ກຸ່ມລັດອິດສະລາມ ບຸກໂຈມຕີຫລາຍບ້ານໃນຊີເຣຍ ລັກພາຕົວຊາວຄຣິດໄປປະມານ 90 ຄົນ ໂດຍຍັງບໍ່ທັນຮູ້ສາເຫດ.
ສຳນັກຂ່າວຕ່າງປະເທດ ລາຍງານໃນວັນທີ 25 ກຸມພານີ້ວ່າ ກຸ່ມລັດອິດສະລາມ ຫລື IS ໄດ້ບຸກໂຈມຕີບັນດາບ້ານຫລາຍແຫ່ງ ໃກ້ກັບເມືອງ ທັນ ທາມາ ທາງພາກຕາເວັນອອກສຽງເໜືອຂອງປະເທດຊີເຣຍ ແລະ ລັກພາຕົວຊົນກຸ່ມນ້ອຍຊາວອັດຊີເຣຍ ເຊິ່ງນັບຖືສາສະໜາຄຣິດ ທັງຜູ້ຊາຍ ແລະ ຜູ້ຍິງ ຕະຫລອດຮອດເດັກນ້ອຍ ໄປຢ່າງໜ້ອຍປະມານ 90 ຄົນ, ໃນຂະນະທີ່ຊາວອັດຊີເຣຍບາງສ່ວນ ຕ້ອງໄດ້ອົບພະຍົບໜີໄປຍັງເມືອງຮັດຊາຄາ ທາງພາກຕາເວັນອອກ ເຊິ່ງຢູ່ພາຍໃຕ້ການຄວບຄຸມຂອງຊາວເຄີດ.