ຊາວເປຣູຕະລຶງ ວັດຖຸປະຫລາດຄ້າຍຄືຈານບິນ ບິນເໜືອນ່ານຟ້າກາງເມືອງຫລວງ ກ່ອນຈະຫາຍໄປ ຫລາຍຄົນເຊື່ອເປັນຍານມະນຸດຕ່າງດາວ.
ສຳນັກຂ່າວຕ່າງປະເທດ ລາຍງານໃນວັນທີ 25 ກຸມພາຜ່ານມານີ້ວ່າ ສະຖານີໂທລະພາບຊ່ອງໜຶ່ງຂອງເປຣູ ໄດ້ມີການຖ່າຍທຳລາຍການຢູ່ ແຕ່ຢູ່ດີໆກໍມີວັດຖຸປະຫລາດສີມ່ວງຢູ່ເທິງທ້ອງຟ້າປະກົດຂຶ້ນມາ ໃຈກາງນະຄອນຫລວງລິມາ ເມືອງຫລວງຂອງປະເທດເປຣູ ອັນໄດ້ເຮັດໃຫ້ທີມງານຕ້ອງໄດ້ຟ້າວຈັບກ້ອງມາບັນທຶກເຫດການດັ່ງກ່າວໄວ້ທັນທີດ້ວຍຄວາມຕື່ນເຕັ້ນ.
ທັງນີ້ ຈາກການກົດຊູມເບິ່ງພາບໃນໄລຍະໃກ້ພົບວ່າ ວັດຖຸດັ່ງກ່າວແມ່ນມີລັກສະນະຄ້າຍຄືຈານບິນ ໂດຍທາງກາງເປັນສີມ່ວງ ຂອບສີດຳມືດ ເຊິ່ງປະກົດມີຜູ້ເຫັນເຫດການດຽວກັນເກືອບ 2 ຊົ່ວໂມງ ກ່ອນທີ່ຈະຫາຍຕົວໄປ ເຮັດໃຫ້ຜູ້ຄົນຕ່າງກໍພາກັນສົງໄສວ່າ ວັດຖຸດັ່ງກ່າວແມ່ນຫຍັງ ມາຈາກໃສ ແລະ ຫາຍໄປໄດ້ແນວໃດ ເຮັດໃຫ້ຫລາຍຄົນຕ່າງກໍພາກັນເຊື່ອວ່າ ອາດເປັນຍານຂອງມະນຸດຕ່າງດາວ ຫລື UFO.
ແນວໃດກໍຕາມ, ບາງຄົນກໍໃຫັທັດສະນະວ່າ ວັດຖຸດັ່ງກ່າວອາດເປັນໂດຣນ (ວັດຖຸບິນໄດ້ແບບບັງຄັບຢູ່ພາກພື້ນດິນ) ເຊິ່ງອາດມີບາງພາກສ່ວນປ່ອຍຂຶ້ນເພື່ອຖ່າຍພາບເທິງອາກາດ.