ແລະ ມີປະສິດທິຜົນໃນປີຜ່ານມາ ລວມຍອດຜະລິດຕະພັນພາຍໃນມີອັດຕາການເຕີບໂຕປະມານ 7,5% ສະເລ່ຍລາຍຮັບຕໍ່ຫົວຄົນ ບັນລຸໄດ້ປະມານ 1.700 (ໜຶ່ງພັນເຈັດຮ້ອຍ) ໂດລາສະຫະລັດຕໍ່ຄົນຕໍ່ປີ ຊີວິດການເປັນຢູ່ຂອງປະຊາຊົນ ກໍ່ໄດ້ຮັບການປັບປຸງຍົກລະດັບຂຶ້ນຕື່ມ ຄອບຄົວທຸກຍາກໄດ້ຮັບການແກ້ໄຂໃຫ້ຫຼຸດລົງ ໄດ້ຕາມຄາດໝາຍການພົວພັນຮ່ວມມືລະຫວ່າງ ສປປ ລາວ ເຮົາ ກັບບັນດາປະເທດເພື່ອນມິດ ແລະ ອົງການສາກົນ ກໍ່ໄດ້ສືບຕໍ່ຂະຫຍາຍຕົວຢ່າງກວ້າງຂວາງ ອັນໄດ້ຍົກຖານະບົດບາດ ແລະ ອິດທິພົນຂອງ ສປປ ລາວ ໃຫ້ນັບມື້ນັບສູງຂຶ້ນໃນເວທີສາກົນ.
ໃນຕົ້ນເດືອນມີນາ ພວກເຮົາໄດ້ມີການສຳຫຼວດພົນລະເມືອງ ແລະ ທີ່ຢູ່ອາໄສ ຄັ້ງທີ 4 ທົ່ວປະເທດ ເພື່ອສ້າງເງື່ອນໄຂພື້ນຖານອັນໃໝ່ ໃຫ້ແກ່ການວາງແຜນພັດທະນາເສດຖະກິດ-ສັງຄົມ ຄັ້ງທີ 8 ສຳລັບ 2015-2020 ແຜນຍຸດທະສາດການພັດທະນາເຖິງປີ 2025 ແລະ ວິໄສທັດຮອດປີ 2030 ການນຳພັກ-ລັດພວກເຮົາ ຍັງໄດ້ຮ່ວມກັບປະຊາຊົນທົ່ວທັງປະເທດ ສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ ດ້ວຍຄວາມເອກອ້າງທະນົງໃຈ ທີ່ເຕັມໄປດ້ວຍເນື້ອໃນສຳຄັນ ອັນເຮັດໃຫ້ສັງຄົມລາວໄດ້ຮັບຮູ້ເຖິງຜົນງານ ແລະ ຜົນສຳເລັດອັນໃຫຍ່ຫຼວງ ຈາກການນຳພາອັນສະຫຼາດສ່ອງໃສຂອງພັກປະຊາຊົນປະຕິວັດລາວ ໃນພາລະກິດການຕໍ່ສູ້ກູ້ຊາດ ເພື່ອຄວາມເປັນເອກະລາດແຫ່ງຊາດ ແລະ ໃນການສ້າງສາພັດທະນາປະເທດຊາດ ຕະຫຼອດ 60 ປີທີ່ຜ່ານມາ.
ປີມະແມ ພສ 2558 ເປັນປີທີ່ມີຄວາມໝາຍສຳຄັນ ພິເສດ ນອກຈາກການສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວທີ່ມີກຽດ ສະຫງ່າ ໃນເດືອນຜ່ານມາແລ້ວນັ້ນ ພວກເຮົາຍັງຈະໄດ້ພ້ອມກັນສືບຕໍ່ຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາ ເພື່ອຕ້ອນຮັບວັນຄົບຮອບ 40 ປີ ແຫ່ງການສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ວັນເກີດຂອງປະທານ ໄກສອນ ພົມວິຫານ ຄົບຮອບ 95 ປີ ການກຽມພ້ອມເຂົ້າເປັນປະຊາຄົມເສດຖະກິດອາຊຽນ ໃນທ້າຍປີ 2015 ນີ້ ໃນປີ 2016 ທີ່ຈະມາເຖິງ ສປປ ລາວ ພວກເຮົາຍັງມີເຫດການເດັ່ນ ທີ່ຕ້ອງໄດ້ເອົາໃຈໃສ່ອອກແຮງການ ກະກຽມໃຫ້ແກ່ການດຳເນີນກອງປະຊຸມໃຫຍ່ ຄັ້ງທີ 10 ຂອງພັກປະຊາຊົນປະຕິວັດລາວ ທັງຈະໄດ້ຮັບກຽດອີກເທື່ອໃໝ່ ເປັນປະທານຈັດກອງປະຊຸມສຸດຍອດອາຊຽນ ຄັ້ງທີ 16 ທີ່ນະຄອນຫຼວງວຽງຈັນ.
ດ້ວຍເຫດນີ້ ຂ້າພະເຈົ້າຈຶ່ງຂໍຮຽກຮ້ອງມາຍັງທຸກໆທ່ານ ຈົ່ງພ້ອມພຽງກັນເພີ່ມທະວີຄວາມສາມັກຄີ ອັນເປັນປຶກແຜ່ນແໜ້ນໜາຂອງຊາດລາວໃນທົ່ວປະເທດ ກໍ່ຄືກັບຊາວລາວຢູ່ຕ່າງປະເທດ ໂດຍຢຶດໝັ້ນໃນແນວທາງພາຍໃນ ແລະ ຕ່າງປະເທດຂອງພັກ ແລະ ລັດເຮົາຢ່າງສະເໝີຕົ້ນສະເໝີປາຍ ສືບຕໍ່ສ້າງການຫັນປ່ຽນຢ່າງແຂງແຮງຕາມຈິດໃຈຂອງ 4 ບຸກທະລຸ ທີ່ກອງປະຊຸມໃຫຍ່ ຄັ້ງທີ 9 ຂອງພັກວາງອອກ ຈົ່ງພ້ອມກັນຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍທົດສອບທຸກປະການ ເພື່ອກ້າວຂຶ້ນຢ່າງບໍ່ຢຸດຢັ້ງ ທັງໝົດເຫຼົ່ານັ້ນແມ່ນເພື່ອແນໃສ່ເຮັດໃຫ້ປະເທດຊາດມັ່ງຄັ່ງເຂັ້ມແຂງ ປະຊາຊົນຮັ່ງມີຜາສຸກ ສັງຄົມມີຄວາມຍຸຕິທຳ ແລະ ສີວິໄລ.
ໃນໂອກາດອັນເປັນສິລິມຸງຄຸນນີ້ ຂ້າພະເຈົ້າ ໃນນາມຄະນະບໍລິຫານງານສູນກາງພັກ ແລະ ລັດຖະບານ ສປປ ລາວ ຂໍສົ່ງພອນໄຊອັນປະເສີດມາຍັງສະມາຊິກພັກ ພະນັກງານ ທະຫານ ຕຳຫຼວດ ແລະ ພີ່ນ້ອງຮ່ວມຊາດທຸກຄົນ ຈົ່ງປະສົບແຕ່ຄວາມຜາສຸກໃນຊີວິດສ່ວນຕົວ ຄອບຄົວ ແລະ ມີຜົນສຳເລັດຢ່າງຈົບງາມ ໃນໜ້າທີ່ວຽກງານຮັບຜິດຊອບຂອງຕົນ.
ພິເສດ ຂ້າພະເຈົ້າຂໍຝາກຄວາມຢ້ຽມຢາມຖາມຂ່າວ ແລະ ຄວາມເປັນຫ່ວງເປັນໄຍ ພ້ອມທັງພອນໄຊອັນປະເສີດ ໄປຍັງຖັນແຖວກຳລັງປະກອບອາວຸດ ທີ່ພວມປະຕິບັດໜ້າທີ່ອັນສູງສົ່ງ ແລະ ມີກຽດສະຫງ່າໃນການປົກປັກຮັກສາເຂດນ້ຳແດນດິນອັນຄົບຖ້ວນຂອງປະເທດ ຊາດ ຈົ່ງມີສຸຂະພາບ ແລະ ພະລານາໄມສົມບູນ ແລະ ເຂັ້ມແຂງແຮງກ້າສະເໝີໄປ.
ພ້ອມດຽວກັນນີ້ ຂ້າພະເຈົ້າກໍ່ຂໍຝາກຄວາມຢ້ຽມຢາມຖາມຂ່າວອັນອົບອຸ່ນ ມາຍັງພະນັກງານບຳນານ ຜູ້ເສຍອົງຄະທຸກຖ້ວນໜ້າ ຈົ່ງມີສຸຂະພາບແຂງແຮງ ແລະ ຕໍ່ຜູ້ທີ່ພວມຮັກສາປິ່ນປົວຢູ່ຕາມໂຮງໝໍແຫ່ງຕ່າງໆ ຈົ່ງຫາຍຈາກພະຍາດໂລຄາທັງປວງໂດຍໄວ.
ປີມະແມ 2558 ຂໍໃຫ້ທຸກໆຄົນຈົ່ງມີແຕ່ຄວາມຢູ່ເຢັນເປັນສຸກ ຄວາມເຈັບຢ່າໄດ້ ຄວາມໄຂ້ຢ່າມີ ຂໍໃຫ້ມີສຸຂະພາບເຂັ້ມແຂງ ຢູ່ດີມີແຮງຕະຫຼອດປີ.
ຂໍຂອບໃຈ-ສະບາຍດີປີໃໝ່
ແຫລ່ງຂ່າວ: ວຽງຈັນໃໝ່